"Dünyada ərazisi ən çox minalanmış dövlətlərdən biri Azərbaycandır. Ölkəmiz ilk üçlükdə qərarlaşıb".
Bunu açıqlamasında millət vəkili Naqif Həmzəyev deyib.
Deputat vurğulayıb ki, bu, həqiqətən çox acınacaqlı vəziyyətdir: "İnsan haqları və beynəlxalq hüquq normalarından danışan, bəzi dövlətlərə "demokratiya" ixrac edən beynəlxalq təşkilatlar təəssüflər olsun ki, Ermənistanın mina terrorunu görməzdən gəlirlər. Ermənistana real təzyiq göstərmirlər. Bir çox nüfuzlu nəşrlərdə Azərbaycan və Ukrayna ərazisindəki minalanmış ərazilər müqayisəli şəkildə şərh olunur. Bunun özü problemin nə dərəcədə böyük olduğunu deməyə əsas verir”.
Onun sözlərinə görə, Ermənistan qadağan olunmuş minalardan istifadə edir. Çox təhlükəli, sürpriz minalanma metodunu tətbiq edirlər: “Bu da nəticə etibarilə daha çox təlafata səbəb olur”. N.Həmzəyev 44 günlük Vətən müharibəsindən sonra 306 Azərbaycan vətəndaşının Ermənistanın mina terroru nəticəsində zərər çəkdiyini, həyatını itirənlərin, yaralananlar olduğunu deyərək, bildirib ki, bu, böyük rəqəmdir: “Azərbaycan hökuməti ərazilərin minalardan təmizlənməsinə böyük miqdarda vəsait cəlb edir. İstənilən halda ərazilərin minalardan təmizlənməsi uzun zaman, böyük zəhmət və külli miqdarda vəsait tələb edən məsələdir. Məhz bu səbəbə görə, öz yurdlarına qayıtmaq arzusunda olan məcbur köçkünlərin geri dönüşü də ləngiyir. Çünki quruculuq-bərpa işləri minalardan tam təmizlənmiş ərazilərdə həyata keçirilir".
Müsahibimiz günlər ermənilərin törətdikləri digər təxribatlardan da söz açıb: "Ermənistan yenə də öz xislətindən əl çəkmir. Separatçılar, terrorçular artıq heyvanları da öz çirkin oyunlarına qurban edirlər. İtin boynuna kustar üsulla hazırlanmış partlayıcını bağlamaq və onu Azərbaycan hərbçilərinin mövqelərinə göndərmək bir siqnal olmalıdır. Bu məsələ beynəlxalq təşkilatların diqqətini cəlb etməlidir. Həmçinin, Azərbaycanın separatçıların cəmləşdiyi ərazilərdə anti-terror əməliyyatlarına başlamasına yaşıl işıq yandırılmalıdır. Erməni quldurları dərhal tərksilah edilməlidir. Ermənistan da öz mövqeyini ortaya qoymalı, separatçıların atdığı addımlar qınamalıdır. Əks təqdirdə Ermənistan tərəfi bu prosesdən zərrə qədər kənarda qalmayacaq və cəzalarını alacaqlar”.
Deputat bildirib ki, Azərbaycan hüquq-müdafiəçiləri, QHT-lər faktları, hərbi cinayətləri müvafiq qurumların diqqətinə çatdırmalıdır: “Azərbaycan hərbçiləri ayıq-sayıqdır. Xüsusi xidmət orqanlarımız da gecə-gündüz işləyirlər. Bütün şər qüvvələr gec-tez məhv olunacaq".