Erməni mətbuatında yer alan məlumatlara görə, yaxın günlərdə Azərbaycan hökumətinin nümayəndələri ilə Qarabağın erməni icması arasında görüş keçirilə bilər.
Məlumata görə, artıq Azərbaycan tərəfi ilə görüşə getməyə hazır olan heyət yaradılıb. Həmin heyət yaxın günlərdə, sabah və ya o biri gün Azərbaycan tərəfi ilə görüşə getməyə hazırlaşır. Böyük ehtimalla görüş Azərbaycanın Bərdə şəhərində baş tutacaq.
Qeyd edək ki, ermənilər bundan əvvəl Yevlaxda görüş təklifinə müsbət cavab verməmişdi.
Maraqlıdır ki, ermənilərlə bu dəfə görüş baş tutacaqmı?
Məsələ ilə bağlı danışan Milli Məclisin deputatı Naqif Həmzəyev bidlirib ki, son hadisələrə əsasən ermənilər müəyən dərəcədə reallıqları dərk etməyə başlayıb:
“44 günlük Vətən müharibəsi bitdikdən sonra Azərbaycan Ermənistana öz sülh əlini uzatdı. Ötən 3 ilə yaxın vaxtda Azərbaycan bütün güclərini səfərbər edərək Ermənistanla sülh müqaviləsinin imzalanması üçün nə lazımdırsa, etdi. Ancaq təəssüflər olsun ki, hər vəchlə Ermənistan təxribata əl atdı və danışıqlar prosesini uzatdı. Müxtəlif təxribatlar törədərək, prosesləri öz xeyrinə çəkməyə çalışdı. Son hadisələrdən belə nəticə çıxarmaq olar ki, ermənilər artıq reallıqları müəyyən dərəcədə dərk etməyə başlayır. Xüsusən BMT TŞ-də Ermənistanın istəyi ilə baş tutan müzakirlərdə Ermənistanın növbəti məğlubiyyəti və Azərbaycan diplomatiyasının parlaq qələbəsi ermənilər və onların havadarları, Qarabağdakı separatçılar üçün tərs sillə rolunu oynadı. Onlar xəyallardan, röyalardan müəyyən dərəcədə ayıldılar. Bundan əvvəl Yevlax görüşündən imtina edən Qarabağdakı erməni əhalini əsarət altında saxlayan separatçılar ayıldılar. Bu gün onlar çox yaxşı başa düşürlər ki, artıq beynəlxalq təşkilatlar da, beynəlxalq ictimaiyyət də sözün əsl mənasında real müzakirələr zamanı onları müdafiə edə bilmədilər. Yaxud havadarlarının müdafiəsi onların istədiyi nəticəni vermədi”.
Deputat qeyd edib ki, ermənilərin tək və yeganə çıxış yolu Azərbaycan hakimiyyəti ilə bir masada oturmaq, erməni əhalinin Azərbaycan cəmiyyətinə reinteqrasiyasında rol oynamaqdır.
"Eyni zamanda buradakı ermənilərin Azərbaycan qanunlar çərçivəsində yaşaması, qanunsuz erməni silahlı qüvvələrinin Azərbaycanı tərk etməsi vacibdir. Onlar bu danışıqlara gəlməklə bu günə qədər əldə edə bilmədiklərinə fərqli şəkildə nail olmağa çalışırlar. Amma Azərbaycan dövlətinin mövqeyi açıq və aydın şəkildə məlumdur. Azərbaycan bu günə qədər öz mövqeyindən zərrə qədər olsun dönməyib. Azərbaycan öz sərhədləri çərçivəsində suverenliyini qorumağa və bütün vətəndaşları üçün bərabər hüquqların təmin edilməsinə üstünlük verir. Bunu uğurla həyata keçirir. Biz də bunun tərəfdarıyıq. Düşünürük ki, gec-tez Qarabağdakı ermənilər də bu qayda-qanunla yaşayacaq. Erməni əhalini əsir saxlayan separatçılar bu torpaqları nəhayət tərk etmək məcburiyyətində qalacaq. Rusiya sülhməramlıları 2025-ci ildə mandatları başa çatdıqdan sonra Qarabağdan çıxacaq. Azərbaycan erməni əhalinin təhlükəsizliyinin təmini ilə bağlı məsuliyyəti öz üzərinə götürür. Azərbaycan bu missiyanı da uğurla həyata keçirəcək”.
Naqif Həmzəyev söyləyib ki, ermənilər Bərdəyə gəlməklə Ağdam-Xankəndi yolunu yoxlamaq istəyir:
“Ümid edirik ki, erməni mətbuatında yazılanlar doğru olar. Ermənilər Bərdə görüşündə iştirak edərlər. Onlar nəhayət ki, Azərbaycan tərəfinin reallaşdırmaq istədiyi bütün proseslərdə yaxından iştirak edəcəklər. Biz ən qısa zamanda sülh müqaviləsinin imzalanmasının şahidi ola biləcəyik.
Çox güman ki, ermənilər Xankəndiyə yaxın olduğuna görə görüş yeri kimi Bərdəni seçib. Ağdamda hazırda yenidənqurma, abadlıq-quruculuq işləri həyata keçirilir. Bu baxımdan həm də onlar Ağdam-Xankəndi yolunu sınaqdan keçirmək istəyirlər. Oradan Bərdəyə məsafə yaxındır. Həm də daha tez gəlib, tez qayıtmaq istəyirlər. Bizim üçün heç bir fərqi yoxdur. Əsas odur ki, görüş baş tutsun. Həmin erməni əhaliyə başa sala bilək ki, onlar azərbaycanlılarla bir yerdə yaşaya bilərlər. Azərbaycan hökuməti onların təhlükəsizliyini tam olaraq təmin edir. Bərdə tarixi, qədim şəhərdir. Mən düşünürəm ki, Bərdədə baş tutacaq görüş onlar üçün ümid yarada bilər. Bərdədə özlərini güvəndə hiss edəcəklərinə inanıram”.
Milli Məclisin digər bir deputatı Vüqar İskəndərov isə vurğulayıb ki, 44 günlük Vətən müharibəsində Azərbaycanın həm cəbhədə, həm də post müharibə dövründə diplomatik arenadakı qələbəsi yalnız erməniləri yox, onların havadarlarını da narahat edib və çıxılmaz vəziyyətə salıb:
“Səbəb odur ki, Azərbaycan Prezidenti bütün dünya erməniliyi ilə, onların cəmiyyət və lobbiləri ilə mübarizə aparır. Əgər bunu şahmat taxtasındakı oyuna bənzətsək, onları mat vəziyyətinə qoyub. Çünki hər bir gediş Azərbaycanın milli maraqlarına uyğundur. Son zamanlar sülh müqaviləsi istiqamətində danışıqlara Qarabağdakı bir qrup terrorçunun kölgə salması, təxribatçı hərəkətləri, artıq Azərbaycanı da əməli işə keçməyə məcbur edib. Konkret olaraq ermənilər qarşısında tələb qoyulub.Ya vətəndaşlığımızı qəbul edib ərazilərimizdə layiqli yaşayacaqlar, ya da ərazilərimizi tərk edəcəklər. Cənab Prezident öz xüsusi nümayəndələrini də bunun üçün ayırıb. Öz vətəndaşlarımızla masa arxasında görüşərək lazım olan məsələləri müzakirə etməyə hazır olduğumuzu da bildirib. Xocalıdakı görüşdən sonra onları iki dəfə Bakıya dəvət etmişik. Lakin hələ də təxribatçı xuntanın əsirliyində olan sadə vətəndaşlarımız da görüşlərdən qorxaraq kənara çəkilirlər. Ancaq son zamanlar əsasən də BMT TŞ-nin xüsusi iclasında dünya erməniliyinin fiaskoya uğraması, ümumiyyətlə siyasətlərinin boş və puç olması erməniləri bir daha yenidən düşünməyə vadar etdi”.
Deputatın söyləyib ki, Xankəndidə xunta əsirliyində olan və terrorçuluqla məşğul olan ermənilər artıq öz canlarının hayındadırlar:
“Yəni anlayırlar ki, onları da tez-gec Vaqif Xaçaturyanın aqibəti gözləyir. Onlar da əli-qolu bağlı Bakı şəhərinə gələcək və Azərbaycan qanunları ilə ədalət məhkəməsinə cavab verməli olacaqlar. Son zamanlar Rusiya pasportu olan ermənilərin kütləvi sürətdə Xankəndini tərk etməsi onu deməyə əsas verir ki, bu insanlar gec-tez Azərbaycan bayrağı altında yaşamalı və Azərbaycan manatı ilə alış-veriş etməli olduqlarını anlayırlar. Azərbaycan tərəfi bir müddət əvvəl yenidən Yevlaxda görüş təklif etmişdi. Yenə də, həmin Qarabağdakı ermənilər ona etiraz etdilər. BMT-dəki xüsusi iclasa qədər bunu uzatmağa cəhd etdilər. Orada hər hansı bəyanatın qəbul olacağını və özlərinin xeyrinə qərarların çıxacağını düşünürdülər. Bu ümidləri də puça çıxdı. Artıq onlar başa düşürlər ki, Azərbaycan tərəfinin tələbləri ilə razılaşmaqdan başqa çarələri yoxdur”.
V.İskəndərov vurğulayıb ki, görüşün Bərdədə keçirilməsi Azərbaycan üçün də əlverişlidir:
“Məlumatlara görə, Bərdədə görüşün keçirilməsinə razılıq verirlər. Bərdə şəhərində bu görüşün keçirilməsi təbii ki, Azərbaycan üçün də əlverişlidir. Bərdə həmin əraziyə yaxın Azərbaycan şəhəridir. Aran Qarabağ olduğu üçün çox düzgün coğrafi ərazidə seçilib. Danışıqların harada olmasından asılı olmayaraq, Qarabağda yaşayan ermənilər anlamalıdırlar ki, Azərbaycanın qanunları, konstitusiyası altında yaşayacaqlar. Buna əməl edənlər heç vaxt olmadığı kimi firavan və layiqli yaşayacaqlar. Kimlər ki, hələ də boş xülyalarla yaşayır, onlara hələlik qapı açıqdır, getsinlər. Onsuz da ermənilər dünyanın digər yerlərində vətənsiz çox xoşbəxt yaşaya bilərlər. Çünki onların həqiqətən vətəni yoxdur”.