“Bakı-Gəncə-Bakı sürət qatarlarının hərəkətinin bərpası ilə bağlı xəbər hər kəsi, o cümlədən bütün gəncəliləri sevindirib. COVID-19 pandemiyası ilə əlaqədar sürət qatarının fəaliyyətinə məhdudiyyət qoyulmuşdu. Seçicilərin bu məsələ ilə bağlı arzu və istəklərini aiddiyyatı qurumlara bildirmiş və Milli Məclisin plenar iclaslarında səsləndirmişdik. Nəhayət ki, Novruz bayramı ərəfəsində bu xoş xəbəri ala bildik”.
Bunu Pravda.az-a açıqlamasında Milli Məclisin deputatı Naqif Həmzəyev deyib.
Deputat sürət qatarının bərpa olunmasında əməyi və əziyyəti keçən hər kəsə, o cümlədən “Azərbaycan Dəmir Yolları” Qapalı Səhmdar Cəmiyyətinin sədri Cavid Qurbanova dərin təşəkkürünü bildirib: "Arzu edirik ki, cənab Prezident İlham Əliyevin həyata keçirdiyi uğurlu daxili və xarici siyasətin nəticəsi olaraq tezliklə belə sürət qatarları ilə Xankəndiyə səfər edə bilək. O günləri səbirsizliklə gözləyirik. Yeri gəlmişkən, qarşıdan gələn Novruz bayramı münasibətilə bütün Azərbaycan xalqını ürəkdən təbrik edirəm”.