“Azərbaycan müstəqillik illərində öz enerji təhlükəsizliyinin aradan qaldırılması üçün çox böyük sərmayələr yatırdı. Daha sonra daxili bazarı təmin etməklə yanaşı xaricə də Azərbaycan qazının və neftinin ixrac edilməsi üçün bir çox layihələri həyata keçirdi. “Xəzər Neft və Qaz Sərgisi” bu rolu uğurla həyata keçirməkdədir”. Bu sözləri açıqlamasında deputat Naqif Həmzəyev deyib.
Onun sözlərinə görə, ilk dəfə olaraq Gürcüstanın Qara dənizdə olan “Subsa” limanına birinci neft-boru kəməri çəkildi: “Bunun vasitəsilə Azərbaycan öz neftini ixrac etməyə başladı. Daha sonra “Şahdəniz” yatağında qazın istismar edilməsi ilə bağlı işlərə başlanıldı. 2006-cı ildə Xəzər dənizini Aralıq dənizi ilə birləşdirən Bakı-Tiflis-Ceyhan neft boru kəməri işə salındı. 2007-ci ildə Bakı-Tiflis-Ərzurum qaz boru kəməri istifadəyə verildi. Hazırda hər iki boru vasitəsilə Azərbaycan nefti və qazı ixrac olunur.
Cənub Qaz Dəhlizi bizim fərəhləndiyimiz, qürurlandığımız layihələrdən biridir. Məhz bu qaz dəhlizi vasitəsilə Azərbaycan qazı Avropaya nəql edir. Artıq ötən ildən etibarən 22 milyard kub metr təbii qazın ixracı baş tutub. Bu il isə 24 milyard kub metr qazın ixrac ediləcəyi düşünülüb. Göründüyü kimi bu çox böyük və önəmli layihədir. Bütün bunlarla yanaşı biz unutmamalıyıq ki, Azərbaycan qazına ehtiyac çoxalıb. Ancaq qaz ixracının bir gün ərzində artırmaq olmur. Bunun üçün danışıqlar, görüşlər keçirilməli və tərəfdaşlar tapılmalıdır. Bununla əlaqədar bir çox şirkətlər və Avropa İttifaqı ilə Azərbaycanın çox uğurlu işgüzar görüşləri baş tutur. Bu gün bir çox qurumlar və təşkilatlar investisiya fondları və bankları Azərbaycanın icra etdiyi beynəlxalq layihələri dəstəkləyir və bu layihələrin maaliyyələşdirilməsində aktiv iştirak edirlər. Hazırda Avropa Azərbaycan qazına çox ehtiyac duyur. Biz düşünürük ki, bu ehtiyacları qarşılamaq üçün Azərbaycanın gücü və potensialı var. Azərbaycan çox etibarlı tərəfdaşdır və bu günə qədər verdiyi bütün sözləri yerinə yetirib. Bu da Azərbaycanın etibarlı tərəfdaş imicini günü-gündən artırmaqdadır”.
Deputat fikirlərinə davam edərəl həmçinin qeyd edib ki, Azərbaycan dünyanın aparıcı enerji şirkətləri ilə əməkdaşlıq edir: “Biz günəş və külək enerjisi ilə əlaqədar bir çox işlər görürük. Azərbaycanın şaxələndirilmiş ixrac marşrutları var. Müxtəlif istiqamətlərə 3 neft boru kəməri və 4 qaz boru kəməri mövcuddur. Bu gün Azərbaycan 4 qonşu ölkəyə elektrik enerjisi ixrac edir. Göründüyü kimi Azərbaycanın ixrac marşrutları çoxşaxəlidir. Azərbaycanın SOCAR və BP şirkətləri ilə də tərəfdaşlığı mövcuddur. Məhz Azərbaycanda 27-ci Beynəlxalq Xəzər Neft və Qaz sərgisinin bu il keçirilməsi Azərbaycanın enerji resurslarının dünyaya çıxarılması, tərəfdaşların tapılması və yeni müqavilələrin imzalanması üçün bir imkandır”.