“Formula 1 dünyada sevilən və böyük tamaşaçı kütləsi olan idman növlərindən biridir”.
Bunu açıqlamasında Milli Məclisin deputatı Naqif Həmzəyev deyib. Deputat vurğulayıb ki, Formula 1 yarışları həm pilotlar, həm də həvəskarlar tərəfindən maraqla izlənilir və sevilməkdədir:
“Qeyd edim ki, Formula 1 Azərbaycanın turizm potensialını dünyaya tanıtdı. Çünki Formula 1 üçün Azərbaycana təşrif buyuran qonaqlar, həvəskarlar daha sonra yenidən Azərbaycana səfər etdilər. Bu gün də bu funksiyasını Formula 1 yerinə yetirməkdədir”.
Millət vəkilinin sözlərinə görə, Formula 1 Azərbaycanda avtomobil yarışlarına həvəsin artmasına da səbəb olmuşdur:
“Təşkilatçılar tərəfindən verilmiş məlumata görə 2024-cü ilə qədər Formula 1 yarışları Azərbaycanda keçiriləcək. Düşünürəm ki, indiyədək bu yarışlar öz missiyasını və rolunu uğurla Bakıda həyata keçirib. Böyük ehtimalla gələcəkdə Formula 1-i başqa idman yarışları əvəz edəcək. Çünki Formula 1-in Azərbaycana faydası və qazancları ilə yanaşı Formula 1 yarışı təşkil olunan ərəfədə sıxlıqlar sakinlər üçün müəyyən narazlıqlar yaradır. Gələcəkdə Formula 1-in hansısa başqa rayonlarda, yaxud xüsusi seçilmiş ərazilərdə keçirilməsi həyata keçirilə bilər. Təbii ki, bu da şəhərin yükünü aradan qaldıra bilər. Formula 1-in gözəlliyi odur ki, Bakının qədim və mərkəzi hissəsində, mərkəzi Sahil boyu ərazilərdə təşkil edilir ki, bu da görünüş olaraq şəhərin tanıtımı baxımından çox mühüm rol oynamaqdadır. Ümumillikdə, Formula 1-in Azərbaycanı və Bakının tanıdılmasında çox böyük rolu olub. Bu gün də o rol həyata keçirilməkdədir”.
“Bu gün hər kəs Azərbaycanın gücünü bilir və hüquqi demokratik inkişaf edən bir dövlət olaraq qəbul etməkdədir. Gələcəkdə biz Formula 1-in başqa şəhərlərimizdə həyata keçirilməsini yollarını axtarıb tapmalıyıq. Çalışmalıyıq ki, əldə etdiyimiz qazanclar və nailiyyətlərlə yanaşı vətəndaşların narazıçılığını və onlara yaradılmış müəyyən sıxıntıları da aradan qaldıraq”, - deyə deputat qeyd edib.