ABŞ Konqresinin Nümayəndələr Palatasının üzvü Frank Fallon ABŞ-nin Ermənistana təhlükəsizlik və humanitar sahədə dəstək verməsinin vacibliyini vurğulayıb. Amerikanın Ermənistana hərbi dəstəyi və Rusiyanı bu ölkədən sıxışdırmağa çalışması cəhdlərində yenidən Azərbaycan bəhanə kimi göstərilib. Konqresmen Qarabağın "işğal” edildiyini deməkdən çəkinməyib.
Ermənistan müdafiə nazirinin müavini də erməni ordusunun modernləşməsi üçün Pentaqondan yardım istəyib.
Millət vəkili Naqif Həmzəyev açıqlamasında deyib ki, Ermənistanın havadarları Azərbaycanın regionda yaratdıqları yeni reallığı qəbul etmək istəmirlər.
Deputatın sözlərinə görə, həm sülhdən dəm vururlar, həm də regionda sülhün olmasını istəmirlər: "Hətta Ermənistanın belə dəstəkləmədiyi fikirləri səsləndirərək ermənilərə dəstək nümayiş etdirirlər. Əslində burada hədəf və məqsəd erməni lobbisinin dəstəyini və səsini növbəti seçkilərdə qazanmaqdır. Bu baxımdan Amerika Birləşmiş Ştatlarında ermənipərəst konqresmenlərin fəallığının nə ilə əlaqədar olması hər kəsə aydındır. Ermənidən çox ermənilik edən konqresmenlər Qarabağın "işğal" edildiyini səsləndirirlər. Azərbaycanın suveren hüquqlarını pozur, İranın həyata keçirdiyi bu siyasəti dəstəkləmək istəmirlər. Azərbaycan əslində BMT tərəfindən tanınan sərhədlərini, suverenliyini bərpa edib. Bunu qəbul etmək istəməyən konqresmenlər regionda yeni münaqişəni alovlandırmaq, uzunmüddətli sülhün qarşısını kəsmək istəyirlər”.
N.Həmzəyevə görə, ikinci hədəf isə Rusiyanın bölgədən sıxışdırılaraq çıxarılmasıdır. Ukraynada Rusiyaya qarşı açıq mübarizədən çəkinən Qərb dairələri Moskvaya qarşı Cənubi Qafqazda "savaşırlar". Rusiyanın isə asanlıqla Ermənistanı kimsə vermək niyyəti yoxdur. İlk növbədə Ermənistan KTMT üzvüdür. Orada Rusiyaya məxsus hərbi bazalar var. Ermənistanın bir çox qurumları Rusiyanın nəzarətindədir. Yəni Rusiyanın buradan sıxışdırılaraq çıxarılması mümkünsüzdür.
Müsahibimizin qənaətincə, istənilən halda Ermənistana hərbi yardım etmək təklifini irəli sürən konqresmenlər Fransadan sonra ermənilərin silahlandırılmasına dəstək nümayiş etdirirlər: "Bu silahlandırma regionda yeni bir münaqişənin yaranmasına səbəb ola bilər. Çox təhlükəli bir oyundur. İnanıram ki, Azərbaycanın irəli sürdüyü, üstəgəl "3+3" formatında həyata keçirilən görüşləri, Ermənistanın reallıqları dərk etməsi prosesi davam etdiriləcək. Ermənistana başa salınmalıdır ki, 1000 kilometrlərlə uzaqda bu regionun problemlərini həll etmək mümkün deyil. Azərbaycan Ermənistanla uzunmüddətli və dayanıqlı sülhün imzalanmasını istəyir. Ermənistan söz verir, ancaq real addımlar atmır".
Naif Həmzəyev: Konqresmenlər Fransadan sonra ermənilərin silahlandırılmasına dəstək nümayiş etdirirlər
Deputat hesab edir ki,əgər İrəvan səmimi olarsa, Türkiyə və Azərbaycana ərazi iddialarından əl çəkərsə, münasibətlərin yaxşılaşdırılmasına doğru addımlayarsa, Ermənistanın bu regionda inkişaf etməsi və Ermənistan xalqının daha yaxşı gələcəkdə yaşaması mümkün olacaq. Əks təqdirdə Ermənistan özünü beynəlxalq layihələrdən və regional layihələrdən təcrid edəcək. Okeanın o tayından Ermənistan lobbisinin təsiri altında dəstək nümayiş etdirənlər yalnız kiçik qrantlar ayıracaqlar: "Bu isə dayanıqlı inkişaf demək deyil. Region dövlətləri də, qlobal güclər də Azərbaycanın gücünü qəbul edirlər. Xüsusilə də Şuşa bəyannaməsindən sonra Azərbaycanın əldə etdiyi imkanlar, Türk Dövlətləri Təşkilatının birlik nümayiş etdirməsi Azərbaycanın gücünə güc qatır. Azərbaycanın suverenliyi təhdid altına almaq istəyən xarici güclər niyyətlərni reallaşdıra bilməyəcək".