Dünən Zəfər Gününün 3-cü ildönümü münasibətilə bir sıra tədbirlər həyata keçirildi. Bunların içərisəndə ən önəmlisi Xakəndidə keçirilən Zəfər Paradı oldu. Prezident İlham Əliyev paradda çıxış etdi.
Prezident Xabkəndidən dünyaya bəzi mesajlar verdi?
Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, Prezident İlham Əliyevin Xankəndidə Zəfər Günü ilə əlaqədar Qələbə Paradını qəbul etməsi böyük tarixi hadisədir:
“Bu, elə bir tarixi hadisədir ki, tək regiona yox, bütün dünyaya birbaşa öz təsirini göstərir. Bəşəriyyətin müasir tarixində beynəlxalq hüququ öz ərazimizdə tətbiq etdik. Beləliklə, öz ərazi bütövlüyümüzü və suverenliyimizi bərpa etdik. Bu, öz-özlüyündə vacib məsələdir. Ona görə ki, dünya çox böyük dərd içərisindədir. O dərdin adı islamafobiyadır, terrorizm və insanlıq əleyhinə cinayətlərdir. Bu məsələləri regionda müalicə etmək üsulunu Azərbaycan dünyaya nümayiş etdirdi. Əsas nüans məsələlərin həll edilməsinin mümkünlüyüdür. Əgər xalq-iqtidar birliyi varsa, mümkün olmayan nəsə yoxdur".
Komitə sədri "Azərbaycan müharibə istəmir" mesajının ədalətin təntənəsi olduğunu vurğulayıb:
"Bu,çox böyük məsələdir. Müharibə torpaqların işğaldan azad olunması, onun separatçılardan təmizlənməsi ilə nəticələndi. Sözügedən mesaj apardığımız müharibənin ədalətli və qanuni olmasından xəbər verir. Lakin ədalətsiz müharibə bitmir. Ədalətsiz müharibə aparan tərəf nəsə əldə etdikdə, daha başqa bir şeyə nail olmaq istəyir. Məhz buna görə Ermənistan özünün qazdığı quyuya düşdü. Qarabağı işğal etdi, dayana bilmədi, Qarabağətrafı rayonları da işğal etdi. Bununla da kifayətlənməyən qarşı tərəfin, yəni Ermənistanın müdafiə naziri sosial şəbəkələrdə yayılan görüntülərdə yeni əraziləri ələ keçirməli olduqlarını söylədi. Biz isə qarşıya qoydumuz məsələlərin hamısını həll etdik. "Biz qarşımıza qoyduğumuz məsələlərin hamısını həll etdik, artıq Azərbaycan müharibə istəmir" sözləri həm də ədalətin tətənəsi ilə bağlı məsələdir".
Milli Məclisin deputatı Naqif Həmzəyev isə vurğulayıb ki, Prezident İlham Əliyevin paradda çıxışı zamanı həm dosta, həm də düşmənə mesaj verib:
"Zəfər Gününün 3-cü ildönümünü tamam fərqli qeyd etdik. 2023-cü ilin 19-20 sentyabr tarixlərində keçirilən antiterror tədbirləri ilə Xankəndi, Xocalı, Ağdərə, Xocalı, Xocavənd, Əsgəranı da işğaldan azad etdik. Beləliklə, Azərbaycan Ordusu 2020-ci ildə başladığı işə yekun vurdu, suverenliyimiz bərpa edildi. Sevindirici haldır ki, bu il Zəfər Günü münasibətilə Qələbə Paradı Xankəndidə keçirildi. Cənab İlham Əliyev paraddakı çıxışı ilə dosta, düşmənə, bir sözlə, hamıya mesajlar ötürdü. Hər kəsi maraqlandırırdı ki, nə üçün 2020-ci ildə Azərbaycan Ordusu axıra kimi döyüşüb Xankəndini, Xocalını da işğaldan azad etmədi? Cənab Prezident bunun cavabını verdi. O, müsahibələrində "Şuşasız qələbə yarımçıq olardı" sözünə işarə edərək, əslində, Xankəndisiz qələbənin tam olmayacağını bildiyini söylədi. Sadəcə zaman lazım idi. Burada bir daha Prezident İlham Əliyev "nəyi nə zaman və necə etmək lazımdır, mən bilirəm" mesajını vermiş oldu".
Naqif Həmzəyev qeyd edib ki, Prezident bir daha Azərbaycanla diqtə dili ilə danışmağın mənasız olduğunu diqqətə çatdırıb:
"Cənab Pezident bir daha dünyaya bəyan etdi ki, Azərbaycan Silahlı Qüvvələri hətta üç il əvvəlki Ordu deyil. Azərbaycan günü-gündən Ordusunu gücləndirir. Bu gün Azərbaycanla təhdid dilində danışmaq mənasızdır. Prezident bir daha silah-sursatın çox olub-olmamasından asılı olmayaraq, müharibənin taleyini həll edənlərin əsgər və zabitlərimiz olduğunu bildirdi. Zəfərdə ən böyük rolu məhz əsgər və zabitlərimiz, müharibə iştirakçıları oynayıb. Yaşasın Ordumuz, yaşasın xalqımız, uaşasın Ali Baş Komandan!
Hərbi ekspert Elxan Şıxaliyev isə vurğulayıb ki, Prezident dünənki çıxışında Azərbaycanın hərbi baxımdan hazır olduğu mesajını verib:
"Cənab Prezident dünənki paradda Zəfər Günü əsərinin necə yarandığının tarixini anladıb. Bu gündən həyata keçiriləcək "yol xəritəsi"ndən söhbət açıb. Vətən müharibəsi zamanı həm bizə, həm də Ermənistana dəstək olan ölkələrə mesajlar verildi. Yəni Azərbaycan sahədə özünün hərbi hədəflərinə nail olmasının əsaslarını göstərdi. Bundan sonra bizimlə bu coğrafiyada yaşayacaq ölkələrə necə davranmalı olduqları göstərildi. Ən vacib mesajlardan biri də Ermənistanın doğru yolda addımlaması ilə bağlıydı. Ermənistana revanşizm siyasəti yürütməmək, silahlanmamaq mesajı verildi. Eyni zamanda, Ermənistan və onun himayədarlarına Azərbaycanın həm siyasi, həm də hərbi baxımdan hazır olduğu mesajı verildi".
Ekspert söyləyib ki, Xankəndidəki zəfərimizlə arxayınlaşmayacağımızın mesajı da verilib:
"Prezident hərbçilərə təşəkkür etdi. Silahlı Qüvvələrimizin modernləşməsi və güclənməsinə maksimum dəstəyin, lazımi maliyyə vəsaitinin veriləcəyini bildirib. Bu o deməkdir ki, biz hələ Ermənistanla atəşkəs vəziyyətindəyik. Atəşkəs vəziyyətində olmaq hər an şərti sərhəddə müəyyən qüvvələrin Ermənistanı cəsarətləndirməsi, nəticədə, şərti sərhəddə lokal təxribatların baş verə biləcəyi anlamına gəlir. Bunun da böyük çaplı əməliyyatlara çevrilmə təhlükəsi var. Ermənistandan gözləntilər ondan ibarətdir ki, tez bir zamanda sülh sazişinə imza atsın. Bunun üzərindən də iki ölkə arasında münasibətlər tənzimlənsin. Ermənistan buna hazır görünmür. Bir az da özünü qalib dövlət kimi aparır. Təkliflər göndərir, şərtləri müzakirə edir. Bu, qəbuledilməzdir. Bundan sonra müdafiə və təhlükəsizlik konspesiyalarımızı daha da möhkəmləndirməyə davam edəcəyik. Çünki qlobal güclərin dünyada münaqişə çıxarmaq cəhdi üzərinə Yaxın Şərqdə, Rusiya-Ukrayna arasında müharibələri görürük. Ona görə də Ermənistan üzərindən Cənubi Qafqazda da münaqişənin yaranmasında maraqlı tərəflər olacaq. Ona görə də tam hazırlıqlı olmalıyıq".