“Azərbaycan dövlətinin son 20 ildə əldə etdiyi bütün uğurlar Prezident İlham Əliyevin adı ilə bağlıdır və bu uğurlardan ən mühümü heç şübhəsiz 44 günlük Vətən müharibəsində əldə edilən tarixi qələbədir. O vaxt Ali Baş Komandanın 30 illik işğal problemini həll edəcəyi, ərazi bütövlüyümüzü təmin edəcəyi bəziləri üçün inanılmaz görünsə də, dövlət başçısı bunu özünəməxsus qətiyyət və əzmlə həll etdi. Sübut etdi ki, o, Azərbaycan xalqının dəstəyi ilə istənilən problemin öhdəsindən gəlməyə qadirdir ”.
Bunu açıqlamasında millət vəkili Naqif Həmzəyev bildirib. Millət vəkili qeyd edib ki, xalqın 7 fevral seçkilərində bir daha Müzəffər Ali Baş Komandanın namizədliyini müdafiə etməsi ciddi mətləblərdən xəbər verir:
“Bu gün hər bir azərbaycanlı yaxşı başa düşür ki, müasir dünyamızda yeni çağırış və yeni yanaşmaların öz həllini tapması İlham Əliyevin liderliyi ilə mümkündür. Məhz onun təcrübəsi və səriştəsi bizim gələcək uğurlarımızı təmin edə bilər. Məhz bütün bunları nəzərə alan Azərbaycan xalqı öz liderinə səs verdi. Əslində seçki öncəsi keçirilən sorğuların nəticəsi də göstərirdi ki, xalq İlham Əliyevə etimad göstərir. Ancaq etiraf etməliyik ki, insanların seçkidə bu cür fəal şəkildə və bu qədər yüksək əhval-ruhiyyə ilə iştirak edəcəyi bir çoxumuz üçün gözlənilməz idi.
Mən xalqımızı doğru seçiminə görə təbrik edirəm. Inanıram ki, biz yeni dövrdə qarşımıza çıxan bütün məsələləri uğurla həll edə biləcəyik. Azərbaycan regionun aparıcı dövləti statusunu qorumaqla yanaşı, daha da güclənəcək, yeni uğurlara nail olacaq”.