“Baş verənlərdən doğru-düzgün nəticə çıxartmayan separatçılar Qarabağa qayıtmaq üçün xaricdən dəstək alırlar, yeni təxribatlar planlayırlar”.
Bunu Qərbi Azərbaycan İcması Gənclər Şurasının üzvü, deputat Naqif Həmzəyev ləğv edilmiş separatçı rejimin sonuncu başçısı Samvel Şahramanyan təxribatçı iddialarına münasibət bildirirkən deyib.
Onun sözlərinə görə, separatçı tör-töküntülər bəzi kənar dairələrin təhrikilə İrəvan-Bakı arasında sülh prosesini pozmağa, Cənubi Qafqazda vəziyyəti gərginləşdirməyə çalışırlar:
"Qərbi Azərbaycandan didərgin salınmış yüzminlərlə azərbaycanlının öz dədə-baba torpaqlarına qayıtmaq hüquqlarını da Ermənistan tərəfi tanımaq istəmir. Bugünədək Ermənistanın siyasi rəhbərliyi Qərbi Azərbaycanlıların doğma yurdlarına qayıtması ilə bağlı müraciətlərinə cavab verməyib. Özlərində cəsarət tapıb bu hüququn bərpası ilə bağlı heç bir münasibət bildirməyiblər. Ermənistanın son dövrdə həm separatçıların aktivləşməsinə göz yumması, onların fəaliyyətinə imkan verilməsi, paralel olaraq erməni tərəfinin silahlanması, Qərbi Azərbaycanlıların hüquqlarının bərpasının görməzdən gəlinməsi nəticə etibarı ilə bizim bu məsələdə daha aktiv olmağımızı zəruri edir. O baxımdan Qərbi Azərbaycan mühacir hökumətinin yaradılması hüququnu özümüzdə saxlayırıq. Həmçinin, Milli Məclisdə Qərbi Azərbaycana qayıdışla bağlı xüsusi komissiyanın yaradılması da zamanında atılmış addım olar".
Naqif Həmzəyev: Baş verəmlər bizim daha aktiv olmağımızı zəruri edir
Müsahibimiz vurğulayıb ki, Qərbi azərbaycanlıların öz yurdlarına geri dönüşü nəyin bahasına olur-olsun bərpa edilməlidir:
"Faktiki olaraq Ermənistanın yerləşdiyi ərazilər tarixi Azərbaycan torpaqlarıdır. Ermənilər Azərbaycana məxsus ərazilərdə yaşasalar da, bizə xəyanət etdilər, arxadan zərbə vurdular, torpaqların əsl sahiblərini qovdular, üstəlik ərazilərimizi də 30 il işğal altında saxladılar. Qərbi Azərbaycandan deportasiya edilmiş yaşlı insanlarımız hələ də öz yurdlarının həsrətini çəkirlər, geri dönüşü gözləyirlər. Nə qədər insanımız bu həsrətlə dünyadan köçdü. Ona görə də beynəlxalq hüququmuzu önə sürərək, dinc şəkildə öz yurdumuza qayıdıb, orada sülh şəraitində yaşamaq istəyirik. Qərbi Azərbaycanlıların bu hüquqlarının bərpası üçün sonadək mübarizə aparacağıq".
Qeyd edək ki, ləğv edilmiş separatçı rejimin sonuncu başçısı Samvel Şahramanyan yenidən təxribatçı iddialarından danışıb. O, hələ də hansısa statusla Qarabağa qayıtmaq ümidlərini itirmədiklərini deyib. Şahramanyan təkcə qayıtmaqdan yox, təxribatçı iddialarını daha da şişirdərək yenidən Qarabağı işğal etməkdən bəhs edib.