Bu gün gənclərin seçiminin Yeni Azərbaycan Partiyası olmasının arxasında dövlətçiliyə bağlılıq, milli mənafenin qorunması kimi müqəddəs amallar dayanır. Çox sevindirici haldır ki, partiya sıralarına axın edən gənclərimiz həm özlərinin ictimai fəaliyyətləri üçün çox geniş meydan əldə edir, həm də Azərbaycan cəmiyyətinin inkişafına töhfələrini vermək imkanı qazanırlar.
Bunu YAP Gəncə şəhər təşkilatının sədri, millət vəkili Naqif Həmzəyev təşkilatın Gənclər Birliyinin onlayn formatda keçirilən yığıncağında bildirib.
Könüllə gənclərin də qatıldığı tədbirdə YAP Gəncə şəhər təşkilatı Gənclər Birliyinin son 1 ildəki fəaliyyətinə nəzər salınıb, öz siyasi fəaliyyətlərini Yeni Azərbaycan Partiyası ilə bağlayan gənclərin daim öndə olduğu layihələrdən, tədbirlərdən bəhs edən videoçarx nümayiş etdirilib.
Tədbirdə o da qeyd olunub ki, COVID-19 pandemiyasına qarşı aparılan mübarizə tədbirlərində, qəbul edilən qərarların müsbət nəticələrindən, əldə edilən uğurlarda, eləcə “gözəgörünməz düşmən”ə qarşı aparılan profilaktik və qabaqlayıcı tədbirlərdə partiya fəallarının xüsusi rolu olub: ”Gənclərimiz sosial həmrəylik nümayiş etdirmələri üçün bütün imkanlardan istifadə etdilər. Sosial şəbəkələrdə, yaşadıqları ərazilərdə, əhali arasında virusdan qorunmağın yolları barədə tövsiyələr verməklə görülən işlərin daha səmərəli nəticə verməsinə töhfələrini verirlər”.
Millət vəkili Naqif Həmzəyev vurğulayıb ki, hər bir Azərbaycan vətəndaşı, o cümlədən YAP Gəncə şəhər təşkilatının üzvləri, fəalları, gənc könüllüləri istər pandemiyaya qarşı mübarizədə, istərsə də torpaqlarımızın azadlığı uğrunda mübarizə çərçivəsində Prezident İlham Əliyevin yürütdüyü daxili və xarici siyasəti birmənalı şəkildə dəstəkləyirlər və öz töfələrini əsirgəmirlər.
Sonra partiyanın ictimai-siyasi həyatında fəal iştirak edən könüllü gənclər mükafatlandırılıb.