"Azərbaycan Respublikası Prezident Administrasiyası və Ermənistan Respublikası Baş naziri aparatının birgə açıqlamasında çox maraqlı məqamlar öz əksini tapıb".
Bunu açıqlamasında Milli Məclisin deputatı Naqif Həmzəyev deyib.
Deputat vurğulayıb ki, Azərbaycan Respublikası və Ermənistan Respublikası regionda çoxdan gözlənilən sülhün əldə olunması üçün yaranmış bu fürsəti düzgün dəyərləndirərək və xoş niyyət ortaya qoyaraq əsirlikdə olan hərbçilərin dəyişdirilməsi ilə bağlı razılıq əldə edib: "Biz uzun müddətdir gözləyirdik ki, əsirlikdə olan iki hərbçimiz azad olunsun. Bunun müqabilində Azərbaycan tərəfi də 32 erməni hərbçini Ermənistana təhvil verməkdə razılaşıb. Bununla yanaşı Ermənistan Azərbaycana xoş niyyət nümayiş etdirmək üçün BMT-nin iqlim dəyişmələri üzrə çərçivə konvensiyasına tərəf dövlətlərin 29-cu konfransına ev sahibliyinə öz namizədliyini Azərbaycanın xeyrinə geri götürüb və Azərbaycanın namizədliyini dəstəkləyib. Bu, birbaşa olaraq Azərbaycanla sülhün əldə olunması üçün Ermənistan tərəfinin xoş niyyəti kimi dəyərləndirilməlidir".
"Uzun müddətdir Azərbaycan xalqı gözləyirdi ki, Ermənistanda olan əsirlərimiz azad olunsun. Bu, müəyyən dərəcədə çox çətin bir proses kimi dəyərləndirilirdi. Ancaq Ali Baş Komandan Cənab Prezident İlham Əliyevin təşəbbüsü və birbaşa şəxsi istəyi nəticəsində bu proses də baş tutdu və əsirlərimizin azad olunması üçün artıq razılıq əldə olunub. İnanıram ki, Cənab Prezidentin həyata keçirdiyi bu uğurlu siyasət tezliklə öz məntiqi nəticəsini verəcək və Ermənistanla sülh sazişi imzalanacaqdır. Bununla da regionumuzda uzun müddətli və dayanıqlı sülhə nail ola biləcəyik", - deputat əlavə edib.
Qeyd edək ki, Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqlar nəticəsində humanizm prinsipinə sadiqlik ruhunda, xoş niyyət göstəricisi olaraq iki ölkə arasında qarşılıqlı etimad tədbiri kimi Azərbaycan tərəfindən erməniəsilli 32 şəxsin, Ermənistan tərəfindən isə 2 Azərbaycan hərbçisinin azad edilməsi barədə razılıq əldə edilib.