"Azərbaycan 44 günlük Vətən müharibəsində qələbə qazandıqdan sonra regionda yeni reallıqlar yaratdığı beynəlxalq təşkilatlar və dövlətlər tərəfindən qəbul edilməkdədir". Bu sözləri açıqlamasında deputat Naqif Həmzəyev deyib.
Onun sözlərinə görə, bu zəfərlə həm torpaqlarını işğaldan azad etdi, həm də gücünə güc qatdı: "Üç il müddət ərzində Azərbaycan işğaldan azad olunmuş ərazilərdə Qarabağ və şərqi Zəngəzurda quruculuq, abadlıq, yenidənqurma işləri həyata keçirir. Bu ərazilər artıq canlanır. Keçmiş məcburi köçkünlər öz dədə-baba yurdlarına qayıdırlar. Bu il də bu proseslər davam edəcək. Hədəfimiz ən qısa zamanda keçmiş məcburi köçkünlərin öz torpaqlarına qayıtmasını tam şəkildə təmin edə bilməkdir. Əslində bu çox ağır işdir, çünki işğal dönəmində Ermənistan tərəfindən ərazilər tamamilə talan edilmiş, bütün infrastruktur dağıdılmış, demək olar ki, keçmiş şəhər, rayon, kəndlərdən əsər-əlamət qalmayıb. Yalnız binaların dağıntıları və keçmişdə burada yaşayan məcburi köçkünlər hansı binaların yerləşdiyini söyləyə bilirlər. Biz keçmiş foto, videolardan təxmini müəyyən edə bilirik ki, burada əvvəl nələr olub. Bu ağır və çətin işin öhdəsindən Azərbaycan dövləti uğurla gəlməkdədir. Misli görünməmiş yenidənqurma işləri həyata keçirilir, tunellər çəkilir, bütün infrastruktur yenidən qurulur, yeni yollar, beynəlxalq hava limanları tikilir. İkisi istifadəyə verilib. Laçın beynəlxalq hava limanı isə növbəti illərdə istifadəyə veriləcək. Azərbaycan ən qısa zamanda Qarabağ və şərqi Zəngəzuru cənnət məkana çevirmək və iqtisadiyyatin əsas hissəsindən birinə çevirəcəkdir. Yeni reallıqlar fonunda Azərbaycan gücünə güc qatır. Qalib ölkə olaraq Azərbaycan ordu sahəsində çox böyük islahatlar həyata keçirir. Türkiyə ordu modeli əsasında komando tipli hərbi birləşmələr formalaşdırılır. Profesional hərbiçilərdən ibarət ordu quruculuğu davam etdirilir. Biz anlayırıq ki, həmişə güclü olaraq qalmalıyıq. Heç bir dövlət, terrorist təşkilat cəsarət edib Azərbaycanın torpaqlarını, suverenliyini təhlükə altına atmamalıdır. Azərbaycan qələbə qazansa da, sülh tərəfdarıdır. Ölkəmiz həm öz, həm region dövlətlərinin təhlükəsizliyini nəzərə alaraq sülhün alternativi olmadığı fikrini də dəstəkləyir. Ermənistanı da sülhə məcbur etmək siyasətini uğurla həyata keçirir. Ermənistan sülhdən çəkinir. Ermənistanın havadarları onu silahlandırmaqla Ermənistani yeni müharibəyə hazırlamaq niyyətindədir. Azərbaycan real təhlükə hiss edəcəyi təqdirdə bu təhlükəni aradan qaldırmaq üçün bütün mümkün variantları işə salacaq".
Deputat bildirib ki, cənab prezident yerli televiziya kanallarına müsahibəsi zamanı, xüsusilə də, Ermənistanı silahlandıran Fransanın təxribatla məşğul olduğunu dilə gətirdi: "Fransa kömək etmək istəyirsə, bilməlidir ki, Ermənistanın yeganə çıxış yolu sülh müqaviləsi imzalamaq, Azərbaycana ərazi iddialarından əl çəkməkdir. İlk növbədə Ermənistan Azərbaycanın işğal altında olan 8 kəndini geri qaytarmalı, Zəngəzur dəhlizinin işə düşməsini təmin etməlidir. Ermənistan havadarlarının dəstəyi ilə təxribatyönümlü açıqlamalardan çəkinməlidir. Azərbaycan ötən il ərzində çox böyük iş bacardı. Ən əsas problemi həll etdi. Azərbaycan silahlı qüvvələrinin gücü hesabına biz torpaqlarımızı işğaldan azad etdik. Bu zəfəri Azərbaycan yeni inkişaf dövründə fərqli istiqamətlərdə istifadə edərək gücümüzə güc qaymaq istəyir. Azərbaycan prezident seçkilərini keçirdərək yeni dövrün başlanğıcı kimi bunu dəyərləndirmək istəyir. Biz inanırıq ki, Azərbaycan bütün ərazilərində prezident seçkiləri yeni dövr üçün başlanğıcımız olacaq. Hər bir Azərbaycan vətəndaşı öz məsuliyyətini dərk edərək dövlətinin yanında olaraq töhfə verməyə davam edəcək. Bizim səfərimizin sirri birliyimizdə idi. Azərbaycan regionun ən güclü dövləti statusunu qoruya biləcək".