Azərbaycan Prezidenti İlham Əliyev yanvarın 10-da yerli telekanallara müsahibəsi zaman həm ölkəmizlə bağlı, həm də region üçün əhəmiyyətli olan məsələlərə toxundu, beynəlxalq ictimaiyyətə mühüm mesajlar verdi. Dövlət başçısının səsləndirdiyi fikirlər xarici medianın da gündəminə çevrilib. Vacib mesajlardan biri də heç şübhəsiz ki, regionda sülhün yaranmasına mane olmağa çalışan, pozucu fəaliyyətlə məşğul olan qüvvələrə idi. Prezident İlham Əliyev bir daha Azərbaycana qarşı düşmənçilik siyasəti həyata keçirən və ölkəmizə qarşı təxribatçı, qərəzli mövqe tutan dövlətlərə, xüsusilə, Ermənistan və ona havadarlıq edən Fransaya öz mesajlarını ünvanladı.
Bu məqama ətraflı toxunmazdan əvvəl qeyd etmək lazımdır ki, 2 saat yarım davam edən müsahibə, dövlət başçısının bütün sualları ətraflı cavablandırması bir daha onun mediaya açıq olduğunu, tam açıq mühitin mövcudluğunu göstərdi. Bu, eyni zamanda, Azərbaycan xalqı və dünya ilə media vasitəsilə dialoqun unikal formasıdır. Yada salmaq lazımdır ki, Vətən müharibəsi zamanı da Prezident xalqla birbaşa dialoqa üstünlük verdi. Xalqa müraciətləri, tvitləri ilə müharibənin gedişi, azad edilmiş ərazilər barədə operativ məlumatları çatdırmaqla yanaşı, qərəzli qüvvələrə mesajlar ünvanladı. Həmçinin, beynəlxalq mediaya çoxsayda müsahibələri ilə Azərbaycanın haqq səsini dünyaya çatdırmaqla həm də informasiya savaşına liderlik etdi.
Bu missiya əlbəttə ki, bu gün də davam edir. Dövlət başçısı ölkəmizə qarşı qarayaxma kampaniyaları aparan, qərəzli yanaşma sərgiləyən, sülh prosesinə maneə yaradan, regionu yeni müharibəyə təhrik edən, bu məqsədlə Ermənistanı silahlandıran qüvvələrə lazımi anda mesajlarını verir.
Prezident yanvarın 10-da yerli telekanallara müsahibəsində açıq şəkildə bildirdi ki, Ermənistanı silahlandırma cəhdləri daim bizi təzyiq altında saxlamaq məqsədi daşıyır və burada da Fransa yenə də ön plandadır. Amma Azərbaycana qarşı hər hansı bir təhlükə mənbəyi olarsa, dərhal məhv ediləcək.
Sitat: “Bu gün Ermənistanı silahlandıran, onlara ürək-dirək verən, onların hərbçilərini hazırlayan və növbəti müharibəyə hazırlayan ölkə Fransadır. Ona görə mən deyəndə ki, Fransanın siyasəti Qafqazda gərginliyin artmasına səbəb olur, məhz bunu nəzərdə tuturdum. Ermənistanda yersiz illüziyalar yarana bilər ki, nə vaxtsa onlar Qarabağı yenidən bizdən qopara bilərlər. Belə fikirlər onların cəmiyyətində dolaşır, o cümlədən, rəhbər qruplaşma daxilində də belə fikirlər var. Mən istisna etmirəm ki, bu fikirlər, necə deyərlər, getdikcə daha geniş yer tutacaq. Ona görə biz heç vaxt sakitləşməməliyik və mən, xatırlayırsınızsa, İkinci Qarabağ müharibəsindən sonra demişdim və bunu da etdik, biz daha güclü ordu yaratmalıyıq. Biz son üç il ərzində böyük yol keçmişik. İndi bunların hamısını demək yəqin ki, düzgün olmaz, amma mətbuatda olan məlumat kifayətdir. Yeni silahlı birləşmələr antiterror əməliyyatında çox önəmli rol oynamışdılar, yeni texnika, yeni sursatlar, ən müasir avadanlıq... Yəni biz özümüzü daha böyük həcmdə lazım olan vasitələrlə təmin edəcəyik. Bizim ordu quruculuğu prosesi davam edəcək və Ermənistan da bilməlidir, o, nə qədər silah alsa da, onlara nə qədər ürək-dirək versələr də, əgər bizə qarşı hər hansı bir təhlükə mənbəyi olsa, biz dərhal o təhlükə mənbəyini məhv edəcəyik. Mən bunu gizlətmirəm ki, sabah heç kim deməsin nəsə gözlənilməz oldu. Qoy eşidən eşitsin ki, biz görsək, bizə qarşı real təhlükə, o Fransanın sınıq-salxaq “Bastion” maşınları, o konserv bankaları yox, real təhlükə yaransa, biz preventiv addımlarla o təhlükəni istənilən nöqtədə məhv edəcəyik”.
Fransa İkinci Qarabağ müharibəsi başlayandan Azərbaycanla münasibətləri gərginləşdirməyə başladı, ölkəmizə qarşı çirkin planlarını işə saldı. Bu məqsədlə bütün vasitələrdən istifadə etdi. Amma mənfur niyyətinə çata bilmədi, çünki qarşısındakı güclü, bu oyunları məhv etməyə qadir olan bir dövlət idi.
Dövlət başçısı müsahibəsində bu məqama toxunaraq qeyd etdi ki, onlar heç nəyə nail ola bilmədilər və müharibə prezident Makronun və ya hər hansı başqa şəxsin deyil, Putinin vasitəçiliyi ilə dayandırıldı. Üçtərəfli bəyanat da Fransa, Azərbaycan və Ermənistan arasında deyil, Rusiya, Azərbaycan və Ermənistan arasında imzalandı: “Düşünürdüm ki, bu hadisələrdən sonra münasibətlərimizdə sağlam məntiq üstün olacaq və körpülər yandırılmayacaq, çünki bu, prinsip etibarilə nə Fransaya, nə də bizə lazımdır. Hərçənd hər bir ölkə bir-birini unudaraq sakit yaşaya da bilər”.
Ancaq proseslərin davamı göstərdi ki, Makron hakimiyyəti reallığı qəbul etmək, Azərbaycanla münasibətləri normallaşdırmaq istəmir. Fransa öz qərəzini, həm də zəifliyini, acizliyini Natəvanın heykəlinə qarşı vandalizm aktı ilə bir daha ortaya qoydu. Belə ki, heykələ boya atdılar, burnun qırdılar, sellofana bükdülər. Dövlət başçısı bunu kin, gücsüzlük və isterikanın özünü heykəldə göstərdiyi mənəvi deqradasiyanın dibi adlandırıb: “Amma bundan sonra onlar artıq öz-özlüyündə vandalizm aktı olan Natəvanın heykəlinin təhqir edilməsi, onun sellofana bükülməsi, bu şəhər ilə İsmayıllı arasında qardaşlıq sazişinin ləğv edilməsi kimi lüzumsuz hərəkətlərə əl atmağa başladılar. Təbii ki, biz də adekvat cavab verirdik və indi də buna davam edirik. Amma bu, deyə bilərəm ki, artıq kin, gücsüzlük və isterikanın özünü heykəldə göstərdiyi mənəvi deqradasiyanın dibidir.
Yəni burada onlar praktik olaraq ermənilərdən az fərqlənirlər. Çünki ermənilər Natəvanın Ağdamdakı məzarını qazıblar, heykəlini məhv ediblər. Biz onu bərpa etdik, daha doğrusu, yenidən dəqiq surətini ucaltdıq. Fransa isə Natəvanın həmin ölkədə heykəlini təhqir edir. Göründüyü kimi, burada bir oxşarlıq var”.
Əlbəttə ki, tarixi fransız imperializminin müstəmləkə ölkələrində törətdiyi vəhşiliklərlə, qanlı qırğınlar, soyqırımlarla dolu olan Fransanın müasir dövrdə törətdiyi bu vandal hərəkət artıq təəccüb doğurmur. Fransanın müstəmləkə ölkələrində törətdiyi cinayətlərin sayı hesabı yoxdur. Təkcə Əlcəzairdə bir milyon yarım insanı soyqırımqa məruz qoyub, istifadə olunmayan böyük əraziləri nüvə sınaqları ilə zəhərləyib, indi də insanların həlak olduqları çoxsayda minalar basdırıb. Bu gün Fransa müstəmləkələrə sahib olmağı, onları idarə etməyi, sıxışdırmağı, viran qoyulmuş ölkələrin bu müstəmləkə zülmündən qurtulmasına imkan verməməyi adi bir hal kimi qəbul edir. Azərbaycan Qoşulmama Hərəkatında sədrliyi müddətində bu məsələni qaldırıb və Bakı təşəbbüsünü irəli sürüb, müstəmləkə ərazilərinin – Fransanın dənizaşırı adlanan ərazilərinin nümayəndələrinin iştirakı ilə tədbirlər keçirib. Bakı bu missiyasını davam etdirməkdə qərarlıdır. Dövlət başçısı bəyan edib ki, Azərbaycan fransız neokolonializminin ifşa olunmasını və fransız müstəmləkələrinin Fransanın zülmündən azad olunması prosesini dəstəkləməkdə davam edəcək.
Milli Məclisin deputatı Naqif Həmzəyev mövzu ilə bağlı bildirib ki, Prezident müsahibəsində bir çox önəmli məqamlara, eyni zamanda Fransa və Ermənistanla bağlı bəzi ciddi məsələlərə toxunub: “Dövlət başçısı eyni zamanda Fransanın Ermənistanı qızışdırması, Ermənistana sülhün imzalanması ilə bağlı təzyiqin göstərilməsi, real addım atmasında maneçilik törətməsini xüsusilə qeyd etdi. 2020-ci il noyabrın 10-da Azərbaycan, Ermənistan və Rusiya arasında üçtərəfli bəyanat imzalanıb. Həmin bəyanatda Azərbaycanın və Ermənistanın üzərinə götürdüyü öhdəliklər var.
Təəssüflər olsun ki, Ermənistan həmin öhdəlikləri yerinə yetirmir, boyun qaçırır. Xüsusilə də Zəngəzur dəhlizinin açılmasına əngəl törədir, müxtəlif bəhanələr gətirir. Zəngəzur dəhlizi açılmayacağı təqdirdə, yəni Azərbaycanın böyük hissəsi ilə Naxçıvan arasında quru əlaqəsi heç bir maneəsiz təmin olunmayacağı təqdirdə Ermənistanla hansısa digər kommunikasiyaların açılması, sərhəd məntəqələrinin açılması mümkün olmayacaq. Bu, çox önəmli açıqlama idi”.
Deputat deyib ki, Ermənistanı müharibəyə hazırlaşdıran əsas ölkə Fransadır: “Bu da istər-istəməz sülh prosesini müəyyən qədər ləngidir. Ancaq Ermənistan anlamalıdır ki, Fransa və digər hər hansı bir bir dövlətin Ermənistanı cəsarətləndirməsi çətin anda onlara dəstək verəcəkləri mənasına gəlmir. Həmin an hansısa açıqlamalar verəcəklər, uydurma bəyanatlar səsləndirəcəklər, nəticədə isə olan Ermənistana və erməni xalqına olacaq.
Bu baxımdan Ermənistan mövcud reallığı düzgün dəyərləndirməlidir, Azərbaycanın uzatdığı əli geri çevirməməlidir. Əldə olunmuş bu yaxınlaşmanı düzgün dəyərləndirməli, Azərbaycanla sülh masasına oturaraq səmimi ortamda və real addımlar ataraq bu sülhü imzalamalıdır. Əks təqdirdə Ermənistan özünü dalana salacaq, bu da istər-istəməz Ermənistanın müstəqilliyinin daha da zəifləməsinə və yaxın gələcəkdə ümumiyyətlə milli təhlükəsizliyini təmin etməməyə qədər gətirib çıxara bilər.
Mən düşünürəm ki, cənab Prezidentin son müsahibə zamanı səsləndirdiyi fikirlərdən sonra, həm Ermənistanın hərbi-siyasi rəhbərliyi, həmçinin Ermənistanın havadarları prosesləri düzgün dəyərləndirərək Ermənistanda maneçilik törətməyəcək və real addım atmasına qarışmayacaqlar”.
N.Həmzəyev vurğulayıb ki, xüsusilə də Prezidentin “əgər real təhlükə olacağı təqdirdə Azərbaycan bunun qarşısını alacaq” ifadələrini işlətməsi revanşist fikirlərlə yaşayan, revanşist düşüncələri təbliğ edən qüvvələrə də sərt mesaj idi.
Onlar da düzgün nəticə çıxarmalıdırlar ki, Azərbaycanla güc, təhdid dili ilə danışmağın mənası yoxdur. Nəzərə alınmalıdır ki, Azərbaycan 44 günlük Vətən müharibəsində qələbə çaldıqdan sonra da öz ordusunu inkişaf etdirib, komando tipli hərbi hissələr formalaşdırıb, professional hərbçilərdən ibarət ordu birləşməmiz var, həmçinin müasir texninaların, silahların Azərbaycan Ordusuna cəlb edilməsi prosesi davam etdirilir”.
N.Həmzəyev əlavə edib ki, Azərbaycan Silahlı Qüvvələrinin 2023-cü il sentyabrın 19-20-də Qarabağda həyata keçirdiyi lokal antiterror tədbirləri buna nümunədir: “Dövlət başçısı qeyd etdi ki, bu antiterror tədbirləri Şuşa əməliyyatına bərabər idi. Bu da o deməkdir ki, Azərbaycan Ordusu daha da güclənib. Azərbaycan bütün strateji yüksəklikləri özündə saxlayıb. Ermənistanın Azərbaycana güc nümayişi, qalib gəlməsi faktiki olaraq düzgün deyil. Əksinə, hər dəfə Ermənistanın təxribatlara əl atması özlərinin rəzil vəziyyətə düşməsinə gətirib çıxaracaq”.