Azərbaycançılıq ideyası Azərbaycanda, eləcə də bütün dünyada yaşayan azərbaycanlılar üçün əsas ideyaya çevrilib. Azərbaycan dövləti xaricdə yaşayan azərbaycanlıların birliyi, onların təşkilatlanması məsələsini daim diqqət mərkəzində saxlayıb, Azərbaycan diaspor cəmiyyətlərinin problem və qayğılarına böyük həssaslıqla yanaşıb. İndiki həssas məqamda diasporumuzun qarşısında duran əsas məqsədlərdəm biri digər xalqların diaspor təşkilatları ilə əməkdaşlıq etmək, Azərbaycanın haqq səsinin dünyaya çatdırılmasında onların dəstəyini qazanmaqdır. Bu baxımdan xarici ölkələrdə yaşayan soydaşlarımızın türk diaspor təşkilatları ilə əlaqələrini və birgə fəaliyyətini xüsusi qeyd etmək lazımdır. Tarixi proseslərin gedişi dünyanın müxtəlif ölkələrində yaşayan milyonlarla azərbaycanlının və türkiyəlilərin qüvvəsinin iki dövlətin ümumi maraqlarının müdafiəsinə istiqamətləndirilməsini zəruri edir.
Mövzu ilə bağlı danışan Milli Məclisin deputatı Naqif Həmzəyev deyib ki, son illər Azərbaycan bütün sahələrdə olduğu kimi diaspor quruculuğu sahəsində də türk qardaşlarla birlikdə addım atır.
Deputat bildirib ki, ötən illər ərzində xaricdə baş vermiş bütün aksiyalara nəzər yetirilsə, həm Türkiyə, həm Azərbaycanla bağlı bütün məsələlərdə Azərbaycan və Türkiyə disaporlarının birlikdə addım atdığı, fəaliyyət göstərdiyi, həmişə bir-birilərinə dəstək olduqları görünər: “Bu gün təəssüf ki, Türkiyədə çox ağır fəlakət baş verib və aradan qaldırılması üçün Türkiyəyə yaxın, dost, hətta Türkiyə ilə münasibətləri yaxşı olmayan dövlətlər belə səfərbər olub, bacardıqları dəstəyi nümayiş etdirirlər. Amma hər kəs gördü ki, dar günündə Türkiyəyə ən yaxın dövlət, özü qədər sevən məhz Azərbaycandır. Azərbaycan ən çox yardım, xilasedici qüvvə göndərdi və ilk andan Türkiyəyə hərtərəfli dəstək nümayiş etdirdi. Dövlət dəstəyi ilə yanaşı, Azərbaycan xalqı da əlindən nə gəlirsə, yardım olaraq toplayıb Türkiyəyə göndərir, türk qardaşlarının yanında olduğunu nümayiş etdirir. Təəssüf ki, bizi istəməyən qüvvələr bu dar günümüzü fürsət bilərək həm Türkiyə, həm Azərbaycan əleyhinə müəyyən təbliğatlar aparır, hazırlıqlar həyata keçirirlər. Belə bir məqamda, xüsusilə xaricdə erməni diasporunun apardığı çirkin kampaniyanın qarşısını almaq üçün diaspor nümayəndələrimiz aktivlik göstərməlidirlər. Dünyanın müxtəlif yerlərində Türkiyəyə yardım kampaniyaları həyata keçirilir. Həmin kampaniyalara diaspor təşkilatlarımız da dəstəklərini sonuna qədər nümayiş etdirməlidirlər. Xüsusilə informasiya müharibəsində Azərbaycana və Türkiyəyə qarşı aparılan bu çirkin mübarizənin qarşısını almalıdırlar. İstənilən halda Türkiyə və Azərbaycan həmişə birgə addım atıb. Türkiyə-Azərbaycan qardaşlığı sınaqdan dəfələrlə çıxıb. Təbii fəlakət sınağını da uğurla arxada qoya bildik. Azərbaycan Türkiyənin yanında olduğunu hərtərəfli sərgilədi, sözdə yox, bunu əməldə isbat etdi. Diaspor nümayəndələrimiz də həm informasiya müharibəsində, həm Türkiyəyə lazımi dəstəyin ötürülməsi, göndərilməsi baxımından, həmçinin Azərbaycana və Türkiyəyə - Türk dünyasına qarşı olan təhdidlərin qarşısının alınmasında öz səylərini artıracaqlar. Bu dar günləri də arxada qoyacağıq. Xoş günlər Azərbaycanı, Türkiyəni – Türk Dünyasını gözləyir”.
Azərbaycan Naminə Alyans Partiyasının sədri Abutalıb Səmədov isə bildirib ki, Azərbaycan diasporunun fəallığına həmişə ehtiyac olub:
“Torpaqlarımızın 20%-i işğal olunanda da, Vətən müharibəsi dövrü və bundan sonrakı dövrdə də diasporumuzun aktiv şəkildə Azərbaycanın haqlı mövqeyini müdafiə etməsi son dərəcə vacib idi. Bu gün bu ehtiyac bir az da artıb. Ermənistanla bağlı problemlərimiz hələ də qalmaqdadır. Fransa Azərbaycana qarşı açıq düşmənçilik mövqeyinə keçib. Digər tərəfdən İran da Azərbaycana qarşı Fransanın mövqeyinə yaxın, hətta bəzən bundan daha düşmən siyasəti yürüdür. ABŞ-ın Azərbaycana yönəlik siyasətində dəyişikliklər var. Təbii ki, bu, bizi sevindirir. Ancaq bu da diasporun fəaliyyətini azaltmaq üçün əsas deyil. Biz daim işləməliyik. Çünki ABŞ Azərbaycan üçün çox böyük əhəmiyyətə malik dövlətdir. Rusiyanın da siyasətində kəskin dəyişikliklər baş verir. 2021-ci ilə qədər Qarabağ məsələsində Azərbaycana daha yaxın mövqe tutan Rusiya 2022-ci ilin yanvarından başlayaraq Ermənistana xoş gələn mövqe nümayiş etdirməyə başladı və ilin sonunda Validimir Putinin Valday bəyanatı, ardınca Soçidəki görüş bir daha göstərdi ki, Azərbaycanın problemləri qalmaqdadır. Həm ölkə daxilindəki qüvvələrin, həm də xaricdə fəaliyyət göstərən diaspor təşkilatlarının arxayınlaşmağa haqqı yoxdur. Səylərimizi birləşdirməliyik, ermənilərin Fransa və İranın Azərbaycana qarşı düşündükləri mənfur planlara qarşı cavab verməyə çalışmalıyıq. Bunların hər üçünün əsas məqsədi Azərbaycanı xaricdə nüfuzdan salmaq, Azərbaycanın aqressiv dövlət olduğunu, qonşularla dinc, yanaşı yaşamaq istəmədiyini sübut etməkdir. Təbii ki, bunlar hamısı yalan olduğundan bunu sübut etmək də qeyri-mümkündür. Ancaq yalanlar, yalan bəyanatlar səsləndirilir. Bu bəyanatların, yalanların cavabı vaxtında verilməlidir. Hər bir ölkədə fəallığımızı artırmalıyıq. Fransa parlamentinin son qətnaməsi göstərdi ki, xüsusilə Fransada işlərimiz yaxşı deyil. Biz Fransa Senatının üzvlərini haqlı olduğumuza inandırmağı bacarmamışıq, ancaq bacarmalıyıq. Həm Fransada, həm Almaniyada, Böyük Britaniya, ABŞ-da, həm də digər dövlətlərdə - harada azərbaycanlı varsa, Azərbaycan dövlətinin maraqları üçün çalışmalıdır. Eyni zamanda diaspor komitəsi də bu təşkilatların maliyyə məsələlərinin həll olunması üçün əlindən gələni etməlidir. Çünki yalnız yaxşı təşkil olunmuş və müəyyən maliyyə imkanları olan diaspor təşkilatları real iş görə, Azərbaycan əleyhinə olan yalanları vaxtında ifşa edə bilərlər”.