"Azərbaycan və Qazaxıstan münasibətləri müstəqillik illərindən sonra artan xətt üzrə inkişaf edib. Hər iki dövlət bütün beynəlxalq platformalarda bir-birini müdafiə edib. Həm Müstəqil Dövlətlər Birliyinin tərkibində, həm də Türk Dövlətləri Təşkilatında hər iki dövlət yüksək səviyyədə təmsil olunmaqdadır. Türk Dövlətləri Təşkilatının təsis edilməsi, mövcud olması və günü-gündən güclənməsində Türkiyə ilə yanaşı, Azərbaycan ilə Qazaxıstanın da misilsiz xidmətləri var. İqtisadi, mədəni, siyasi və sosial sahələrdə münasibətlər getdikcə daha da yaxşılaşır". Bu sözləri açıqlamasında deputat Naqif Həmzəyev deyib.
Onun sözlərinə görə, Hökumətlərarası İqtisadi Komissiya mütəmadi olaraq toplantılar keçirir: "Hər iki dövlətə sərmayələrin qoyuluşu ilə bağlı böyük artım var. Yaxın zaman üçün hədəf dövriyyənin 1 milyard dollara çatdırılmasıdır. Heç kəsə sirr deyil ki, 44 günlük Vətən Müharibəsinin gedişində Qazaxıstan Azərbaycanın mövqeyini dəstəkləyib. Bununla da kifayətlənməyən Qazaxıstan Qarabağ və Şərqi Zəngəzurun dirçəldilməsi və yenidən qurulmasına öz töhfəsini vermək məqsədilə hazırda Füzulidə Uşaq Yaradıcılıq Mərkəzinin tikintisini həyata keçirir. Bu, Qazaxıstan dövlətinin Azərbaycana hörməti kimi dəyərləndirilməlidir".
Deputat sözlərinə davam edərək bildirib ki, ötən il Qazaxıstan Prezidenti Tokayevin Azərbaycana səfəri zamanı imzalanmış sənədlər münasibətləri daha da irəli apardı: "Cənab Prezident İlham Əliyevin Qazaxıstana sonuncu səfəri zamanı əldə edilmiş razılıqlar, imzalanmış sənədlər xüsusilə də Ali Dövlətlərarası Şuranın yaradılması qərarına gəlinməsi onu deməyə imkan verir ki, iki dövlət arasında münasibətlər strateji müttəfiqlik səviyyəsinə çatıb. Bütün sahələr üzrə əməkdaşlığın əldə edilməsi məqsədilə səylər daha da artırılacaq. Ümid edirəm ki, Qazaxıstan və Azərbaycan arasında yaxın dövrdə Şuşa Bəyannaməsinə bərabər bir razılığın əldə olunması mümkün olacaq. Qazaxıstan dövləti Ulu Öndər Heydər Əliyevin 100 illik yubileyi münasibətilə bir çox tədbirlər həyata keçirib. Qazaxıstanda Ulu Öndərlə bağlı sənədli filmin hazırlanması, oradakı universitetlərin birində Heydər Əliyev auditoriyasının təmir edilib yenidən istifadəyə verilməsi və Astana şəhərində yeni, müasir, geniş bir küçəyə Ulu Öndərin adının verilməsi ona böyük hörmətin nümunəsidir. Yalnız enerji resurslarının daşınması, milli təhlükəsizlik məsələləri deyil, həmçinin qida təhlükəsizliyi məsələlərində də hər iki dövlət arasında çox mühüm razılaşmalar var. Bu razılaşmalar qarşılaşa biləcəyimiz bütün çətinliklərin aradan qaldırılmasında bizə kömək olacaqdır. Ən əsası Orta Dəhlizin inkişaf etdirilməsi, logistik xidmətlərin yüksək səviyyəyə çatdırılması mümkün olacaq. Orta Dəhliz ən təhlükəsiz, ən etibarlı, sürətli və ucuz bir xətt kimi ən qısa zamanda işə düşəcəkdir. Bu isə həm Qazaxıstanın, həm də Azərbaycanın iqtisadi güclənməsi ilə nəticələnəcək".