"Prezident Ərdoğanın Şərqi Zəngəzurun mərkəzi hesab edilən Zəngilan şəhərinə səfər etməsi bir daha Türkiyənin Azərbaycana hərtərəfli dəstək verdiyinin və yanında olduğunun nümayişidir".
Bu fikirləri açıqlamasında millət vəkili Naqif Həmzəyev Ərdoğanın Zəngilan Hava Limanın açılışında iştirakı ilə bağlı danışarkən deyib.
Millət vəkili qeyd edib ki, Azərbaycanın yaratdığı yeni reallıqlar fonunda Cənubi Qafqazda baş verən prosesləri, xüsusilə də Şərqi Zəngəzurdakı layihələrin reallaşmasını qəbul edə bilməyən qüvvələr var:
"Azərbaycanın sülh əlini uzatsa da, Ermənistan hələ də revanşist düşüncə ilə addım ataraq prosesləri uzatmağa çalışır. Ermənistan və havadarları Azərbaycanın güclənməsini, regionda əsas qüvvə olmasını qəbul edə bilmir. Həmin qüvvələr Cənubi Qafqaza təsir mexanizmlərini öz əllərində saxlamaq üçün Azərbaycanla Ermənistan arasında münaqişənin yekunlaşmasını dəstəkləmir və arxa planda fərqli işlər görürlər. Xüsusilə də Ermənistanın son dövrlərdə həyata keçirdiyi təxribatlar, hazırda isə şərti Ermənistan-Azərbaycan sərhədlərinə ağır texnikanın yığılması onu deməyə imkan verir ki, Ermənistan növbəti dəfə böyük miqyaslı təxribata hazırlaşır. Həmçinin Avropa İttifaqının mülki missiyasının şərti Ermənistan-Azərbaycan sərhədində müşahidələr aparması Ermənistanı müəyyən dərəcədə ruhlandırıb. Hətta Ermənistan ATƏT-in də bura missiya göndərməsini istəyir. Lakin Azərbaycan öz ərazilərində hansısa bir müşahidələr aparılmasına icazə verməyib və münasibətlərin normallaşması üçün konkret olaraq Avropa İttifaqı və Rusiyanın moderatorluğunu qəbul edib. Eyni zamanda ATƏT-in sülhlə bağlı hansısa töhvə verəcəyinə ümid etmir və prosesləri də uzatmağın tərəfdarı deyil".
N.Həmzəyev vurğulayıb ki, Türkiyə və Azərbaycan birlikdə Qarabağın bərpası üçün yatırım edir:
"Ərdoğanın Qarabağa növbəti səfəri Azərbaycanın tək olmadığını bir daha dünyaya nümayiş etirdi. Təlim adı alıtında, yaxud hər hansı bir məqsədlə hansısa fəaliyyəti həyata keçirmək istəyən qüvvələr Türkiyənin Azərbaycana göstərdiyi dəstək fonunda geriyə addım atmağa məcbur olacaq. Onlar Azərbaycan və Türkiyənin qarşısını almaq istəyilə özlərinin məhvinə çatacaqlar. Bu baxımdan Azərbaycan həm diplomatik, həm siyasi, həm də hərb meydanında istənilən qüvvənin cavabını verməyə hazırdır".