“Uzun müddətdir ki, Azərbaycan xalqı hərbi əsirlərimizin azad olunması ilə bağlı xoş xəbər gözləyirdi. Açığını desək, onsuz da hərbçilərimizin heç bir günahı yox idi. Təəssüf ki, onlara qarşı ədalətsiz mövqe və qərar sərgilənmişdi. Lakin hər kəs bilirdi ki, gec-tez hərbçilərimiz azad olunacaqlar. Ramil Səfərovu Macarıstandan azad edən Müzəffər Ali Baş Komandan İlham Əliyevin Ermənistandakı əsirlərimizi də orada buraxmayacağına, onları da öz evlərinə qaytaracağına böyük ümid var idi”.
Bu barədə açıqlamasında Milli Məclisin İnsan hüquqları komitəsinin üzvü Naqif Həmzəyev bildirib.
Millət vəkili qeyd edib ki, Azərbaycanın uğurla həyata keçirdiyi sülhə məcburetmə siyasəti öz bəhrəsini verməkdədir: “Azərbaycan humanizm nümayiş etdirərək, xoş niyyət göstərərək, Ermənistanın 32 hərbi əsirini azad etdi. Buna cavab olaraq da Ermənistan real nümunəni təkrarladı, bizim iki hərbçimizin əsirlikdən azad olunması ilə bağlı qərar verdi. Düşünürəm ki, bununla yanaşı, Ermənistanın sərgilədiyi bu mövqe sülhə yaxınlaşmağımız üçün bir addım ola bilər. Uzun müddətdir ki, Ermənistandan real addımlar gözləyirik. Biz inanırıq ki, cənab Prezident İlham Əliyevin təşəbbüsü ilə baş tutan bu hadisə davamlı olacaq, Ermənistan götürdüyü öhdəlikləri yerinə yetirəcək və biz regionda uzunmüddətli, dayanıqlı sülhə nail ola biləcəyik. Mən əsirlikdən azad olunan hərbçi qardaşlarımızın ailələrini təbrik edirəm. Azərbaycana zəfər yaraşır, Azərbaycana qələbə yaraşır və biz qələbələrə artıq alışmışıq. İnanıram ki, biz 2024-cü ildə də bir çox zəfərlərə imza atacağıq. Eşq olsun Azərbaycan xalqına, eşq olsun cənab Prezident İlham Əliyevə və eşq olsun Azərbaycan ordusuna!”
Xatırladaq ki, Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqlar nəticəsində humanizm prinsipinə sadiqlik ruhunda, xoş niyyət göstəricisi olaraq iki ölkə arasında qarşılıqlı etimad tədbiri kimi Azərbaycan tərəfindən 32 erməni hərbçinin, Ermənistan tərəfindən isə iki Azərbaycan hərbçisinin azad edilməsi barədə razılıq əldə edilib.
Ermənistana qaytarılması nəzərdə tutulan 32 nəfər (26 nəfər 2020-ci ilin dekabrında Hadrut istiqamətində keçirilmiş antiterror tədbirləri zamanı həbs edilmiş şəxslər, qalan altı nəfər müxtəlif vaxtlarda sərhəddə saxlanılmış şəxslər) artıq cəzalarının böyük hissəsini çəkiblər. Otuz iki nəfərlik siyahıya Azərbaycan xalqına qarşı müharibə cinayətləri və bəşəriyyət əleyhinə cinayətlər törətmiş qondarma rejimin rəhbərləri Araik Arutunyan, Bako Saakyan, Arkadi Qukasyan, Ruben Vardanyan, o cümlədən Vaqif Xaçaturyan, Alyoşa Xosrovyan kimi şəxslər daxil deyil.