"Bu gün demokratiyadan, insan hüquqlarından danışan beynəlxalq təşkilatlar Vətən müharibəsi dövründə Ermənistanın Azərbaycan şəhərlərində törətdiyi hərbi cinayətləri görməzdən gəlirlər".
Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, 2020-ci ilin oktyabr ayında 44 günlük Vətən müharibəsinin gedişatı zamanı Ermənistan Azərbaycanın əldə etdiyi hərbi uğurların qarşısını almaq, döyüşün gedişatını dəyişmək və Azərbaycan ictimaiyyətində çaxnaşma, qorxu yaratmaq üçün birinci Qarabağ müharibəsində əl atdıqları siyasəti və əməlləri təkrarlayıb:
"Belə ki, müharibə zonasından kənarda yerləşən Gəncə, Mingəçevir, Bərdə, Goranboy, Naftalan kimi şəhər və rayonlarımız uzaqmənzilli raketlərlə atəşə tutuldu. Çox sayda dinc sakinlərimiz şəhid oldu, mülki vətəndaşlarımız yaralandı. İctimai iaşə obyektləri, evlər darmadağın edildi. Bir sözlə, Ermənistan öz məkrli və xain əməllərini 44 günlük Vətən müharibəsində bir daha nümayiş etdirdi. Təəssüflər olsun ki, Gəncə şəhəri əsas hədəflərdən biri idi".
Deputat Gəncə şəhərinə atılan 5 raket hücumu nəticəsində 26 Gəncə sakininin şəhid olduğunu və çox sayda şəxsin isə yaralandığını xatırladıb:
"Biz bu gün də həmin faciənin yaratdığı ağrı, acını unuda bilməmişik. Xüsusilə Gəncə şəhərindən olan azyaşlı uşaqlar hələ də baş verən acı hadisələrin travmasını yaşamaqdadırlar. Dövlətimiz müharibənin, eyni zamanda Gəncə terrorunun yaratdığı fəsadları ən qısa zamanda aradan qaldırmağa çalışdı və zərərçəkmiş insanlara müvainət verildi, yardımlar göstərildi. Onların ev, mənzil şəraiti yaxşılaşdırıldı. Yaşayış yerlərini tamamilə itirmiş sakinlər yeni mənzillərlə təmin olundular. Bütün bunlara baxmayaraq Azərbaycan xalqına qarşı terror törədən Ermənistanın hərbi-siyasi rəhbərliyinin qanun qarşısında cavab vermədiyini təəssüflə qeyd etməliyik".
Deputat vurğulayıb ki, bu gün demokratiyadan, insan hüquqlarından danışan beynəlxalq təşkilatlar Azərbaycan ərazilərində törədilmiş Ermənistanın hərbi cinayətlərini görməzdən gəlirlər:
"Məhz işğaldan azad edilən torpaqlarımızda kütləvi məzarlıqların tapılması da onu deməyə əsas verir ki, Ermənistan tərəfinin Azərbaycan xalqına qarşı etnik təmizləmə siyasəti 30 ildən çoxdur ki, davam edir. Azərbaycan ərazilərinə yeni istehsal olunmuş minaların basdırılması da bu əməllərdən bir qismidir. Biz beynəlxalq ictimaiyyəti haqq-ədalət savaşında Azərbaycanın yanında olmağa, Ermənistana sanksiyalar tətbiq etməyə və erməni cinayətkarlarını cəzalandırmağa çağırırıq”.