Qətiyyən arxayınlaşmaq olmaz
“Beynəlxalq ictimaiyyətin ermənilərin yalan toruna düşməməsi üçün həqiqətlərin dünyaya çatdırılması prosesi genişlənməli və sürətlənməlidir”
“Ermənilər hələ də revanşist düşüncələrlə yaşayırlar və müharibə ritorikasını gücləndirirlər"
“Ermənistanda "azərbaycanlı" və ya "türk" sözü təhqir kimi işlədilir. Bu, erməni cəmiyyətindəki əsas düşüncə haqqında çox şey deyir”. Bunu Prezidentin köməkçisi Hikmət Hacıyev “Arab News”a müsahibəsində deyib. O diqqətə çatdırıb ki, irqi ayrı-seçkiliyin bütün formalarının tam ləğvi haqqında Beynəlxalq Konvensiyaya əsasən, Azərbaycan Beynəlxalq Ədalət Məhkəməsi qarşısında Ermənistana qarşı çox ciddi plan ortaya qoyub. Hikmət Hacıyev etnik nifrət və Azərbaycanafobiya ilə bağlı bir çox nümunələr göstərə biləcəyini vurğulayıb:
“Ermənistan işğal etdiyi ərazilərdə Azərbaycanın bütün mədəni, dini və hətta bəşəri irsinin bütün elementlərini məhv edib. Ona görə də bəzi beynəlxalq media orqanlarının Ermənistanın siyasi təbliğatının tələsinə düşməsindən təəssüflənirəm". H.Hacıyev Beynəlxalq Cinayət Məhkəməsinin keçmiş prokuroru Luis Moreno Okamponun avqust ayında Laçın yolunun "blokadasını" və bunu soyqırımı kimi xarakterizə edən hesabat dərc etməsinə də münasibət bildirib. O söyləyib ki, ədalət adından danışdığını iddia edən bu şəxsin ilk növbədə şəxsiyyəti, dürüstlüyü sual altındadır:
“Beynəlxalq mediada onun qanunsuz əməlləri ilə bağlı çoxlu faktlar var. Təəssüf edirəm ki, hüquqşünas olduğunu iddia edən şəxs soyqırımı anlayışından onun nə demək olduğunu bilmirmiş kimi sui-istifadə edib. O, qərəzlidir. Niyə Ermənistanın Azərbaycana qarşı dövlət səviyyəsində törətdiyi soyqırımı və hərbi cinayətlərdən danışmır? 1992-ci ildə Srebrenitsadan əvvəl Azərbaycanın Xocalı şəhərinin bütün əhalisi ermənilər tərəfindən qətlə yetirilərkən Okampo harada idi?”.
Millət vəkili Naqif Həmzəyev deyib ki, təəssüflər olsun ki, Ermənistan tərəfi Azərbaycan əleyhinə dezinformasiyaların yayılmasına, beynəlxalq ictimaiyyətin çaşdırılmasına və rəsmi Bakıya təzyiqlərin artırılmasına çalışır. Parlament üzvünün sözlərinə görə, ermənilər müəyyən çərçivədə istəklərinə nail olurlar:
"Bəzi xarici ekspertlər, diplomatlar, beynəlxalq təşkilatların nümayəndələri, hüquq müdafiəçiləri qəsdən, yaxud fərqində olmadan erməni yalanlarına inanırlar. Ermənilərin yaydığı yanlış informasiyaları və Azərbaycana qarşı olan uydurma məlumatları şərh edir, əsassız hesabatlar hazırlayırlar. Azərbaycan 44 günlük müharibədən sonra Ermənistana sülh əlini uzatdı və ermənilərlə güc yox, diplomatiya və siyasət dili ilə danışmağa başladı. Çünki məqsədimiz sülhə və regionda uzunmüddətli stabilliyə nail olmaqdır. Rəsmi Bakı İrəvanı sülhə məcburetmə siyasətini uğurla davam etdirməkdədir. Ancaq Ermənistan və onun havadarları hələ də Cənubi Qafqazda sülhün olmasını istəmirlər. Yaxud tamamilə fərqli şərtlər altında sülhün əldə olunmasına çalışırlar. Əlbəttə, bu, qəbuledilməzdir. Azərbaycan qalib ölkədir və beynəlxalq prinsiplərə əsaslanaraq, öz suveren hüquqlarını təmin etməklə məşğuldur. İrəvanın və xarici ölkələrin Azərbaycanın daxili işlərinə müdaxilə etmək cəhdləri qəbuledilməzdir. Bütün reallıqlar ortada ikən hələ də erməni yalanlarına inananların olması təəssüf doğurur. Düzdür, Azərbaycan tərəfi davamlı olaraq əcnəbiləri, xarici diplomatları, qlobal media nümayəndələrini işğaldan azad edilmiş ərazilərə, Qarabağa aparır, oradakı real vəziyyəti, görülən işləri nümayiş etdirir. Şübhə yox ki, onlar da öz ölkələrində bunları diqqətə çatdırırlar. Lakin kifayət etmir. Xarici KİV-in həqiqətləri görməsi üçün onların regiona səfərləri daha intensiv təşkil olunmalıdır".
Deputat vurğulayıb ki, bacardığımız qədər beynəlxalq tədbir və layihələrin məhz Qarabağda, Şərqi Zəngəzurda keçirilməsinə nail olmalıyıq:
"Azərbaycan diasporu və xaricdəki dostlarımız erməni dezinformasiyaları ilə birgə mübarizəyə daha çox zaman ayırmalıdır. Güclərimizi hərtərəfli səfərbər etməliyik. Xatırlayırsızsa, cənab Prezident İlham Əliyev Vətən müharibəsi dövründə 30-a yaxın xarici KİV-ə müsahibələr vermişdi. Bu müsahibələr informasiya blokadasının yarılmasında çox mühüm rol oynamışdı. Düşünürəm ki, müvafiq qurumlar, vətəndaş cəmiyyəti, media, ümumiyyətlə hər birimiz bu işə töhfə verməliyik. Gecə-gündüz çalışmalıyıq. Nəzərə alaq ki, dünyada erməni yalanlarına aldanan, Azərbaycana ermənilərin gözü ilə baxan qüvvələr dayanmır. Beynəlxalq ictimaiyyətin ermənilərin yalan toruna düşməməsi üçün həqiqətlərin dünyaya çatdırılması prosesi genişlənməli və sürətlənməlidir. 44 günlük Vətən müharibəsindəki birliyi, vəhdəti bu gün də davam etdirməliyik. Qətiyyən arxayınlaşmalı deyilik. Ermənilər hələ də revanşist düşüncələrlə yaşayırlar və müharibə ritorikasını gücləndirirlər".