“Ermənistan vaxtı uzadaraq vəziyyəti öz xeyrinə dəyişməsi üçün fürsət gözləyir. Azərbaycan postmünaqişə dövründə real addımlar atılacağını gözləsə də, Ermənistan prosesi ləngidir. Ona görə də rəsmi Bakı 5 bənddən ibarət sülh təklifini irəli sürüb. Həmin təkliflər Azərbaycanın Ermənistanla münasibətlərinin normallaşdırılması, sərhədlərin tanınması və sülh sazişinin imzalanması kimi məsələləri əhatə edir. Təəssüf ki, Ermənistanın xarici işlər naziri Ararat Mirzoyanın 5 bəndlik təkliflə bağlı səsləndirdiyi fikirlər ortaya müəyyən təzadlar çıxarıb. Sual yaranır ki, əgər Ermənistanın Dağlıq Qarabağla bağlı hansısa iddiası yox idisə, ötən 30 il ərzində bu əraziləri niyə işğalda saxlamışdılar?! Ermənistanın İkinci Qarabağ müharibəsində rüsvayçı məğlubiyyətlə üzləşməsindən və kapitulyasiya aktını imzalamasından sonra status məsələsinə yenidən qayıtması aydın və anlaşılan deyil”.
Bunu Pravda.az-a açıqlamasında Milli Məclisin deputatı Naqif Həmzəyev deyib.
N.Həmzəyevin sözlərinə görə, Prezident İlham Əliyev dəfələrlə qeyd edib ki, status məsələsi tarixdə qalıb və Azərbaycan öz gücü hesabına BMT-nin 4 qətnaməsini yerinə yetirərək ərazi bütövlüyünü bərpa edib: “Bütün proseslər Azərbaycanın tam nəzarətindədir və biz regionun diqtə edən, əməkdaşlığa maraq göstərən dövlətlərindənik. Bu gün Ermənistanın prosesi uzatması onun ziyanına işləyir. Təklifləri müxtəlif bəhanələrlə geri çevirən Ermənistan yaxın gələcəkdə Azərbaycanla danışığa gəlmək və regionda yaratdığımız iqtisadi imkanlardan istifadə üçün etmək yalvaracaq. Görünən odur ki, proseslər uzanacağı təqdirdə, Azərbaycan bu təkliflərini də Ermənistan üçün bağlaya bilər. Nəzərə almaq lazımdır ki, Azərbaycan regionda uzunmüddətli sülhə və əmin-amanlığa nail olmaq niyyətindədir. Ermənistan da bununla əlaqədər tələsməli, sülh təklifini bir daha nəzərdən keçirməli və ən qısa zamanda müsbət cavab verməlidir. Əks halda, onlar regionda baş verən proseslərdən, xüsusilə də iqtisadi layihələrdən tamamilə kənarda qalacaqlar. Ermənistan xalqı da ölkə rəhbərliyini sülh danışıqlarını sürətləndirmək üçün tələsdirməlidir”.