“Azərbaycan Ordusu Qarabağ və Şərqi Zəngəzuru işğaldan azad etdikdən sonra yeni təhlükələr ortaya çıxdı. Ermənilər ərazilərimizdə daşı daş üstünə qoymamış, bütün infrastrukturu məhv etmişdilər, yalnız bəzi binaların qalıqları mövcud idi. İkinci ən böyük problem isə ərazilərimizin minalarla çirkləndirilməsidir. Hər kvadrat metr ərazidə xeyli mina basdırılıb. Bir çox yerlərdə isə sürpriz minalar basdırılıb ki, bu da nəticə etibarilə minatəmizləmə əməkdaşlarının işini daha da çətinləşdirir. Bir sözlə, bu ərazilərin minalardan təmizlənməsi uzun illərimizi alacaq”.
Bu fikirləri açıqlamasında Milli Məclisin deputatı Naqif Həmzəyev deyib.
Millət vəkili bildirib ki, müharibə bitdikdən sonra Ermənistan tərəfi ilə aparılan danışıqlar zamanı bəzi əsirlərin dəyişdirilməsi müqabilində mina xəritələri Azərbaycana verildi:
“Ancaq sonradan məlum oldu ki, bu xəritələrin dəqiqliyi 25 faizdir. Bu baxımdan da artıq 3 ildir ki, Azərbaycan Minatəmizləmə Agentliyi tərəfindən minaların təmizlənmə prosesi sürətlə həyata keçirilir. Bəzi ərazilərimiz artıq minalardan tam şəkildə təmizlənib. Xüsusilə antiterror tədbirlərinə qədər ermənilərin kompakt yaşadığı ərazilərdə də 44 günlük Vətən Müharibəsindən sonra xeyli sayda mina meşələrdə, mülki əhalinin hərəkət etdiyi ərazilərdə basdırılıb. Ötən müddət ərzində 350 nəfərdən çox hərbi və ya mülki Azərbaycan vətəndaşı minadan xəsarət alıb, şəhid olub və ya yaralanıb. Ötən gün də bir nəfər mülki şəxs minaya düşərək həyatını itirdi. Bu, çox ağır və təhlükəli bir prosesdir”.
N. Həmzəyevin sözlərinə görə, dünyada ən çox mina ilə əraziləri çirkləndirilmiş dövlətlərdən biri Azərbaycandır:
“Azərbaycan beynəlxalq ictimaiyyəti bu məsələdə Ermənistana təzyiq etməyə çağırır. Ermənistan tərəfi də sonuncu açıqlamasında əlində həqiqətən də belə bir xəritənin olduğu mesajini vermişdir. Çox güman ki, sülh müqaviləsinin imzalanacağı təqdirdə onlar bu xəritəni Azərbaycana təqdim edəcəklər. Ancaq sülh prosesinin uzanacağı halda belə onlar bizə bu xəritəni təhvil verməlidirlər. Azərbaycan milyardlarla vəsait xərcləyərək minaların təmizlənmə prosesinə davam edir. Hesab edirəm ki, minalarla ərazilərin çirkləndirilməsi birmənalı şəkildə qadağan olunmalıdır. Xüsusilə Ermənistan tərəfindən istehsal edilən, aşkara çıxarılması çox çətin olan minaların istehsalı tamamilə dayandırılmalıdır. Çünki bu, birbaşa olaraq insan həyatını təhlükəyə atır, insan həyatı ilə bağlı müharibə qaydalarına ziddir. Ümid edirik ki, Ermənistan tezliklə haqq yoluna gələcək və düzgün, dəqiq mina xəritələrini Azərbaycana təhvil verəcək”.