Bakıda son zamanlar çox sayda yeni yaradılan “coffeshop”larda 14-15 yaşlı uşaqlar çalışır.
Bu fikirləri Milli Məclisin deputatı Naqif Həmzəyev mayın 17-də parlamentdə İnsan alverinə qarşı mübarizə üzrə Milli Koordinatorun illik məlumatının müzakirəsi zamanı çıxışında deyib.
O bildirib ki, əksər “cofeeshop”larda vəziyyət eynidir: “Hətta sahibkara yaxınlaşıb bunun səbəbini soruşanda həmin uşaqların valideynlərinin olmadığını və yardım üçün bunu etdiyini dedi. Bu məsələlərin həlli yolları tapılmalıdır".
"Hətta Bakıda kütləvi yerlərdə uşaqlar vasitəsilə lotereyaların satışı da təşkil edilir. Bu da yaxşı hal deyil. Bir tərəfdən problemlərin həll olunduğunu görsək də, digər tərəfdən başqa məsələlər ortaya çıxır”, - deputat qeyd edib.
Onun sözlərinə görə, cinayətlərin böyük əksəriyyəti sosial şəbəkələrdə baş verir: "Bu cür cinayətlərə qarşı sosial şəbəkələrin fəaliyyətinə diqqətlə yanaşmaq lazımdır. Çünki müəyyən etmək olmur ki, qarşıdakı real istifadəçidir ya yox. Bu sahədə qanunvericilik tərəfi gücləndirməliyik. Vətəndaşları şəxsiyyət vəsiqələri ilə sosial şəbəkələrdən istifadəyə məcbur etməliyik. Əks təqdirdə bu məsələlərdə irəliləyiş əldə olunmayacaq".