“Azərbaycan Prezidenti İlham Əliyev Gəncəyə səfəri zamanı İdman Sarayının açılışını etdi. Bu, çox möhtəşəmdir.”.
Bunu millət vəkili Naqif Həmzəyev deyib.
Nizami (Gəncə) İkinci seçki dairəsindən deputat seçilən Həmzəyev bildirib ki, Gəncənin 2025-ci ildə Müstəqil Dövlətlər Birliyinin (MDB) idman paytaxtı elan edilməsini sevinclə qarşılayıb.
Onun sözlərinə görə, III MDB Oyunlarına gələn il ev sahibliyi edəcək şəhərdə artıq hazırlıq işləri görülür: “Burada demək olar ki, beynəlxalq standartlara uyğun çoxlu idman zalları var. Gəncədə, həmçinin ölkə başçısı tərəfindən stadionun təməli qoyuldu. Bu da o deməkdir ki, biz məhz lll MDB oyunlarının keçiriləcəyi ərəfəyə qədər müasir dövrün tələblərinə cavab verən, beynəlxalq standartlara uyğun stadionun açılışının şahidi olacağıq. Gəncənin yaxınlığında - Göygöldə Olimpiya İdman Kompleksinin və digər qonşu ərazilərdəki idman komplekslərinin olması mötəbər tədbirlərin keçirilməsi ixtiyarında olduğumuzu sübut edir. İnanıram ki, MDB oyunlarına çox nümunəvi şəkildə ev sahibliyi edəcəyik. Gəncənin təcrübəsi var, çünki bu şəhər bir çox beynəlxalq yarışlara ev sahibliyi edib. İnanırıq ki, bunun da öhdəsindən layiqincə gələcəyik. 2016-ci ildə Avropanın gənclər paytaxtı məhz Gəncə olub. Bu ərəfədə də şəhərimizdə çoxlu sayda beynəlxalq, yerli və regional tədbirlər təşkil edilib. 2017-ci ildə Gəncə MDB-nin mədəniyyət paytaxtı, 2019-cu ildə Avropanın İdman şəhəri seçilib. Bütün bunları nəzərə alsaq, Gəncənin yaxşı təcrübəsi var”.
Qeyd edək ki, Gəncə MDB Xarici İşlər Nazirləri Şurasının Minskdə keçirilən iclasında idman paytaxtı elan olunub.