2024-cü il fevralın 7-də keçirilən prezident seçkilərində Yeni Azərbaycan Partiyasının namizədi İlham Əliyev bir daha inamlı qələbə qazandı. Qalib xalq ərazi bütövlüyü və suverenliyi təmin olunmuş ölkənin vətəndaşı olaraq qalib Liderinə – şanlı Zəfərin müəllifinə səs verməklə Heydər Əliyev ideyalarına sədaqət, cənab İlham Əliyevə minnətdarlıq ifadə etdi.
Hakim Yeni Azərbaycan Partiyasından deputat Naqif Həmzəyev bildirib ki, Azərbaycan xalqı Azərbaycana zəfər qazandıran, ölkənin suverenliyini bərpa edən Prezident İlham Əliyevə bir daha öz etimadını göstərdi: “Biz inanırıq ki, növbəti müddətdə cənab Prezident Azərbaycan qarşısında duran digər məsələləri də uğurla həll edəcək və Azərbaycanın gücünə güc qatacaq. İlkin nəticələrə görə, cənab Prezident qalibdir və mən bu münasibətilə Azərbaycan xalqını və cənab İlham Əliyevi ürəkdən təbrik edirəm”.
Deputat qeyd edib ki, Azərbaycan regionun lideri statusunu qoruyub saxlamaqla yanaşı azərbaycanlıların sosial rifahı daha da yaxşılaşacaq: “Bütün bu məsələləri yalnız cənab İlham Əliyev bacara bilərdi və buna görə də Azərbaycan xalqı ona növbəti dəfə etimadını göstərdi”.
N.Həmzəyev hesab edir ki, seçki nəticələrinə heç kimin və heç bir şübhəsi ola bilməz.