"Azərbaycan Respublikasının Prezidenti İlham Əliyev və Birinci vitse-prezident Mehriban xanım Əliyeva Macarıstanda işgüzar səfərdə oldular. Bu səfər zamanı dövlət başçısı İlham Əliyev və Macarıstanın Baş naziri Viktor Orban arasında görüş keçirilib. Görüşdə Azərbaycanla Macarıstan arasında enerji resurslarının, neft-qaz sahəsində əməkdaşlığın inkişafı, qida sənayesi sahəsində ölkəmizə investisiya qoyuluşu, əczaçılıq sahəsində əldə edilmiş uğurlardan bəhs edilib". Bu sözləri açıqlamasında millət vəkili Naqif Həmzəyev deyib.
Onun sözlərinə görə, bütün bunlarla yanaşı, Qara dəniz dibi ilə "Yaşıl enerji" dəhlizinin inşa edilməsi və Azərbaycan enerji resurslarının Macarıstana qədər çatdırılması məsələləri də görüşdə müzakirə olunub: "Heç kəsə sirr deyil ki, Macarıstan azərbaycanlı tələbələrin təhsil alması üçün xüsusi təqaüd proqramı həyata keçirir. Bu, azərbaycanlı tələbələr üçün çox əla bir fürsətdir. Orada yüksək səviyyəli kadrların hazırlanması və geri dönərək ölkəmizə böyük töhfə verməsi həm Azərbaycan, həm də Macarıstan tərəfindən müsbət dəyərləndirilir. Beynəlxalq təşkilatlarda Macarıstan və Azərbaycanın birlikdə iştirakı, Türk Dövlətləri Təşkilatında əldə edilmiş uğurlar və gələcək perspektivlər də səfər zamanı baş tutan görüşlərdə müzakirə edilib".
Deputat sözlərinə davam edərək bildirib ki, Macarıstanın Azərbaycana hərtərəfli dəstəyinin bugündən sonra da davam etdiriləcəyi və münasibətlərin strateji müttəfiqlik səviyyəsinə qədər yüksəldiləcəyi də əsas müzakirə obyektlərindən idi: "Həmçinin, Budapeştdə Azərbaycan Respublikasının Prezidenti İlham Əliyevin Bosniya və Herseqovinanın Rəyasət Heyətinin üzvü xanım Jelka Tsviyanoviç və Serb Respublikasının Prezidenti Milorad Dodik ilə görüşü olub. Cənab Prezidentin Bosniya və Herseqovinaya səfəri zamanı müzakirə edilən məsələlər yenidən nəzərdən keçirildi. Ümumilikdə Azərbaycan dost və qardaş dövlətlərlə münasibətlərinin yüksək səviyyədə qorunub saxlanılması və inkişaf etdirilməsində maraqlıdır. Dövlət başçısının bu işgüzar səfəri də Azərbaycanın mövqeyinin və maraqlarının qorunmasına xidmət etməkdədir. Ümumilikdə əldə edilmiş razılıq nəticə etibarilə Azərbaycan iqtisadiyyatının və diplomatiyasının güclənməsinə böyük dəstək olacaqdır".