İranın Nurduz sərhəd-keçid məntəqəsindən Ermənistana hərbi yükün daşınmasını əks etdirən video-görüntülər qeydə alınıb. Bildirilib ki, silah göndərən tərəf son vaxtlar Ermənistanın hərbi-texniki əməkdaşlığını sürətlə artırdığı Hindistandır.
Məlum olduğu kimi, Ermənistan və Hindistan 400 milyon dollarlıq hərbi müqavilə imzalayıb. Son zamanlar iki ölkənin hərbçiləri arasında tez-tez təmasların olması da onlar arasında hərbi əməkdaşlığın güclənməsindən xəbər verir.
Azərbaycan Respublikasının Prezidentinin köməkçisi Hikmət Hacıyev də Hindistanı Ermənistana öldürücü silahları tədarük etməməyə çağırıb. O qeyd edib ki, Azərbaycanın Ermənistanla sülh sazişi üzrə danışıqlar apardığı bir vaxtda Hindistanın bu ölkəyə öldürücü silahlar tədarük etməsi Ermənistanın militarizasiyasına və vəziyyətin gərginləşməsinə yol açır.
Millət vəkili Naqif Həmzəyev açıqlamasında bildirib ki, Ermənistan Azərbaycanla aparılan sülh danışıqları fonunda silahlanmaya üstünlük verir.
Deputat qeyd edib ki, Hindistanla 400 milyon dollarlıq hərbi müqavilə əsasında silahların Ermənistana gətirilməsi göstərir ki, İrəvan aktiv şəkildə revanşa hazırlaşır:
"Azərbaycan Ermənistanın silahlanmasına çox mənfi yanaşır. Əbəs yerə deyil ki, prezidentin köməkçisi Himəd Hacıyev də Hindistanın Azərbaycandakı səfirini Ermənistanı öldürücü silahlarla təmin etməməyə çağırıb. Ümid edək ki, Hindistan rəhbərliyi bu addımın nəyə səbəb ola biləcəyini anlayırlar. Ermənistanın aktiv şəkildə silahlanması Cənubi Qafqazda sülhə maneçilik törətməkdir. Burada yalnız Hindistanın deyil, Fransanın da "əməyi" çox böyükdür. Şübhə yox, Hindistanın Ermənistana silah-sursat satmasında Fransanın da ciddi dəstəyi var”.
Onun sözlərinə görə, Ermənistan və onun havadarları Qarabağda yaşayan erməni əhalinin guya "humanitar fəlakətlə" üzləşdiyini iddia edərək yeni bir oyun başlatmaq istəyirlər. “"Humanitar yüklər"i Ağdam üzərindən deyil, xüsusi olaraq Laçın yolu vasitəsi ilə keçirməyə cəhd edən Ermənistanın məqsədi Azərbaycanın nəzarətə götürdüyü yoldan yenidən öz məqsədləri üçün istifadə etməkdir. Bu yolda məhdudiyyətlərin aradan qaldırılması və rəsmi Bakının nəzarətindən çıxması Ermənistan ordusu ilə yanaşı, Qarabağdakı separatçıların da silahlanmasına imkan verəcək. Azərbaycan tərəfi öz mövqeyini qəti şəkildə ortaya qoyub. Hər hansı humanitar yardım ancaq Ağdam-Xankəndi yolu ilə ermənilərə çatdırıla bilər".
N.Həmzəyev diqqətə çatdırıb ki, Ermənistan Hindistandan aldığı silahlarla öz hərbi invertarını gücləndirməklə faktiki olaraq Azərbaycanla növbəti toqquşmaya hazırlıq görür: "İrəvan hökumətinin bütün təxribatçı hərəkətləri, silahlanma cəhdləri nəticə etibarilə Ermənistanın ziyanına olacaq. Nikol Paşinyanın danışıqlar masasında sülhdən danışıb, arxada silahlanmaya üstünlük verməsi Ermənistan üçün növbəti rüsvayçı məğlubiyyət deməkdir”.
“Hazırda Ermənistan çox hiyləgər bir oyun içərisindədir” deyən deputat bildirib ki, onlar həm Avropa İttifaqının müsbət rəyini əldə etmək istəyirlər, həm də beynəlxalq ictimaiyyəti dezinformasiyalarla yemləyirlər.
“Əfsuslar olsun ki, xarici media da uydurma xəbərləri həqiqət kimi tirajlamağa davam edir. Heç kim unutmasın ki, Azərbaycan siyasi, itqisadi və hərbi baxımdan güclü ölkəyə çevrilib. Ordumuz istənilən təxribatın qarşısını almağa qadirdir. Ermənilərin hansısa yanlış hərəkəti imkan verəcək ki, anti-terror əməliyyatlarını başlayaq və uğurla həyata keçirək", - deyə Naqif Həmzəyev qeyd edib.