“Rusiya-Ermənistan münasibətlərinin soyuqluğu fonunda Azərbaycan rusiyalı sülhməramlıları öz ərazilərindən çıxarılmasını təmin etməklə, bir növ İrəvana da ismarış göndərmiş oldu”.
Bunu açıqlamasında Milli Məclisin deputatı Naqif Həmzəyev deyib.
Millət vəkili bildirib ki, əgər İrəvan 2020-ci ildə imzalanan üçtərəfli bəyanatın müddəlarını bu dəfə də yerinə yetirməkdən boyun qaçırarsa, bu, Ermənistana çox baha başa gələcək:
“Çünki bədnam qonşularımız bu müddətə qədər üçtərəfli qaydada imzalanan sənədin müddəalarını yerinə yetirmək istəmədi. Nəticə etibarı ilə Ermənistan daha çox ziyan tapdı. Ancaq rus sülhməramlılarının da Azərbaycan torpaqlarından çıxarılması mümkün olduğu halda, İrəvan verdiyi sözü yerinə yetirmirsə, yenidən güc tətbiq etməyə, təxribat törətməyə meyillənirsə, bu o deməkdir ki, Azərbaycan bunu Ermənistana bağışlamayacaq. Rusiyalı sülhməramlıların Azərbaycan ərazisindən çıxarılmasından bir neçə gün sonra Ermənistan ilkin mərhələdə Azərbaycanın anklav olmayan 4 kəndinin qaytarılmasına razılıq verdi".
Millət vəkili düşünür ki, bu hadisə Ermənistanın son proseslərdən doğru-dürüst nəticə çıxarmasına bir işarədir:
"Hərçənd ki, işğalçı ölkənin havadarları Ermənistanı cəsarətləndirir və onlar İrəvanla Bakı arasındakı sülh prosesini ləngidə bilirlər. Ancaq buna baxmayaraq, İrəvanda yaxşı anlayırlar ki, bu dəfə Ermənistan tərəfindən danışıqlar prosesinə hər hansı bir xələl gətirilərsə, danışıqlar prosesi süni şəkildə uzadılarsa, verilən söz yerinə yetirilməzsə, o zaman bu işğalçı dövlətə çox baha başa gələcək”.