Azərbaycan Respublikasının prezidenti İlham Əliyevin “Böyük Qayıdış” prosesinin başlanması, bütün işlərə start verilməsi ilə bağlı çıxışından sonra 30 illik həsrətə son qoyuldu. Vətən müharibəmiz 44 günün yekununda Azərbaycanın tarixi qələbəsi ilə yekunlaşdı. Bundan sonra isə Böyük Qayıdışın başlanması əsas məqsəd kimi seçildi.
Azərbaycan müharibədən dərhal sonra tikinti-quruculuq işlərinə başladı. Qısa zamanda infrastruktur quruldu və yaşayış yerlərinin bərpasına start verildi. Eyni zamanda, Füzulidə və Zəngilanda beynəlxalq hava limanını istifadəyə verildi, Laçında isə hava limanının tikintisi davam edir.
“Böyük Qayıdış” proqramı çərçivəsində 2023-cü ilin may ayından etibarən Laçına köç başladı. Mərhələli şəkildə proses davam etdirilir.
Maraqlıdır, bu ilin sonuna qədər daha neçə vətəndaşımızın öz yurd-yuvasına qayıdışı gözlənilir? Laçın şəhərinin gələcək inkişaf planı ilə bağlı daha hansı addımlar atılacaq?
Mövzu ilə bağlı açıqlama verən Milli Məclisin deputatı Vüqar İskəndərov bildirdi ki, Vətən müharibəmizlə erməni işğalına son qoyulduqdan sonra işğaldan azad edilmiş ərazilərimizdə böyük quruculuq, yenidənqurma işləri sürətlə davam edir:
” Bu işlərin hazırda dünyada analoqu yoxdur. Çox böyük bir ərazidə həm Qarabağ, həm də Şərqi Zəngəzur iqtisadi rayonunda yeni kəndlər, şəhərlər salınır, yollar, tunellər, körpülər tikilir, bərpa olunur. Bütün bunlar Azərbaycanın iqtisadi gücünü də göstərmiş olur. Eyni vaxtda işğaldan azad edilmiş torpaqlarımıza “Böyük Qayıdış” proqramını icra edirik. Artıq həm Şuşa, həm də Zəngilan və digər rayonlarımıza insanların öz ata-baba yurduna qayıdışına start verilib. Bu qayıdış proqramı Laçına da çatıb. Laçınlılar da mərhələli şəkildə öz yurd-yuvalarına qayıtmağa başlayıblar. Böyük Qayıdış proqramı çərçivəsində ilin sonuna qədər Laçına 4 minə yaxın ailənin köçürülməsi planlaşdırılır. Bu günə qədər isə 600-ə yaxın insan yerləşdirilib. Bu insanlar əvvəllər harada yaşayıblarsa elə öz doğma yerlərində məskunlaşırlar. Proses il boyu davam edəcək. Bu prezident İlham Əliyevin “Böyük Qayıdış” anonsunda səsləndirdiyi fikirləri özündə ehtiva edir. Prezidentin sözlərinə görə, öz dədə-baba yurdundan köçkün düşmüş insanlar mərhələli şəkildə evlərinə qayıdacaqlar və burada daimi yaşayacaqlar. Bütün dünyanın gözü qarşısında dağıdılmış, yerlə-yeksan edilmiş ərazilər Azərbaycan Respublikasının öz gücü, imkanları ilə cənnətə çevrilir. Laçınlılar da bu gözəl yurda qayıdaraq orada daimi və layiqli yaşayacaqlar. Hazırda burada hava limanı tikintisi də davam etdirilir. Onun fəaliyyətə başlaması ilə Laçın daha da dirçələcək. Bu rayonun çox böyük potensialı var. Kənd təsərrüfatı sahəsi, mineral suları, təbiəti, yeraltı və yerüstü sərvətləri Laçını ölkəmizin ən zəngin rayonlarından birinə çevirəcək və digər rayonlar kimi öz gözəl, təbii görkəminə qayıdacaq”.
Məsələyə münasibət bildirən Milli Məclisin deputatı Naqif Həmzəyev də qeyd edir ki, 44 günlük Vətən müharibəsində Azərbaycan Ordusu işğal altında olan Qarabağ, Zəngəzur torpaqlarını azad etdikdən sonra qarşımızda duran əsas vəzifələrdən biri işğaldan azad olunmuş əraziləri əvvəlki görkəminə qaytarmaq, yeni binaların, yaşayış komplekslərinin tikintisini həyata keçirmək, həyatı bərpa etmək və keçmiş məcburi köçkünlərin öz ata-baba yurdlarına qayıdışını təmin etməkdir:
“Artıq biz bu prosesə start vermişik. Prezident İlham Əliyevin rəhbərliyi altında Azərbaycan hökuməti keçmiş məcburi köçkünlərin doğma yurd-yuvalarına köçürülməsinə başlayıb. Qarşımızı kəsən ən böyük maneələrdən biri də minalanmış ərazilərin olmasıdır.
Təəssüf ki, ermənilər bugünə qədər minalanmış ərazilərin dəqiq xəritəsini təqdim etməyiblər. Bu səbəbdən də tikinti, quruculuq işləri ləngiyir. Çünki ilk növbədə həmin ərazilərin minalardan tamamilə təmizlənməsinə əmin olmalıyıq. Lakin buna baxmayaraq “Böyük Qayıdış” proqramı mərhələli şəkildə həyata keçirilir. Azərbaycanın işğaldan azad edilmiş bütün rayonlarında quruculuq işləri görülür. Bunlardan biri də Laçın rayonudur. Ötən il Laçın yoluna alternativ yol çəkildikdən sonra rayonun mərkəzi də Azərbaycan Silahlı Qüvvələrinin tam nəzarətinə keçdi. İlin sonuna qədər vətəndaşların Laçına köçürülməsi prosesi davam edəcək.
Yaşayış kompleksləri ilə yanaşı vətəndaşlarımızın məşğulluq məsələlərinə də üstünlük veririk. Bu baxımdan ərazilərin potensialına uyğun iş yerlərinin qurulmasına da Azərbaycan hökuməti önəm verməkdədir. Ümid edirik ki, gələn il digər rayon və şəhərlərimizə də keçmiş məcburi köçkünlərin yerləşdirilməsini təmin edə biləcəyik. Dədə-baba yurdlarına qayıtmış vətəndaşlarımızın təhlükəsizliyini təmin etmək üçün həmin ərazilərdə öz mövqelərimizi daha da gücləndirməliyik. Ümid edirik ki, tezliklə separatçılar, qanunsuz erməni silahlı birləşmələri ərazilərimizdən çıxarılacaq”.