Qarabağda yaşayan ermənilər oradakı separatçılar tərəfindən əsir edilib
Həmin ermənilərin hüquqları separatçılar və İrəvan tərəfindən pozulur
Ermənistanın baş naziri Nikol Paşinyan “Frans Press” agentliyinə müsahibəsində İrəvan-Bakı arasındakı sülh prosesindən danışıb. Baş nazir bildirib ki, o, Azərbaycanla davamlı sülhə inanmasaydı, ümumiyyətlə, danışıqlar prosesində iştirak etməzdi. Amma Paşinyanın sözlərinə görə, inam nəticə əldə ediləcəyinə zəmanət vermir:
"Çünki bu, təkcə məndən deyil, həm də Azərbaycan Prezidentinin mövqeyindən asılıdır. Boşluqda danışıqlar aparmadığımızı demirəm, burada həm də beynəlxalq, geosiyasi və humanitar vəziyyət, hər an özünü göstərə biləcək müxtəlif insani amillər, siyasi və daxili siyasi vəziyyət var". Paşinyan ənənəvi böhtanını yağdıraraq, guya Qarabağda humanitar böhran yaşandığını, azərbaycanlıların erməni icmasından qisas aldığını da iddia edib: “Məncə, danışıqların gedişinə mane olan ən mühüm şey Azərbaycanın davam edən aqressiv ritorikası, nifrətin qızışdırılması, ermənilərə və hər bir erməniyə qarşı nifrət aktları, Qarabağ ermənilərindən qisas almaq siyasətidir”. Baş nazir bildirib ki, bu prosesdə onun qırmızı xətləri Ermənistanın ərazi bütövlüyü və suverenliyi, eləcə də Qarabağ ermənilərinin hüquqları və təhlükəsizliyidir: “Qarabağ xalqının (Qarabağdakı erməni icması nəzərdə tutulur – red.) hüquqları və təhlükəsizliyi məsələsi “dq” nümayəndələrinin iştirakı ilə aparılan dialoq və danışıqlar nəticəsində həll edilməlidir. Biz buna Bakı-Xankəndi dialoqu deyirik. Bu dialoq beynəlxalq mexanizmlər çərçivəsində baş verməlidir. Burada beynəlxalq ictimaiyyət şahid rolunda olacaq. Azərbaycan Ermənistanın bu prosesdə marağını Azərbaycanın ərazi bütövlüyünə qəsd kimi qəbul edir və şərh edir”.
Millət vəkili Naqif Həmzəyev açıqlamasında deyib ki, Azərbaycan öz torpaqlarını işğaldan azad etdikdən sonra Ermənistana sülh əlini uzatdı. Deputat diqqətə çatdırıb ki, Ermənistan üç ilə yaxın müddətdə dəfələrlə sülh danışıqlarını pozan tərəf kimi yadda qaldı:
"Hər dəfə sülhə bir addım yaxınlaşdıqda Ermənistan tərəfindən və İrəvanın himayəsində olan separatçılar tərəfindən təxribatların şahidi olduq. Sonuncu Brüssel görüşündən sonra hər kəsə aydın oldu ki, danışıq masasında hansı məsələlər müzakirə edilib və nə qədər yol qət olunub. Müəyyən dərəcədə irəliləyişin olduğu deyildi. Buna baxmayaraq, Ermənistan tərəfi mütəmadi olaraq atəşkəsi pozmaqdadır. Separatçılar, silahlı dəstələr hələ də silahı yerə qoymayıblar, Azərbaycan torpaqlarını tərk etməyiblər. Durmadan dünya ictimaiyyətinə yanlış, uydurma informasiyalar ötürürlər. Faktiki olaraq Ermənistan tərəfi danışıqlar masasında sülhdən yana açıqlamalar versə də, reallıqda isə sülh prosesinə kölgə salmaq, vaxt qazanmaq və gedişatı öz xeyrinə dəyişmək niyyəti güdür. Dövlət başçısı İlham Əliyev dəfələrlə bildirib ki, Azərbaycanda yaşayan bütün etnik xalqlara bərabər yanaşılır, onların hüquqları qorunur. Şuşa şəhərində keçirilən beynəlxalq Forumda da Prezident vurğuladı ki, Azərbaycan çoxmillətli və çoxkonfensiyalı bir dövlətdir, bizim gücümüz də bundadır. Azərbaycanda yaşayan etnik qrupların bütün nümayəndələri eyni hüquq və vəzifələrə, təhlükəsizlik səviyyəsinə malikdirlər. Bir etnik qrupu başqasından ayırmırıq. Torpaqlarımızda yaşayan ermənilər üçün də bərabər hüquqlar təmin ediləcək. Onların da təhlükəsizliyi tam təmin olunacaq. Bunu Ermənistan tərəfi də çox yaxşı bilir. Amma İrəvanın istəyi tamam fərqlidir".
Parlament üzvü diqqətə çatdırıb ki, Azərbaycan rəsmiləri ilə Xankəndidə yaşayan ermənilər arasında görüş keçirilib və onlar Bakıya dəvət olunub. Ancaq bir neçə dəfə dəvət edilsələr də, görüşdən imtina ediblər: "Bu da onu göstərir ki, Qarabağda yaşayan ermənilər oradakı separatçılar tərəfindən əsir edilib. Həmin ermənilərin hüquqları separatçılar və İrəvan tərəfindən pozulur. Prosesin uzanmasının səbəbi elə separatçılar özləridir. Dövlət başçısı vurğulamışdı ki, əgər separatçılar silahlı yerə qoyaraq Azərbaycan ərazilərini tərk edərsə, onların əfv olunma ehtimalı var. Yəni separatçılara da şans verilib. Əfsuslar ki, erməni quldurları, qanunsuz silahlı dəstələr verilən şansı dəyərləndirmirlər. Laçın yolunda qurulan nəzarət-buraxılış məntəqəsi məhz həmin ərazilərin təhlükəsizliyinin təmin edilməsi üçündür. Bu yol humanitar məqsədlərlə istifadə olunur. Nikol Paşinyanın qabartdığı "blokada" məsələsi həqiqəti əks etdirmir. Azərbaycan tərəfi öz torpaqlarına silah-sursatın daşınmasına, terrorçu dəstələrin keçməsinə və qaçaqmalçılığa imkan vermir".
N.Həmzəyev əlavə edib ki, separatçılar Qarabağdan çıxarılandan sonra orada yaşayan ermənilərin reinteqrasiyası daha sürətlə baş verəcək: "Nəticə etibarı ilə digər bölgələrimiz kimi Xankəndi və ətrafında da quruculuq, abadlıq işlərinə start veriləcək. Sirr deyil ki, Ermənistan Qarabağda yaşayan ermənilərə ögey münasibət sərgiləyib. İşğaldan azad olunmuş 7 rayonumuz kimi Qarabağ və ətrafı da bərbad gündə olub. Rəsmi Bakı Qarabağdakı ermənilərin orada yaşamaq hüququnu əlindən almır, sadəcə separatçıların qalmasını istəmir. Bu da tam haqlı və hüquqi tələbdir. Təbii ki, hər hansı əlahiddə imtiyazlardan da söhbət gedə bilməz".