Azərbaycanla Qazaxıstan arasındakı müttəfiqlik münasibətləri inkişaf etməyə davam edir.
Ötən ilin avqust ayında Qazaxıstan Prezidenti Kasım-Jomart Tokayevin Azərbaycana rəsmi səfəri zamanı "Müttəfiqlik qarşılıqlı əlaqələrinin və strateji tərəfdaşlıq münasibətlərinin dərinləşdirilməsi haqqında" Bəyannamə imzalandı.
Cari ilin 10 aprel tarixində isə imzalanan bəyannamə də əlaqələrin və müttəfiqlik münasibətlərinin möhkəmlənməsinə yönəlib. Bunun əsasını ölkələrimizin qardaş xalqları arasında çoxəsrlik tarixə malik olan qarşılıqlı əlaqələr, dostluq və əməkdaşlıq təşkil edir.
Milli Məclisin deputatı Naqif Həmzəyev açıqlamasında bildirib ki, qlobal məkanda baş verən münaqişələr və mövcud reallıqlar fonunda Azərbaycanla Qazaxıstanın daha da yaxınlaşması təbii bir prosesdir:
“Necə ki, Azərbaycan və Türkiyə qardaş dövlətlərdir, Qazaxıstanla da Azərbaycan həmişə bir-birlərinə qardaş münasibəti bəsləyiblər. Bizim həm tarixi və etnik kökümüz, həm də dilimiz, dinimiz və mədəniyyətimiz demək olar ki, eynidir. Bizi yalnız Xəzər dənizi ayırır. O da ki, əksinə olaraq bizi birləşdirir. Çünki məhz Xəzər dənizinin resursları həm Azərbaycan, həm də Qazaxıstan tərəfindən istifadə edilir. Hər iki dövlətin iqtisadiyyatı bu resurslar hesabına da güclənir. Hazırda Azərbaycan və Qazaxıstan arasındakı münasibətlər strateji müttəfiqlik səviyyəsindədir.
Prezidentlərin qarşılıqlı səfərləri çərçivəsində də imzalanmış sənədlər yalnız sənəd deyil. Bu, artıq reallaşan işlərdir. Xeyli vaxtdır Azərbaycan-Qazaxıstan Hökumətlərarası Komissiya işləyir və ölkələr qarşılıqlı olaraq sərmayələr qoyublar. Yaxın gələcək üçün hədəf isə dövriyyənin 1 milyard dolları keçməsidir.
Bütün bunlarla yanaşı, artıq Qazaxıstan nefti tankerlərlə Azərbaycana daşınır və Bakı-Tblisi-Ceyhan boru kəməri vasitəsilə beynəlxalq bazarlara çıxarılır. Düşünürəm ki, yaxın gələcəkdə də Qazaxıstan qazının Xəzər dənizinin dibi ilə çəkiləcək boru xətti ilə Azərbaycan, Gürcüstan üzərindən Avropa bazarlarına çıxarıla bilər. Həmçinin, Zəngəzur dəhlizi üzərindən də daşına və ya Türkiyədə qurulacaq böyük qaz şəbəkəsinə çatdırıla bilər. Nəticə etibarilə, Qazaxıstan da alternativ yolla öz qazını dünya bazarına çıxaracaq”.
Deputat vurğulayıb ki, Azərbaycanla Qazaxıstan qardaş və dost ölkə olmaqla yanaşı, münasibətləri strateji müttəfiqlik münasibətlərinə çatıb:
“Heç kimə sirr deyil ki, ərzaq təhlükəsizliyi son dövrün ən aktual mövzularından biridir. Həm Azərbaycan Qazaxıstanın, həm də Qazaxıstan Azərbaycanın ərzaq təhlükəsizliyinin təmin edilməsində yaxından iştirak edir. Hesab edirəm ki, əldə edilmiş razılaşmalar nəticəsində yaxın dövrdə ərzaq təhlükəsizliyi ilə baş verə biləcək bütün risklər və problemlər aradan qaldırılıb.
Bundan sonra da Azərbaycan Qazaxıstana, Qazaxıstan isə Azərbaycana hərtəfli dəstək olacaq. Həmçinin, əldə olunmuş bütün razılaşmalara əsasən, tərəflər birinin resurslarından və təcrübəsindən rahatlıqla istifadə edə biləcək. Prezident İlham Əliyevin Qazaxıstana sonuncu səfəri zamanı əldə edilmiş Dövlətlərarası Ali Şuranın yaradılması isə ən yüksək səviyyədə əməkdaşlığın olmasına bir işarədir.
Bu bütün sahələr üzrə, o cümlədən milli təhlükəsizlik məsələləri üzrə də əməkdaşlığın və birgə fəaliyyətin zəruri olduğunu göstərir. Düşünürəm ki, yaxın dövrdə Şuşa Bəyannaməsinə bərabər bir sənəd Qazaxıstan-Azərbaycan arasında da imzalanma ehtimalı var. Bu da olsa, Azərbaycan-Türkiyə və Qazaxıstan-Azərbaycan münasibətləri demək olar ki, bərabər olacaq. Hərçənd ki, Türk Dövlətləri Təşkilatında əlaqələrimiz yüksək səviyyədədir. Ancaq ikitərəfli əlaqələrin də üst səviyyədə olması gələcəkdə dövlətlərarasındakı münasibətləri və ticarət dövriyyəsini ən yüksək səviyyəyə çıxarmağa imkan verəcək”.
Naqif Həmzəyev diqqətə çatdırıb ki, Qazaxıstan Heydər Əliyevin 100 illiyi çərçivəsində Ulu öndərin adını əbədi tutdu və adını paytaxtın mərkəzi küçələrindən birinə verdi:
“Həmçinin, Qazaxıstanın Azərbaycana Qarabağ və Şərqi Zəngəzurun yenidən qurulması işində dəstək olması, eləcə də Füzuli şəhərində Kurmanqazı adına Uşaq Yaradıcılıq Mərkəzinin tikintisini təşkil edir. Bütün bunlar isə artıq Qazaxıstanın hərtərəfli Azərbaycana münasibətini və hörmətini nümayiş etdirir. Tariximiz, kökümüz, adət və ənənələrimiz bizi məcbur edir ki, biz daha da sıx olaq. Beləliklə, qarşıda yarana biləcək bütün təhdidləri birlikdə aşacağıq, dövlətlərimiz və xalqlarımız birlikdə iştirak edəcək”.