“Hazırda Türkiyə öz ağır günlərini yaşayır. Minlərlə insanın ölümü böyük bir faciədir. Təbii ki, belə çətin anlarında Azərbaycanın Türkiyənin yanında olması, onun qardaşlıq borcudur. Nə yaxşı ki, bu mənəvi borcunu yerinə yetirmək - qardaşına dəstək göstərmək üçün uca Tanrı ölkəmizə güc verir”.
Bu sözləri Milli Məclisin deputatı Naqif Həmzəyev deyib.
Millət vəkili bildirib ki, Prezident İlham Əliyevin müəllifi olduğu “Azərbaycan-Türkiyə qardaşlığı və dostluğu bütün dünya üçün bir nümunədir” tezisi bu gün bir daha özünü doğruldur:
“Azərbaycan-Türkiyə qardaşlığı tarixin bütün sınaqlarından uğurla çıxıb. Bu, indi də belədir. Bu gün iki qardaş ölkə bir-birinin sevincinə şərik olur, kədərini bölüşür. Sözügedən təbii fəlakət baş verdikdən sonra xilasedicilərimizin, tibb personalımızın qardaş ölkəyə yollanması və bu kimi digər dəstək tədbirləri Azərbaycan Respublikasının Prezidenti İlham Əliyevin göstərişi ilə atılan çevik addımlara nümunədir”.
N.Həmzəyev qeyd edib ki, Azərbaycanın birinci xanımı Mehriban Əliyeva hər zaman olduğu kimi, bu gün də xeyirxahlıq missiyasını ən yüksək səviyyədə yerinə yetirir.
“Bu danılmazdır ki, Birinci vitse-prezident Mehriban Əliyevanı sevdirən xüsusi amil onun peşəkar siyasi fəaliyyətilə yanaşı, humanizm prinsiplərinə sadiq qalması, xeyriyyəçilik aktlarında daima fəal iştirak etməsidir. Müşahidələrimiz buna əyani sübutdur. Bu gün ağır durumunda qardaş ölkəyə dəstəyin nümayişində də hörmətli Mehriban xanımın aktiv fəaliyyəti nəzərə çarpır. Bildiyiniz kimi, Birinci xanımın tapşırığı ilə Heydər Əliyev Fondu tərəfindən zəlzələ bölgəsinə humanitar yardım göndərilib. Əlbəttə, bu, ilk növbədə Azərbaycan qadınının geniş ürəyə, həssas qəlbə sahib olmasının göstəricisidir.
Bu gün xilasedicilərimiz, həkimlərimiz, media işçilərimiz, o cümlədən diplomatlarımız hadisə yerində öz vəzifələrinin öhdəsindən layiqincə gəlirlər. Bu da hörmətli Mehriban xanımın diqqətindən yayınmır, paylaşımlarda əks olunur. Təbii ki, bu, Birinci vitse-prezidentin öz xalqına olan diqqətinin göstəricisidir”, - deyə millət vəkili vurğulayıb.
Naqif Həmzəyev onu da əlavə edib ki, bu gün “PAŞA Holdinq” başda olmaqla, bir çox özəl şirkətlər, o cümlədən Milli Məclis və digər dövlət qurumları Birinci xanımın təşəbbüsünə qoşularaq, “Türkiyəyə dəstək” kampaniyasında aktiv iştirak edir.