"44 günlük Vətən Müharibəsi zəfərlə başa çatdıqdan sonra Ermənistan kapitulyasiya aktını imzalamaq məcburiyyətində qaldı. Təəssüf ki, üç il yarım ərzində üçtərəfli bəyanatın müddəaları Ermənistan tərəfindən yerinə yetirilmədi. İrəvan hər dəfə təxribatlara əl atdı. Nəticə etibarilə bu təxribatlar Ermənistana baha başa gəldi. Xüsusilə, Ermənistanla Azərbaycan arasında müxtəlif moderatorların iştirakı keçirilən görüşlərdə, aparılan üçtərəfli formatlarda Bakının prinsipiallıq nümayiş etdirməsi və İrəvanı sülhə məcbur etmə əməliyyatını uğurla həyata keçirməsi nəticə etibarilə işğalçı ölkənin Azərbaycanın ərazi bütövlüyü tanıdığını, ölkəmizə qarşı ərazi iddialarından əl çəkdiyini və Qarabağ məsələsinin onlar üçün bitdiyini dəfələrlə dilə gətirdilər".
Bunu açıqlamasında Milli Məclisin deputatı Naqif Həmzəyev deyib.
Millət vəkili xatırladıb ki, 2023-cü ilin sentyabr ayının 19-da və 20-də Azərbaycanın həyata keçirdiyi birgünlük anti-terror tədbirlərindən sonra regionda bir çox məsələlərin həlli yekunlaşdı:
"Azərbaycan öz suverenliyini tam olaraq bərpa etdi. Faktiki olaraq üçtərəfli bəyanatda göstərildiyi kimi Azərbaycan ərazilərində yerləşdirilmiş rusiyalı sülhməramlıların mandatına uyğun missiyası demək olar ki, başa çatdı. Hərçənd ki, 2025-ci ilə qədər bu mandatın müddəti var idi. Ancaq tərəflər arasında, xüsusən Azərbaycan ərazisində yaşayan erməni əsilli əhali ilə münasibətləri tənzimləməkdə mandat sahibi olan sülhməramlılar faktiki olaraq sentyabr ayının 20-dən sonra bu missiyanı yerinə yetirmək üçün birtərəfli durumda qalmalı oldu. Çünki faktiki olaraq erməni əsilli əhali könüllü olaraq bu torpaqları tərk etdi. Azərbaycan Silahlı Qüvvələri isə həmin əraziləri mərhələli şəkildə nəzarətə götürdü. Ordumuz həmin ərazilərdə təhlükəsizliyi tam şəkildə təmin etdi. Rusiyalı sülhməramlıların vaxtından əvvəl oradan çıxarılmasına start verilməsi Rusiyanın və Azərbaycanın ali rəhbərliyi arasında əldə edilmiş razılıq əsasında həyata keçirildi".
Deputatın yanaşmasına görə, bu da Moskva ilə Bakı arasındakı münasibətlərin qarşılıqlı etimad əsasında qurulduğunu və şimal qonşumuzun verdiyi sözü tutduğunu bir daha göstərdi:
"Eyni zamanda, hazırkı dövrdə rus sülhməramlılarının Azərbaycan ərazilərindən çıxarılması fonunda Bakı ilə Moskva arasında hər hansı bir narahatlığın baş verməməsi də Azərbaycan diplomatiyasının uğuru kimi dəyərləndirilməlidir. Bu, birbaşa cənab prezidentin daxili və xarici siyasətinin məntiqi nəticəsidir. Bundan başqa, Azərbaycan rus sülhməramlılarını öz ərazisindən çıxarılmasına nail olmaqla bir daha Ermənistana və onun havadarlarına, ümumiyyətlə, bütün dövlətlərə sübut etmiş oldu ki, Azərbaycan regionda yeni reallıqlar yaradıb. Bu reallıqlar fonunda Azərbaycan öz gücünə güc qatır. Ən əsası, rəsmi Bakı prosesləri öz nəzarətində saxlayır. Azərbaycan öz müttəfiqləri, qonşuları, əməkdaşlıq etdiyi dövlətlərlə və beynəlxalq təşkilatlarla qarşılıqlı etimad əsasında münasibətlərini davam etdirir. Azərbaycan verdiyi sözə əməl edir, eyni zamanda qarşı tərəfdən də verdiyi sözün tutulmasını tələb edir, nəticə etibarilə Bakı regionda dayanıqlı sülhü əldə etmək yolunda əsas tərəf olduğunu bütün dünyaya göstərir".