Qərbi Azərbaycan İcmasında Göyçə mahalının Basarkeçər rayonunun alimləri ilə görüş keçirilib.
Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərov iclası açıq elan edərək əvvəlcə 7 fevral növbədənkənar prezident seçkilərində qazandığı növbəti möhtəşəm qələbə münasibətilə ölkə başçısı cənab İlham Əliyevi Qərbi Azərbaycan İcmasının üzvləri, bütün dünyadakı Qərbi azərbaycanlılar adından səmimi qəlbdən təbrik etdi, daha qüdrətli Azərbaycan naminə atacağı hər bir addımda böyük uğurlar arzuladı.
Sədr Qərbi Azərbaycana qayıdışın bu gün Azərbaycan xalqının ümummilli məsələlərindən olduğunu, ata-baba torpaqlarına qayıdışın soydaşlarımızın ən ümdə amalı olmasını, Basarkeçər rayon icmasının da bu müqəddəs niyyət uğrunda Qərbi Azərbaycan İcmasının ətrafında birləşdiyini vurğuladı.
Basarkeçər rayon icmasının sədri, Azərbaycan Milli Elmlər Akademiyasının müxbir üzvi Nuru Bayramov çıxış edərək alimlərin kəndlər üzrə statistik məlumatlarını təqdim etdi. O, Basarkeçər rayonu üzrə 232 dosent, 72 professor, 2 müxbir üzv və 1 akademik olmaqla ümumilikdə 307 alimin olduğunu bildirdi.
Qərbi Azərbaycan İcması Ağsaqqallar Şurasının sədri, Milli Məclisin Səhiyyə komitəsinin sədri, akademik Əhliman Əmiraslanov Göyçə mahalından olan elm adamlarına xüsusi diqqətin göstərilməsindən bəhs etdi. O, vikipediyada Qərbi azərbaycanlı elm adamlarının geniş məlumatlarının yerləşdirilməsi, Basarkeçər rayonu ilə bağlı yaradılacaq sayt haqqında fikirlərini bölüşdü.
Qərbi Azərbaycan İcması Gənclər Şurasının üzvü, Milli Məclisin deputatı Naqif Həmzəyev Basarkeçər rayonu ilə bağlı nəzərdə tutulan veb-saytda kəndlər üzrə fotolar, elmi məqalələr və rayonun tarixi, mədəniyyəti ilə bağlı məlumatların yer alacağını bildirdi. Millət vəkili sözügedən məlumatların Qərbi Azərbaycanın tarixi, folkloru, toponimləri və s. barədə çox mühüm əhəmiyyətə malik olacağını vurğuladı.
Qərbi Azərbaycan İcmasının Aparat rəhbəri, sənətşünaslıq üzrə fəlsəfə doktoru Qalib Qasımov Basarkeçərin tarixinin, toponimlərinin, folklorunun sistemli şəkildə araşdırılmasının önəmindən bəhs etdi. O vurğuladı ki, Qərbi Azərbaycanın bütün guşələri kimi Basarkeçər də özünün zəngin irsi ilə seçilir: “Təəsüf ki, ötən əsrdə dörd dəfə baş verən deportasiyalar irsimizə də öz ağır təsirini göstərmiş olub, mədəniyyətimiz də acı qaçqınlıq taleyi ilə üzləşib”.
Qərbi Azərbaycan İcması İdarə Heyətinin üzvü, Milli Məclisin deputatı Aydın Mirzəzadə Basarkeçərlə bağlı araşdırmaların sayının artırılmasının önəmindən danışdı. Bu araşdırılmaların aparılmasında hər bir Qərbi Azərbaycanlının verə biləcəyi töhfələri vurğuladı.
Berlin Azad Universitetinin müəllimi, siyasi elmlər dotktoru Rizvan Nəbiyev bildirdi ki, Qərbi Azərbaycana qayıdış istiqamətində siyasət, hüquq, tarix sahəsində çalışan alimlərin alman həmkarları ilə birlikdə tədqiqatlar aparması çox müsbət nəticələr verə bilər. R.Nəbiyev alman alimlərin Qərbi Azərbaycan İcmasına dəvət olunması və onlarla birgə müzakirələrin aparılması kimi təkliflərini səsləndirdi. O, alman alim Mixael Hessin Ermənistanın Azərbaycana təcavüzü, eyni zamanda deportasiyalar, sürgünlərlə bağlı əsərlərin müəllifi olduğunu vurğulayaraq, Şuşanın irsi ilə bağlı 1500-dən çox sitatın yer aldığı kitabı İcmanın kitabxanasına bağışladı.
Azərbaycan Tibb Universitetinin müəllimi, Nərimanlı kənd icmasının sədri Şirazi İbrahimov bildirib ki, Qərbi Azərbaycandan deportasiya olunanların qaçqınlıq statusu saxlanılsa da onlara vaxtilə şamil olunan bəzi imtiyazlar ləğv olunub. O təklif edib ki, Qərbi Azərbaycan kökənli gənclər ödənişli şərtlərlə ali məktəblərə qəbul olunduğu təqdirdə onların təhsilhaqqı dövlət tərəfindən ödənilsin. Ş.İbrahimov əvvəllər belə bir güzəştin olduğunu xatırladaraq, bunun Milli Məclisdə deputatlar tərəfindən yenidən gündəmə gətirilməsini xahiş edib.
Qərbi Azərbaycan İcması Qadınlar Şurasının üzvü, Azərbaycan Milli Elmlər Akademiyasının müxbir üzvü Könül Bünyatzadə, K.Fəracova adına Elmi-Tədqiqat Pediatriya İnstitutunun direktoru, professor Nəsib Quliyev, Azərbaycan Dövlət Neft və Sənaye Universitetinin İnformasiya texnologiyaları və idarəetmə fakültəsinin dekanı Fərid Ağayev də çıxış edərək təkliflər səsləndiriblər.