Türkiyədə internet mediada yalan və dezinformasiya xarakterli məlumatların yayılmasına qarşı qanunun tələbləri sərtləşdirilib. Qanuna əsasən, təşviş, qorxu və çaxnaşma yaratmaq məqsədilə çaşdırıcı məlumat yayanları həbs cəzası gözləyir. Bununla yanaşı, internet saytlarına bir sıra yeni qaydalar tətbiq olunub.
Qardaş ölkənin təcrübəsinin Azərbaycanda tətbiqini dəstəkləyənlər qanunvericiliyə dəyişiklik edilməsini təklif edirlər.
Qeyd edək ki, bundan öncə Milli Məclisdə bir neçə dəfə deputatlar tərəfindən oxşlar məsələ qaldırılıb, sosial şəbəkələrin hüquqi tənzimlənməsinin vacibliyi irəli sürülüb.
Mövzu ilə bağlı danışan deputat Naqif Həmzəyev sosial şəbəkələrlə əlaqədar müəyyən addımların atılmasına ehtiyac olduğunu düşünür. Özü də aktiv sosial şəbəkə istifadəçisi olan deputat bildirib ki, hər kəsin kimliyi platformalarda açıq olmalıdır:
“Sosial şəbəkələr insanların həyatında mühüm yer tutur. Orta statistikaya nəzər yetirsək, gün ərzində ən azı 3-4 saat hər birimiz sosial şəbəkələrdə vaxt keçiririk. Bu baxımdan, əvvəl xoşagəlməz hadisələr, cinayətlər normal həyatda baş verirdisə, indi istər-istəməz sosial şəbəkələrin də payına belə hadisələr düşməkdədir. Sosial şəbəkələrin mənfi tərəfləri ilə yanaşı, müsbət tərəfləri də var. Bizi təbii ki, mənfi tərəfləri narahat edir. Dünyanın ən inkişaf etmiş ölkələrində sosial şəbəkə cinayətləri, dələduzluqları, dezinformasiyaların yayılması halları geniş yayılıb. Azərbaycanda da bu qəbildən çoxlu hadisələrə rast gəlirik.
44 günlük Vətən müharibəsi ərəfəsində internet ümumiyyətlə məhdudlaşdırıldı. Hədəf bu idi ki, dezinformasiyaların, yanlış məlumatların ötürülməsinin qarşısı alınsın. Müharibədən sonra da sosial şəbəkələrdəki təhlükəsizlik məsələləri əsas problemlərimizdən biri olaraq qalmaqdadır. Təəssüf ki, kimliyi bəlli olmayan, anonim adlarla insanları təhqir edən, yalan məlumat yayan dövlət təhlükəsizliyini və milli təhlükəsizliyi təhdid edən hallarla rastlaşırıq.
Məsələn, elə dünən sosial şəbəkə seqmentində yayılan xəbərə görə, Şuşada Vaqifin böyük heykəli qoyulacaq. Böyük müzakirələr, fikir ayrılıqları yarandı. Sonra məlum oldu ki, ümumiyyətlə, belə bir layihə mövcud deyil. Göründüyü kimi, mütəmadi olaraq, təhlükəsizlik tədbirlərini artırmalıyıq. Çalışmalıyıq ki, sosial şəbəkə istifadəçilərinin real kimlikləri bəlli olsun, milli təhlükəsizliyi təhdid edən halların qarşısının alınması üçün təxirəsalınmaz tədbirlər görülsün”.
Deputat Azərbaycanda sosial şəbəkələrə qarşı yanaşmaların sərt olmadığını hesab edir:
“Bizdə fikir, söz azadlığı var və kifayət qədər sosial şəbəkələrdən azad şəkildə istifadə edən, tənqidi fikirlər səsləndirən blogerlər fəaliyyət göstərirlər. Amma zamanla inkişaf etmiş ölkələrin təcrübələrindən istifadə edərək, təhdidlərin və təhqirlərin qarşısını ala bilərik. Bu, həm Azərbaycan dilinin qorunması, həm milli təhlükəsizliyin təmin edilməsi, həm də sosial media vasitəsilə yanlış informasiya sayəsində gündəmin dəyişdirilməsinin önlənməsi deməkdir. Beləliklə, sosial şəbəkə istifadəçilərinin hüquqlarını qorumaq da mümkündür”.