"Təəssüf ki, hazırda Cənubi Qafqaz regionunda Qərb dairələri, xüsusilə də Fransa maraqlarını qoruyub saxlaya bilməsi üçün Ermənistanı silahlandırırlar. Bu silahlandırmanın ikinci bir səbəbi isə Rusiyanın Ermənistanı sıxışdırıb çıxarması və bu boşluğu özlərinin doldurmaq istəyidir. Ancaq bu oyunlar nəticə etibarilə regionda gələcək münaqişələrə zəmin yaradır və Ermənistanı cəsarətləndirir". Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, Qərb açıq formada İranla rəqabətdədir: "İrana sanksiyalar tətbiq olunub. Nəticə etibarilə İranın qonşusu olan Ermənistanın Qərb dairələri tərəfindən silahlandırılması gələcəkdə buranın poliqona çevrilmək ehtimalını artırmaqdadır. Bir sözlə, Ermənistan çox çətin və təhlükəli bir oyunun içərisindədir. Azərbaycan Cənubi Qafqazda yeni münaqişənin baş verməsini istəmir. Bu səbəbdən də Ermənistanla yeni sülhün imzalanmasının tərəfdarıdır. Ümid edək ki, Ermənistan bu təhlükəli oyundan və regionda kənar güclərin at oynatmasına şərait yaratmaqdan əl çəkəcək. Regionu maraqlandıran məsələləri ancaq regiona daxil olan dövlətlər həll etsə yaxşıdır. Son illərdə baş vermiş toqquşmaların tarixinə nəzər yetirsək görərik ki, kənar qüvvələrin təsiri nəticəsində həmin ərazilərdə bugünkü gündə də sülh və əmin-amanlıq yoxdur".
"Ermənistan nə qədər silahlandırılsa da, hələ on illər lazımdır ki, Azərbaycan Ordusunun gücünə yaxın bir qüvvə toplaya bilsin. Bu, həm zaman, həm silah-sursat, həm də vətənpərvər əsgər və zabit tələb edir. Ermənistan silah-sursat təminatını həyata keçirsə də, orada professional ordunun qurulması mümkün deyil. Çünki sonuncu Qarabağ savaşına baxanda görürük ki, Ermənistan ordusunda onminlərlə fərari olub. Bu baxımdan Ermənistan hansısa ordu qurub Azərbaycana güc tətbiq etmək fikrindən daşınsa yaxşıdır. Çünki bu, Ermənistanın sonunu gətirə bilər",- deyə o əlavə edib.