"Avropa Şurası Parlament Assambleyasının Azərbaycana, Azərbaycan nümayəndə heyətinə qarşı sərgilədiyi münasibət dəyişməlidir". Bu sözləri açıqlamasında deputat Naqif Həmzəyev deyib.
O, bildirib ki, qərəzdən, Ermənistanın haqsız mövqeyini müdafiə etməkdən əl çəkməlidirlər: "Düşünürəm ki, gec, ya da tez AŞPA rəhbərliyi buraxdıqları səhvi anlayacaqlar. Onlar Azərbaycan nümayəndə heyətinə, Azərbaycana qarşı qərəzdən əl çəkəcəklər. İkili standartlara son qoyacaqlar. Belə olacağı təqdirdə AŞPA ilə münasibətlərimizin yenidən əvvəlki məcraya qayıtması mümkün ola bilər. Hər şey AŞPA-nın mövqeyindən asılıdır. Azərbaycan da AŞPA və Avropa təsisatlarından ədalətli mövqe gözləyir. Ümid edək ki, onlar öz səhvlərini düzəldəcəklər. Azərbaycanın daxili işlərinə qarışmaqdan, Ermənistanı haqsız müdafiə etməkdən, Azərbaycana haqsız yerə təzyiq mexanizmini gücləndirməkdən daşınacaqlar. Onların atacaqları bu addımdan sonra münasibətlərin əvvəlki vəziyyətinə qayıtmasından danışa bilərik.
Azərbaycan sentyabr ayında suverenliyini bərpa etdikdən sonra Azərbaycana qarşı Avropa Şurası Parlament Assambleyası tərəfindən çox sərt və təxribat xarakterli mövqe sərgiləyənməyə başladı. Azərbaycan əleyhinə yanlış qərarlar verildi. Xüsusilə, Qarabağda yaşayan erməni əsilli əhalinin Ermənistana getməsi ilə əlaqədar yanlış fikirlər səsləndirildi. Azərbaycanı bu prosesdə təqsirkar çıxarmağa çalışdılar. Ermənistanı müdafiə etməklə yanaşı beynəlxalq ictimaiyyətdə yanlış fikrin yaranmasına səbəb oldular. Azərbaycanda növbədənkənar prezident seçkilərinin elan edilməsindən sonra Azərbaycana qarşı bu mövqe daha da sərtləşdi. Onlar konkret olaraq Azərbaycana, keçirilən seçkilərə qarşı təxribat xarakterli planlar qurdular. Bizə qarşı olan münasibət doğru deyil, ikili standartlardan xəbər verirdi. Onlar uzun illər idi ki, sülhün olmasını dilə gətirirdilər. Azərbaycan öz gücü hesabına Cənubi Qafqazda sülhü bərqərar etdikdən sonra onlar sanki buna qarşı çıxdılar. Azərbaycanın güclənməsini, söz sahibi olmasını, yeni reallıqlar yaratmasını həzm edə bilmədilər".
"Bundan əvvəl də Azərbaycana qərəzli mövqe sərgilənmişdi. AŞPA-da Fransanın təsiri ilə bu mövqe daha da gücləndirildi. Azərbaycan bu təxribatların qarşısını aldı. Azərbaycan nümayəndə heyəti AŞPA-da fəaliyyətini müvəqqəti dondurdu. Azərbaycan nümayəndə heyəti tərəfindən verilmiş bəyanatda da bütün məsələlər öz çılpaqlığına qədər əksini tapıb. AŞPA mövqeyini mütləq dəyişməlidir. Belə olacağı təqdirdə münasibətlərin yenidən bərpa edilməsi mümkün ola bilər. Eyni zamanda Azərbaycan kimlərinsə diktəsi, təzyiqi ilə hərəkət etməyi sevmir. Əgər bu təxribatlar davam edərsə, Azərbaycan tərəfindən fərqli yanaşmalar sərgilənə bilər. Azərbaycanda keçirilən növbədənkənar prezident seçkiləri AŞPA və digər Avropa təsisatlarının təxribatlarına çox yaxşı cavab oldu. Azərbaycan xalqı öz seçimini etdi, xalq qalib liderinə səs verdi. Öz liderini yenidən prezident seçdi. Əldə edilən nəticə, seçkidəki aktivlik bütün təxribatlara çox praktik cavab oldu. Avropa təsisatları, xüsusilə də, AŞPA bu mövqeyi gördükdən sonra Azərbaycana qarşı mövqeyinə mütləq dəyişiklik etməlidir. Ermənistandan çox erməni mövqeyi sərgiləmək, heç Paşinyanın da edə bilmədiyini etmək absurddur və birbaşa təxribatdır" - deyə deputat əlavə edib.