Yanvarın 27-də Azərbaycan Respublikasının İrandakı səfirliyinə hücum edən şəxsin cinayət işi üzrə məhkəmə iclası keçirilib. Məhkəmə iclası təqsirləndirilən şəxs və onun vəkillərinin iştirakı ilə keçirilib. İran Ədliyyə Nazirliyi qərarla bağlı məlumat yayıb. Məlumatda bildirilir ki, səfirliyə hücum edən şəxs barəsində edam hökmü çıxarılıb.
Bəs bu qərar necə dəyərləndirilməlidir? Qərar səfirliyimizə hücumun arxasında dayanan qüvvələrin gizlədilməsinə xidmət edəcək?
Məsələ ilə bağlı danışan Milli Məclisin deputatı Azər Badamov bildirib ki, məhkəmənin səfirliyə hücumun arxasındakı qüvvələri gizlətmək üçün belə qərar verməsi mümkündür:
"Tehrandakı səfirliyimizə hücum edən şəxsin cəzalandırılması ilə bağlı İran məhkəməsi qərar verdi. Məhkəmə terrorçunun edam edilməsini qərara aldı. Lakin burada "silahlı basqında kənar əllər olubmu" sualı meydana çıxır. Təbii ki, bu cinayət əməlinin tam təfsilatını İran hüquq-mühafizə orqanları bilir. Ola bilər ki, məhkəmə bir nəfər barəsində höküm çıxarmaqla silahlı basqının arxasında dayanan digər qüvvələrin gizlədilməsinə xidmət etsin. Amma bizim üçün əsas məsələ basqını həyata keçirmiş şəxsin cəzalandırılması ilə bağlı idi".
A.Badamov söyləyib ki, növbəti mərhələdə İran dövləti səfirliyimizin əməkdaşlarının təhlükəsizliyinə zəmanət verilməsi məsələsini həll etməlidir:
"Biz İranla münasibətlərin gərgin qalmasının tərəfdarı deyilik. Azərbaycan-İran münasibətlərinin alt qatında ziddiyətlər olsa da, üst qat həmişə yaxşı olub. Bizim birgə layihələrimiz icra olunur. Bu layihələr ölkələrimizə və xalqlarımıza xeyir gətirməlidir. Qonşu dövlətlərin arasında münasibətlərin gərginləşməsi heç bir tərəfə xeyir gətirmir. Ona görə də müvafiq məsələlər öz həllini tapandan sonra Tehrandakı səfirliyimizin fəaliyyəti bərpa olunmalıdır".
Milli Məclisin digər bir deputatı Naqif Həmzəyev isə vurğlayıb ki, cinayətkar cəza alsa da, cinayətin gizlinləri açılmayıb:
"İstintaq və məhkəmə İranda aparıldığı və bizim mütəxəssislərin prosesdə iştirakı təmin edilmədiyi üçün bu haqda çox məlumatlı deyilik. Qərar İran qanunvericiliyinə uyğun verilib. Faktiki cinayət törədən şəxsə hökm oxunub. Ancaq bu cinayətdə başqa kimlərinsə əlinin olub-olmaması haqda heç bir məlumat verilmir. İstintaq heç bu istiqamətdə aparılmayıb. Bir sözlə, cinayətkar cəza alsa da, cinayətin gizlinləri açılmadı".