Milli Məclisin deputatı Naqif Həmzəyev telefonu “AzParking” mobil tətbiqini dəstəkləməyən, köhnə telefonlardan istifadə edən sürücülərin parklama xidməti üçün ödəniş edə bilməmələri məsələsinə aydınlıq gətirib.
Deputat açıqlamasında deyib ki, “AzParking” xidmətindən istifadə etmək üçün həm mobil tətbiq yaradılıb, həm də SMS vasitəsilə ödəniş etmək olur:
“Hansı sürücülərin mobil telefonları “AzParking” tətbiqini dəstəkləmirsə, onlar SMS vasitəsilə ödənişi rahatlıqla edə bilərlər. Mən dəfələrlə SMS-lə ödəniş etmişəm, heç bir problem yoxdur. Sadəcə, parkalama bitəndən sonra xidmətin başa çatması barədə SMS vasitəsilə yenidən məlumat göndərmək lazımdır. Belə olacağı təqdirdə lazımi vəsait mobil nömrənin balasından çıxılır, bununla da xidmət başa çatır. Parkalama müddəti başa çatır, lakin sürücü SMS göndərmirsə, belə halda sistemdə parklama davam edirmiş kimi qeydə alınır. Bu isə problem yaradır. Tək məsələ budur, əlavə çətinlik yoxdur. Düşünürəm, vətəndaşlar diqqətli olsalar, problem yaranmaz. Bir sözlə, kimin “AzParking” mobil tətbiqini istifadə etmək imkanı yoxdursa, ödənişi SMS-lə etsin. Nəğd ödənişə, yaxud xüsusi parkomatların quraşdırılmasına da ehtiyac yoxdur. SMS və mobil tətbiqlə proses tam nəzarətdə saxlanılır. Vəsaitin yığılması məsələsində də şəffaflıq var. SMS-lə ödəniş edilməsi normal qarşılanmalıdır, buna alışmalıyıq. Doğrudur, bəzi korporativ nömrələr də SMS ödənişini dəstəkləmir, həmin nömrələrdən SMS göndərilə bilmir. Yaxud bəzi sürücülərin nömrələrində kifayət qədər vəsait olmadığı üçün parkalama ödənişi tamamlanmır. Buna görə də smartfon istifadə etməyən sürücülər mobil nömrələrinin balansını artırsalar, ödənişi asanlıqla edə bilərlər”.
Qeyd: Smartfon istifadə etməyən sürücülər telefonun mesaj bölməsində avtomobilin qeydiyyat nişanını və avtomobilin park edildiyi məntəqəni yazaraq 1181 qısa nömrəsinə SMS göndərirlər. Parklama başa çatdıqda isə yenidən mesaj bölməsindən “Son” yazaraq 1181 nömrəsinə SMS göndərilir.