"Şuşa şəhərində keçirilən Ümummilli Lider Heydər Əliyevin 100 illik yubileyinə həsr olunmuş "Böyük Avrasiya geosiyasətinin formalaşması, keçmişdən bu günə və gələcəyə" mövzusunda dördüncü beyxəlxalq konfrans zamanı möhtərəm Prezident İlham Əliyev bir çox sualı cavablandırıb. Bu sualları cavablandırarkən verdiyi açıqlamalar və cavablar çox böyük maraq doğurdu. Xüsusilə də Ermənistanla normallaşma məsələlərinə aydınlıq gətirən Azərbaycan Prezidenti Ermənistanı konstruktivliyə dəvət etdi. Konstruktiv addımlar atmayacağı təqdirdə ən çox ziyanın elə Ermənistana dəyəcəyini bildirdi. Çünki Azərbaycan 44 günlük Vətən müharibəsində öz haqqı olanı geri aldı və işğal altındaki torpaqlarını azad etdi. Bu günlərdə işğaldan azad olunmuş torpaqlarda abadlıq-quruculuq işləri həyata keçirilir". Bu sözləri açıqlamasında Mİlli Məclisin deputatı Naqif Həmzəyev deyib.
Onun sözlərinə görə, əgər Ermənistan sülhə razılıq verməsə kommunikasiyalar açılmayacaq və ölkə faktiki olaraq blokadada qalacaq: "Nəticə etibarilə yaxın gələcək üçün Ermənistanın inkişaf etməsi ləngiyəcək. Bunun əksinə kommunikasiyalar açılmasa belə Azərbaycanın həm şərqə, həm qərbə, həm də şimal və cənuba müxtəlif vasitələrlə çıxışları var. Azərbaycan nəqliyyat dəhlizlərinin şəbəkəsini yarada bilib. Bu baxımdan biz arzulayırıq ki, Ermənistanla kommunikasiyalar açılsın, Naxçıvana Zəngilandan gedən yol işə düşsün, Zəngəzur koridoru fəaliyyətini bərpa etsin".
Deputat sözlərinə davam edərək bildirib ki, bu, yalnız yol deyil, həm də enerji resurslarının daşına biləcəyi bir dəhliz rolunu oynayır: "Bir daha qeyd edirik ki, bunun üçün Ermənistanın qeydsiz-şərtsiz Azərbaycanın beş baza prinsipi əsasında irəli sürdüyü sülh sazişini qəbul etməsi vacibdir. Ermənistan bu yaradılmış şansı düzgün dəyərləndirməlidir. Əks təqdirdə Ermənistan özü-özünü təcrid edəcək. O, özünü təcrid etməklə yanaşı regionda da inkişafı ləngitmiş olacaq. İstənilən halda artıq Azərbaycana ziyan vurmağa gücü qalmayıb.
Çünki Azərbaycan dövləti və ordusu çox güclüdür. Bütün sərhədboyu ərazilər Azərbaycanın silahlı qüvvələri tərəfindən tam nəzarətdə saxlanılır. Bu baxımdan da Ermənistanın revanşist xəyallar qurması mənasızdır. Ən düzgün yol Azərbaycanın uzatdığı sülh əlini sıxmaq, Azərbaycanla sülh müqaviləsi imzalamaq, sərhədlərin delimitasiya və demarkasiyasını həyata keçirmək və kommunikasiyaların bərpasını təmin etməkdir.
Möhtərəm ölkə başçımızın bu mövzuda səsləndirdiyi fikirlər, çox obyektiv və konstruktivdir. Azərbaycan regionda sülhün daimi və uzunmüddətli olmasını istəyir. Ölkəmiz yeni bir müharibənin başlamasının tərəfdarı deyil. Müharibə istəyən qüvvələr də anlamalıdır ki, Azərbaycanla güc yolu ilə danışmaq mümkün deyil, bunun heç bir mənası yoxdur. Belə addımlar, belə fikirlər yalnız sözügedən qüvvələrin iflasına gətirib çıxara bilər".