“Qafqaz İslam Ordusunun Bakı şəhərini işğaldan azad etməsi Azərbaycan tarixinin şanlı səhifələrindən biridir”.
Bu sözləri açıqlamasında Milli Məclisin deputatı Naqif Həmzəyev bildirib.
Onun sözlərinə görə, 1918-ci ildə Azərbaycan müstəqillik əldə etməklə müsəlman şərqində ilk demokratik cümhuriyyət quruldu: “Amma məlum olduğu kimi, müstəqilliyimizi elan etsək də, Bakı şəhəri işğal altında idi. Buna görə də Qafqaz İslam Ordusu ilk öncə Gəncə şəhərinə təşrif buyurub. Gəncədə fəaliyyətini davam etdirən Azərbaycan Xalq Cümhuriyyətinin hökuməti Bakını işğaldan azad etmək üçün hazırlıqlar görürdü. Nuru Paşanın rəhbərliyi altında Qafqaz İslam Ordusu 1918-ci il sentyabrın 15-də Bakını işğaldan azad etdi. Nəticədə AXC hökuməti Bakıya köçdü”.
Deputat vurğulayıb ki, həqiqətən də tarixin müxtəlif dövrlərində Türkiyə Azərbaycanın yanında olub: “Türkiyə hər zaman birlik nümunəsi göstərib. Eyni zamanda, Azərbaycan da Türkiyəyə qardaş, dost münasibətini göstərib. Buna misal olaraq Çanaqqala döyüşünü göstərmək olar. Bu döyüşdə 3 min azərbaycanlı şəhid olub. Bakıdakı Türk Şəhidliyində də türk əsgərləri uyuyur. Bundan başqa, Azərbaycanın müxtəlif ərazilərində də türk şəhidlikləri var”.
N.Həmzəyev qeyd edib ki, Türkiyə-Azərbaycan qardaşlığı tarixin sınağından keçib: “Azərbaycan müstəqilliyini bərpa etdikdən sonra ölkəmizin müstəqilliyini tanıyan ilk ölkə Türkiyə olub. Azərbaycan Türkiyənin mənəvi dəstəyi ilə qısa müddətdə daha da güclənib. Xüsusilə, 2003-cü ildən, Azərbaycan Prezidenti İlham Əliyevin ölkəmizə rəhbərlik etdiyi və Türkiyədə Ədalət və İnkişaf Partiyasının hakimiyyətdə gəldiyi dövrdən etibarən iki ölkə arasında münasibətlər daha da inkişaf edib. 44 günlük Vətən müharibəsi zamanı bütün dünya Azərbaycan-Türkiyə qardaşlığının bir daha şahidi olub. İkinci Qarabağ müharibəsi başladığı ilk andan Türkiyə Azərbaycana siyasi, mənəvi baxımdan dəstək verib”.
“Azərbaycan Prezidenti İlham Əliyevlə Türkiyə dövlət başçısı Rəcəb Tayyib Ərdoğan arasında imzalanmış Şuşa Bəyannaməsi iki ölkə arasında qardaşlığın kulminasiya nöqtəsi kimi qiymətləndirilməlidir. İki qardaş dövlət arasında strateji müttəfiqlik Şuşa Bəyannaməsi ilə möhürlənib. Hazırda Türkiyə-Azərbaycan münasibətləri bütün sahələrdə inkişaf edir. Bu münasibətlərin inkişafı digər tük dövlətlərinə də ilham verib”, – o deyib.