“17 oktyabr 2020-ci il tarixi çox yadda qalan bir tarixdir. Çox təəssüflər olsun ki, həmin gün Ermənistan tərəfindən növbəti terrorun şahidi olduq”. Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, iki ik öncə bu gün Gəncə şəhərinə uzaqmənzilli raket atıldı və dinc sakinlərin yaşadığı ərazidə daha böyük miqyasda dağıntılar oldu: “Həmin gün bütün Azərbaycan və türk dünyasının ürəyi Gəncə ilə döyünürdü. Hər kəs Gəncənin dərdinə şərik oldu. Məhz həmin gün qəhrəman əsgərlərimiz Gəncənin qisasını Füzuli şəhərini işğaldan azad etməklə aldılar. Göründüyü kimi ermənilərdən fərqli olaraq Azərbaycan əsgərləri və zabitlərimiz dinc sakinlərə deyil, məhz əli silah tutan ermənilərə qarşı vuruşdu. Uzun illərdir ki, işğal altında qalan Füzulini azad etdik. Füzulinin işğaldan azad edilməsi növbəti zəfərlərimizi şərtləndirdi. Terrorun baş verdiyi gündən iki il keçməsinə baxmayaraq hələ də dünya ictimaiyyəti ermənilərin azərbaycanlılara qarşı törətdiyi terrorla bağlı heç bir bəyanat verməyib və münasibət bildirməyiblər. Təbii ki, bu terrorla bağlı cinayət işi qaldırılıb. Ancaq dünya ictimaiyyətinin bu məsələlərdə iki standartlarla yanaşması onu deməyə imkan verir ki, biz prosesləri vaxtilə necə həll etmişiksə, əlbəttə ki, indi də edəcəyik”.
