İranın fars-molla rejimi İsrailin hücumlarının heyfini başqa ölkələrdən çıxmaq arzusundadır.
Məlum olduğu kimi, aprelin 1-də Suriyaya hava hücumu nəticəsində İranın Dəməşqdəki konsulluğunun binası dağılıb, zabitlər ölüb. İran rəsmiləri İsrailə çox sərt cavab veriləcəyini açıqlasalar da, daha çox üçüncü dövlətləri suçlamağa başlayıblar.
Tehran hökumətinin ittiham etdiyi ölkələr arasında ABŞ və Qərb dövlətləri ilə yanaşı, Azərbaycan da var. Hətta İran əndazəni o qədər aşıb ki, parlamentdəki deputatlar açıq-aşkar çıxışlarında Azərbaycandakı İsrail səfirliyini vurmağı, ölkəmizdə teraktlar keçirməyi belə təklif ediblər. Azərbaycana qarşı qarayaxma kampaniyasında əsas rolu SEPAH-a bağlı kütləvi informasiya vasitələri oynayır. SEPAH-a bağlı mənbələr İsrailin Zəngilandakı “mərkəzini vurmağ"ı da təklif ediblər.
Millət vəkili Naqif Həmzəyev açıqlamasında deyib ki, İranla Azərbaycan münasibətlərində normallaşmaya doğru getdiyimiz bir anda SEPAH-ın təsirində olan İran siyasətçiləri və rəsmiləri tərəfindən sərsəm fikirlər səsləndirilir.
Deputat diqqətə çatdırıb ki, bu yanaşma İran-Azərbaycan münasibətlərini gərgin vəziyyətdə saxlamağa hədəflənib:
"Bu məsələdə ermənipərəst siyasətçilərin çoxluq təşkil etməsi də gözdən yayınmır. Hərçənd, Ermənistan özü də İran-Azərbaycan münasibətlərinin normallaşmasının əleyhinədir. İrəvan üçün ən optimal variant odur ki, İranla Azərbaycanın münasibətləri gərgin qalsın. Ermənistan da öz maraqlarını həyata keçirə bilsin. Əfsuslar olsun ki, İsraillə açıq mübarizədən çəkinən İran rəsmiləri hədəfi yayındırmağa çalışırlar. Azərbaycan üzərindən hansısa çirkin oyunların oynanılmasını dilə gətirirlər”.
Müsahibimiz xatırladıb ki, 44 günlük Vətən müharibəsindən sonrakı dövrdə də bu cür sərsəri fikirlər səsləndirilirdi. Onun sözlərinə görə, amma cəsarətləri çatıb Azərbaycan ərazisində hansısa xoşagəlməz hadisələr törədə bilmədilər:
“Çünki əmin idilər ki, buna cəhd etsələr də, Azərbaycanın peşəkar təhlükəsizlik orqanları tərəfindən qarşısı dərhal alınacaq. O baxımdan İsrailə cavab vermək iqtidarında olmayan İranın Azərbaycandan heyif almaq niyyəti absurd və əhəmiyyətsizdir. Azərbaycan Silahlı Qüvvələri və Dövlət Təhlükəsizlik Xidməti prosesləri tam nəzarətdə saxlayır".
Naqif Həmzəyev: İsrailə cavab vermək iqtidarında olmayan İranın Azərbaycandan heyif almaq niyyəti absurddur
N.Həmzəyev qeyd edib ki, Azərbaycanda hansısa terror aktının törədilməsi və ölkəmizdə fəaliyyət göstərən İsrail səfirliyinin hədəfə alınması o qədər də asan məsələ deyil:
"Bu, dövlət təhlükəsizliyi məsələsidir. İranda sərsəm fikirlər səsləndirən rəsmilərlə yanaşı, proseslərə soyuq başla baxan və Azərbaycanın regionda nə dərəcədə önəmli rol oynadığını və gücə sahib olduğunu bilənlər də var. İranın bəzi rəsmilərinin hədələri həyasızcasına söylənmiş içi boş sözlərdən başqa bir şey deyil. Ümid edək ki, bu cür təxribat yönümlü fikirlər səsləndirənlərin cəzasını İran hökuməti özü verəcək. İran-Azərbaycan münasibətlərində yenidən gərginliyə ehtiyac qalmayacaq".