"Rusiya Ağdam - Xankəndi marşrutu ilə humanitar yüklərin maneəsiz şəkildə regiona çatdırılmasının tərəfdarıdır".
Bu sözləri Rusiya Xarici İşlər Nazirliyinin rəsmi nümayəndəsi Mariya Zaxarova sentyabrın 5-də keçirdiyi brifinqdə deyib.
“Biz Rusiya, Azərbaycan və Ermənistan liderlərinin kompleks üçtərəfli razılaşmaları əsasında hərəkət edirik".
O bildirib ki,humanitar yardımın maneəsiz olaraq həm Laçın, həm də Ağdam marşrutu ilə regiona çatdırılmasının tərəfdarıyıq və məlum məsələnin lazımsız yerə siyasiləşdirilməməsinə çağırırıq.
Mövzu ilə bağlı açıqlama verən millət vəkili Naqif Həmzəyev bildirib ki, Xankəndi marşrutu üzrə humanitar yüklərin daşınması Azərbaycan tərəfindən təklif edilib.
"Bu marşrut üzrə humanitar yüklərin daşınması reallaşdırıldıqdan sonra Azərbaycan tərəfi, məhz Laçın yolu vasitəsilə də humanitar yüklərin daşınmasına icazə verə bilər. Burada görünən tərəf odur ki, Azərbaycan Xankəndi ilə kommunikasiyalarının açılmasını və orada yaşayan erməni əsilli insanların inteqrasiyasına nail olmaq istəyir. Eyni zamanda Azərbaycan tərəfindən humanitar yük göndərilib. Ancaq təəssüflər olsun ki, hələ də Ermənistan tərəfi və separatçılar Xankəndində yaşayan erməni əhalinin bu humanitar yükü qəbul etməsinə icazə vermir. Müəyyən maneələr törədir, bu da nəticə etibarı ilə prosesi uzadır. Həmçinin orada heç bir humanitar böhran yoxdur. Böyük ehtimalla məhz rus sülhməramlılarının nəzarətində daşınan yüklər elə həmin əhalinin hansısa ehtiyaclarını qarşılayır. Bunu açıq deməsələr də vəziyyət belədir. Çünki bu qaçılmazdır. Bu yüklər məhz həmin əhalinin hansısa ehtiyaclarını ödəyir. Çünki sülhməramlılar tərəfindən yüklərin bu qədər intensiv daşınmasına məncə, elə də ehtiyac yoxdur. Russia sülhməramlılarının ehtiyacları bu qədər ola bilməz. Bu baxımdan heç bir humanitar böhran yoxdur".
Millət vəkili əlavə edib ki, bu böhran Ermənistan tərəfindən yaradılmış ucuz bir şoudur.
"Artıq BMT-nin Təhlükəsizlik Şurasında da ermənilər öz istəklərinə çatmadılar. Laçın yolu ətrafında yaratdıqları şou hər keçən gün onların əleyhinə işləyir. Faktiki olaraq Azərbaycan tərəfi bu məsələdə beynəlxalq hüquqa söykənərək addım atır. Biz öz suveren haqlarımızı, hüquqlarımızı müdafiə edirik, qoruyuruq. Bizim qərarımız istəyimiz olmadan Azərbaycanın daxilinə hər hansısa yüklərin daşınması Laçın yolu vasitəsilə təmin edilə bilməz. Bilirsiniz ki, vətəndaşların, yəni erməni əsilli əhalinin hərəkəti Qızıl Xaç Beynəlxalq Komitəsi vasitəsilə həyata keçirilir. Burada heç bir maneə yoxdur. Çünki Ermənistan, Azərbaycan və Rusiya arasında üçtərəfli razılaşma əsasında bu işlər həyata keçirilir. Böyük ehtimalla artıq bu marşrutun ən yaxın zamanda işə düşməsi hətta üçtərəfli görüşlər zamanı da razılaşdırılıb. Paşinyan hökuməti bu məsələdə önə düşmək, əhalini özlərinə qarşı qaldırmaq və öz mövqelərini itirmək niyyətləri olmadığı üçün prosesləri öz axarına buraxırlar. Hətta bəzən bu etirazlar onların fərdi danışıqlar zamanı əqdlərini gücləndirir. İstənilən halda Azərbaycanın mövqeyi hər kəsə bəllidir. Azərbaycan bəzi məsələlərdə qətiyyən güzəştə gedəsi deyil. Çünki biz Ermənistanın açıq aşkar vaxtı uzatmaq istədiyini anlayırıq. Ermənilərin hərbi münaqişəyə hazırlaşdığını bilirik. Ermənistan öz ordusunu silah-sursat ehtiyatını artırır".
N. Həmzəyev onu da qeyd etdi ki, Ermənistan vaxt udmaqla Azərbaycana xarici güc təzyiqini artırmaq və özləri üçün əlverişli şərtlərlə sülh əldə olunmasını istəyir.
"Bu baxımdan da biz ən qısa zamanda proseslərin yekunlaşmasını və Ermənistanla sülhün imzalanmasını istəyirik. Biz erməni əhalinin gec- tez inteqrasiyasına nail olmalıyıq. Məhz humanitar yüklərin Xankəndi-Ağdam yolu vasitəsilə daşımasının tərəfdarıyıq. Həm Rusiya tərəfi, həm Avropa İttifaqı formatında keçirilən görüşlərdə də biz öz tələblərimizi açıq formada bütün tərəflərə çatdırmışıq. Həmçinin Amerikada baş tutan görüşlərdə də bizim mövqeyimiz hər kəsə bəlli olub. Ermənistan da cığallıq etməməli, mövqeyini ortaya qoymalı və sülhün əldə olunması üçün səylərini artırmalıdır".