"2020-ci ilin oktyabr ayında 44 günlük Vətən müharibəsinin gedişində Ermənistan Azərbaycanın əldə etdiyi uğurları zərərsizləşdirmək, döyüşün gedişatını dəyişmək və Azərbaycan ictimaiyyətində çaxnaşma və qorxu yaratmaq üçün Birinci Qarabağ müharibəsindəki siyasəti təkrarladı". Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, 44 günlük Vətən Müharibəsinin gedişində döyüş zonasından uzaqda yerləşən Gəncə, Mingəçevir, Bərdə, Goranboy və Naftalan kimi rayon və şəhərləri raket və bombalarla atəşə tutdu: "Çoxlu sayda dinc sakinlərimiz şəhid oldu və mülki vətəndaşlarımız yararlandı. Bir sözlə, Ermənistan öz məkrli və xain əməllərini 44 günlük Vətən müharibəsində bir daha göstərdi. Gəncə şəhəri də əsas hədəflərdən biri idi. Çox təəssüflər olsun ki, Gəncəyə çoxlu sayda raket hücumları oldu. Əsasən 5 raket hücumu nəticəsində 26 Gəncə sakini şəhid oldu, çoxlu sayda gəncəlilər yaralandı. Biz hələ də bu hafisələrin ağrısını, acısını, travmasını unuda bilməmişik. Xüsusilə də azyaşlı uşaqlar hələ də baş vermiş hadisələrin travmasını yaşayırlar. Azərbaycan dövləti müharibənin, xüsusilə də Gəncə terrorunun yaratdığı fəsadları ən qısa zamanda aradan qaldırmağa çalışdı".
Naqif Həmzəyev fikirlərinə davam edərək həmçinin qeyd edib ki, zərər çəkmiş insanlara dövlət tərəfindən müavinətlər verildi və birdəfəlik yardımlar göstərildi: "Bütün bunlara baxmayaraq, hələ də bu terroru törədən şəxslərin qanun qarşısında cavab vermədiyinin şahidi oluruq. Beynəlxalq ictimaiyyət, demokratiya və insan haqlarından danışan tə.kilatlar 44 günlük Vətən müharibəsindən əvvəl və sonra Azərbaycan ərazisində törədilmiş erməni hərbi cinayətlərini görməzdən gəlirlər. Məhz işğaldan azad olunmuş ərazilərdə kütləvi məzarlıqların tapılması da onu deməyə imkan verir ki, Ermənistan tərəfi hərbi cinayətlər törədib və bu gün də törətməkdədir".