“Biz artıq ikinci ildir, Novruz bayramını, yazın gəlişini, dədə-babadan miras qalmış, qanımıza, canımıza işləmiş milli bayramımızı fərəh hissi ilə, sevinclə qarşılaya bilirik. Şükürlər olsun ki, ötən il Prezident İlham Əliyev və Birinci vitse-prezident Mehriban Əliyeva Novruz bayramını Şuşada, bu il isə Suqovuşanda qarşıladı. Prezident xalqımızı oradan təbrik etdi. Həqiqətən də XXI əsrdə hər xalqa, dövlətə nəsib olmayan bir xoşbəxtlik bizə nəsib olub, torpaqlarımızı işğaldan azad etmişik. Hazırda Qarabağda, Şərqi Zəngəzurda abadlıq-quruculuq işlərinin şahidi oluruq. Bu qələbəni bizə yaşadan bütün şəhidlərə Allahdan rəhmət diləyirəm, qazilərimizə şəfa arzu edirəm. Sevinirik ki, dövlətimiz hər bir vətəndaşının yanındadır”.
Bunu açıqlamasında Milli Məclisin deputatı Naqif Həmzəyev bildirib.
N.Həmzəyev qeyd edib ki, Azərbaycan dövləti bir milyona yaxın keçmiş məcburi köçkünün dədə-baba yurdlarına qayıtması üçün Prezident İlham Əliyevin rəhbərliyi altında gecə-gündüz işləyir, hökumət bütün tapşırıqları layiqincə yerinə yetirir: “Biz qlobal gərginlik, münaqişələr, toqquşmalar fonunda ölkəmizdə sabitliyin, inkişafın şahidi oluruq. Bütün dünyanın gözü Azərbaycandadır. Bu gün Azərbaycan Avropanın enerji təhlükəsizliyində çox mühüm rol oynayır. Gördüyünüz kimi, dünya liderləri, böyük dövlətlərin rəhbərləri cənab Prezident İlham Əliyevə təbrik məktubları göndərirlər. Azərbaycan dünya dövlətləri sırasında layiqli yerini tutub. Əminəm ki, bundan sonra da ölkəmiz inkişaf edəcək, Prezident İlham Əliyevin rəhbərliyi altında daha böyük zəfərlərə imza atacağıq. Dünya Azərbaycanlılarını, bütövlükdə türkləri Novruz bayramı münasibətilə təbrik edirəm. Gün o gün olsun ki, tarixi torpaqlarımızda da bayramı fərəh hissi ilə, sevinclə qeyd edək. Ən qısa zamanda Novruz tonqallarımızın Xankəndidə, Xocalıda və digər şəhərlərimizdə, kəndlərimizdə alovlanmasını arzu edirik. Allah bizi bu arzumuza çatdırsın”.