Bildiyimiz kimi, Azərbaycanın müstəqilliyini ilk tanıyan dövlət Türkiyə olub. Həmçinin bir tarixi gerçəkliyi də unutmamalıyıq ki, Ümummilli Lider Heydər Əliyev hələ Naxçıvanda Ali Sovetə sədrlik etdiyi dönəmdə muxtar respublikanın blokadadan çıxarılmasında, qorunub saxlanılmasında Türkiyənin böyük dəstəyi olub. Bu və bu kimi digər amillər iki dövlət arasındakı münasibətlərin daha da artan xətlə inkişafına təkan verib. Bu gün isə heç kəsə sirr deyil ki, Azərbaycan-Türkiyə qardaşlığı yalnız regionda deyil, dünyada məlum bir faktdır.
Bu fikirləri açıqlamasında millət vəkili Naqif Həmzəyev bildirib.
Millət vəkili Azərbaycan Respublikasının Prezidenti İlham Əliyevin iyulun 21-də “4-cü Sənaye İnqilabı dövründə Yeni Media” mövzusunda keçirilmiş Şuşa Qlobal Media Forumunun açılış mərasimindəki nitqini şərh edib:
"Ölkə başçısı forum çərçivəsində jurnalistlərin suallarını cavablandırdı. Cənab Prezidentin toxunduğu maraqlı məqamlardan biri də Türkiyə-Azərbaycan münasibətlərinin bugünkü inkişaf səviyyəsi oldu. İlham Əliyev xüsusilə qeyd etdi ki, məhz Türkiyə prezidenti Rəcəb Tayyib Ərdoğanla aralarında olan şəxsi dostluq-qardaşlıq münasibətləri Azərbaycan-Türkiyə əlaqələrini daha yüksək səviyyəyə çatdırıb. Cənab Prezidentin türkiyəli jurnalistin sualını cavablandırarkən qeyd etdiyi kimi, 44 günlük Vətən müharibəsi başlayan andan etibarən Türkiyə Prezidentinin verdiyi “Azərbaycan yalnız deyil” bəyanatı ölkəmiz üçün əsl qardaş dəstəyinin təzahürü kimi yaddaşlara hopdu. Bu bəyanata Türkiyənin bütün rəsmiləri, türk xalqı, dünyanın hər bir yerində yaşayan türk əsilli vətəndaşlar qoşuldular".
N.Həmzəyev vurğulayıb ki, İkinci Qarabağ müharibəsi bitdikdən sonra de-fakto mövcud olan münasibətlərin rəsmiləşdirilməsi üçün Azərbaycan və Türkiyə çox önəmli bir addım atıb: "Şuşa şəhərinə ilk dəfə rəsmi olaraq, başqa bir ölkənin prezidenti simasında cənab Ərdoğan nümayəndə heyətilə birlikdə səfər etdi. Orada Şuşa Bəyannaməsi imzalandı. Beləliklə, faktiki olaraq, Türkiyə-Azərbaycan münasibətləri yeni dövrə qədəm qoydu".
"Bu gün Azərbaycan və Türkiyə demək olar ki, bütün sahələr üzrə öz təcrübələrini mübadilə edir, beynəlxalq platformalarda birgə addımlayır. Qürurvericidir ki, digər istiqamətlərdə olduğu kimi, hərbi-sənaye, ordu quruculuğu sahəsində də Türkiyə modelinə üstünlük verilir. "Komando" hissələrinin yaradılması Azərbaycan-Türkiyə hərbi əməkdaşlığına əyani bir sübutdur ki, bu da ölkəmizdə daha peşəkar hərbçilərin formalaşmasında böyük rol oynayacaq", - millət vəkili əlavə edib.
Deputat onu da qeyd edib ki, bu gün Türkiyənin qlobal liderlərdən birinə çevrilməsi, o cümlədən Cənubi Qafqazda təsir imkanlarının artması regionda uzunmüddətli və dayanıqlı sülhə nail olmaqla nəticələnəcək.