Fransanın ölkəmizə qarşı qərəzli addımları davam edir.
Belə ki, Paris Şəhər Şurası Fransa hökumətini Azərbaycana qarşı sanksiyalar tətbiq etməyə çağırıb. Həmçinin, Şura Azərbaycanın guya Ermənistana “təcavüz” etdiyini bildirib və öz aləmində bunu pisləyən qətnamə qəbul edib.
Qeyd edək ki, Fransa son illərdə açıq şəkildə Ermənistana dəstək verir. Xüsusilə rəsmi Parisin 44 günlük Vətən müharibəsindəki qələbəmizi həzm edə bilmədiyi konkret olaraq görünür. Fransa tərəfinin ölkəmizlə bağlı təxribat xarakterli addımlar atması və açıq-aydın ermənipərəst mövqedən çıxış etməsi də bunun təzahürüdür.
Milli Məclisin deputatı Naqif Həmzəyev açıqlamasında bildirib ki, əslində Fransa Ermənistandan daha çox ermənilik edir:
“Rəsmi Paris hazırda Türkiyənin bölgədə artan nüfuzu qarşısında İrəvana dəstək verməklə erməni lobbisinin dəstəyini almaq istəyir. Təəssüflər olsun ki, həm 44 günlük Vətən müharibəsində, həm də münaqişənin baş verdiyi müddətdən indiyə kimi Fransa ilə Ermənistanın havadarları tərəfindən həmişə bu cür saxta və həqiqəti əks etdirməyən yanaşmalar görmüşük. Lakin bunlar söz yığınından başqa bir şey deyil. Əslində dünya ictimaiyyəti həqiqətin nə olduğunu bilir. Təəssüflər olsun ki, bu gün Cənubi Qafqazda Ermənistan-Azərbaycan münasibətlərinin düzəlməsini istəməyən qüvvələr var. Onlardan biri də Fransadır. Lakin Azərbaycanın yaratdığı reallıqlar fonunda biz özümüz beynəlxalq ictimaiyyətin üz qarası olaraq tərəf tutan Fransa və onun kimi qüvvələrin cavabını 44 günlük Vətən müharibəsində vermişik”.
Millət vəkili vurğulayıb ki, Avropa İttifaqı Şurasının Prezidenti Şarl Mişelin moderatorluğu ilə sülhə çox yaxınlaşmışıq:
“Ancaq 30 ilə yaxın müddət ərzində ATƏT-in Minsk qrupu kimi işəyaramaz qurumun həmsədrlərin biri olan Fransa sülhün baş tutmasın həzm edə bilmir. Paris özünün rəhbərliyi və təzyiqi altında proseslərin icra olunmasını istəyir. Lakin bu mümkün deyil. Çünki Azərbaycanın mövqeyi qat-qat güclənib və yaratdığımız yeni reallıqlar fonunda öz istəklərimizi diqtə edə bilirik. Düşünürəm ki, Fransanın sərgilədiyi bu siyasətin yalnız və yalnız özünə ziyanı olacaq. Onların atdığı addımlar və verdiyi bəyanatlar sadəcə arxivdə qalacaq. Azərbaycan öz yolunda davam edəcək və sülhə məcburetmə siyasətini uğurla həyata keçirərək Ermənistan ilə ermənipərəst qüvvələri haqq yoluna gətirəcək”.