“30 illik işğal müddətində hər dəfə ölkəmizə qarşı ikili standartların, səsləndirilən ədalətsiz və qərəzli mövqeylərin şahidi olmuşuq. Təəssüflər olsun ki, Azərbaycanın 44 günlük müharibədə tarixi Zəfər qazanmasını həzm edə bilməyən dairələr, bu reallıqdan məyus olanlar hələ də ölkəmizə qarşı qarayaxma kampaniyası aparır, təxribat xarakterli bəyanatlarla çıxış edirlər. Yaxın günlərdə onlardan biri- Rusiya Dövlət Dumasının bədnam deputatı Konstantin Zatulin növbəti dəfə ölkəmizin ərazi bütövlüyünə və beynəlxalq hüquq normalarına hörmətsizlik nümayiş etdirdi. O, qondarma "Arsax Respublikası xalqına Respublika Günü” münasibətilə təbrik ünvanlayıb. Onun ermənipərəst mövqeyi, erməni xalqına olan sevgisi bir daha bu məktubda öz əksini tapıb”.
Bunu açıqlamasında deputat Naqif Həmzəyev deyib. Deputat xüsusilə vurğulayıb ki, Zatulin Rusiyanın ali qanunverici orqanında əhalisinin böyük bir qisminin ermənilər olduğu Soçi şəhərini təmsil edir:
“Bu isə bilavasitə olaraq, Konstantin Fedoroviçin niyə mütəmadi olaraq Azərbaycana və onun ərazisinə qarşı sərt bəyanatlara yol verdiyini izah etməyə kifayətdir. Zatulinin qondarma Dağlıq Qarabağ Respublikasına göndərdiyi təbrik məktubu onun Azərbaycana qarşı etdiyi ilk bədnam əməl deyil. O, əvvəllər dəfələrlə Ermənistan tərəfindən işğal olunmuş Azərbaycan torpaqlarına qanunsuz səfərlər edib. Zatulinin bu xoşagəlməz əməlləri sivil cəmiyyət tərəfindən pislənsə də, o, hər zaman erməni lobbisinə xidmət edərək onların leyhinə bəyanatlar səsləndirməyi sevir.
Qəribəsi də odur ki, hakim “Vahid Rusiya” Partiyasını təmsil edən Zatulinin fikirləri qətiyyən ölkənin ali rəhbərliyinin siyasi mövqeyi ilə üst-üstə düşmür. Rusiya Prezidenti Vladimir Putin dəfələrlə öz bəyanatlarında və keçirdiyi mətbuat konfranslarında Dağlıq Qarabağ ərazisinin beynəlxalq hüquq nöqteyi-nəzərindən Azərbaycanın ayrılmaz bir hissəsi olduğunu vurğulayıb. Diqqətlə araşdırsaq görərik ki, bu ermənipərəst deputat sadəcə Azərbaycanla bağlı deyil, ümumiyyətlə, keçmiş SSRİ ölkələri haqqında tez-tez təxribat xarakterli bəyanatlarla çıxış edir. O yaxın günlərdə Qazaxıstanla mümkün ərazi məsələləri ilə bağlı təxribat xarakterli bəyanatına görə Vahid Rusiya Partiyasının katibi, Federasiya Şurasının sədr müavini Andrey Turçakdan töhmət alıb”.
N.Həmzəyev əlavə edib ki, Zatulin və onun kimi Azərbaycan xalqına, Azərbaycanın ərazi bütövlüyünə hörmətsiz münasibət bəsləyən digər şəxslər rəsmi Moskva tərəfindən cəzalandırılmalı, Vahid Rusiya Partiyası rəhbərliyi tərəfindən tənbeh edilməlidir:
“Ekstrimizm, terrorçuluq, işğalçılıq ideyalarını dəstəkləyən bu cür təxribat xarakterli çıxışlar beynəlxalq hüquq normalarının pozulması kimi qiymətləndirilməli, Zatulin və onun simasında digər dövlət rəsmilərinin Azərbaycanın ərazi bütövlüyünə qarşı siyasi hücumları cinayət təqibi ilə nəticələnməlidir”.