“Vaşinqtonda Azərbaycan və Ermənistan xarici işlər nazirləri səviyyəsində növbəti görüşün keçirilməsi müsbət haldır. Ən önəmli məqam ondan ibarətdir ki, ABŞ tərəflər arasında münasibətlərin normallaşması və sülh müqaviləsinin imzalanmasında ciddi tərəf kimi çıxış edir. Prosesdə çox maraqlı olduğunu da ortaya qoyur”.
Bu fikirləri açıqlamasında Milli Məclisin deputatı Naqif Həmzəyev bildirib.
Onun sözlərinə görə, Rusiya, Avropa İttifaqı və ABŞ formatında keçirilən bu görüşlərdə moderatorlar özlərinin iştirakı ilə prosesin reallaşmasını istəyirlər:
“Bu vasitəçilərin də prosesdə öz maraqları var. “Münasibətlərin tənzimlənməsi razılaşması” növbəti dövrdə proqramın razılaşması deməkdir. Fikrimcə, yaxın dövrdə İrəvan hər hansı təxribat törətməzsə, sülhə daha da yaxınlaşa bilərik. Xüsusən də Laçın yolunda sərhəd-keçid məntəqəsinin qurulması, Azərbaycan ərazilərinə keçən erməni əsilli vətəndaşların yoxlamalara cəlb edilməsi müəyyən narazılıqlar yaratsa da Ermənistan bunu qəbul etdi. Dəfələrlə Nikol Paşinyan və erməni rəsmiləri Qarabağ məsələsinin bitdiyini, Azərbaycan ərazisi olduğunu qəbul etdiklərini səsləndiriblər. Lakin separatçılar və erməni diasporasının təsiri ilə bəzi ölkələrin rəsmiləri bu məsələyə aqressiv yanaşır, məsələni başqa cür qiymətləndirməyə çalışırlar. Reallıq bundan ibarətdir ki, Azərbaycan suveren haqqını icra edib. Bunu ABŞ və digər vasitəçilər də yaxşı anlayır”.
Deputatın fikrincə, Ermənistanın yeganə çıxış yolu sülh müqaviləsinin imzalanmasını sürətləndirməkdir:
“Bu yerinə yetirilməsə, beynəlxalq ictimaiyyət problemin birbaşa rəsmi İrəvanla bağlı olduğunu dilə gətirmək məcburiyyətində qalacaq. Bu isə Ermənistan üçün ağır nəticələnə bilər. Vaşinqton görüşü sülhə doğru gedən yolda çox önəmli addımdır. Ümid edirik ki, sözügedən görüşdə əldə edilmiş müəyyən razılaşmalar yaxın dövrdə real nəticələrə gətirib çıxardacaq”.