“Azərbaycan Qarabağda Şərqi Zəngəzuru işğaldan azad etdikdən sonra bu torpaqlarda normal həyatın bərpası ilə əlaqədar olaraq infrastruktur layihələrin həyata keçirilməsinə başladı. Yolların, dəmir yollarının, beynəlxalq hava limanlarının, elektrik enerjisi və qazla təminat və ümumiyyətlə burada bütün infrastruktur layihələrin mövcudluğu üçün təxirəasalınmaz işlər həyata keçirdi. Bu işlər bu gün də davam edir”. Bu sözləri açıqlamasında deputat Naqif Həmzəyev deyib.
Onun sözlərinə görə, bildiyimiz kimi, Qarabağda heç vaxt beynəlxalq hava limanı olmayıb: “Məlum olduğu üzrə, Zəngilan və Laçında beynəlxalq hava limanlarının tikinti işləri davam etdirilirdi. Artıq dünən cənab Prezident İlham Əliyev və Birinci vitse-prezident Mehriban Əliyeva Zəngilan Hava Limanının istismara hazır olması ilə bağlı baxış keçirdi, oradakı vəziyyətlə yerindəcə tanış oldu. Bu gün isə Zəngilan Beynəlxalq Hava Limanının rəsmi açılışı olacaq. Bu rəsmi açılışa qardaş Türkiyə Prezidenti böyük nümayəndə heyyəti ilə qatılacaq. Füzuli Beynəlxalq Hava Limanının açılışında da Türkiyə Prezidenti iştirak etmiş və bu gündəmə çevrilmişdi”.
Naqif Həmzəyev sözlərinə belə davam edib: “Ümumiyyətlə, son dövrlərə baxsaq görərik ki, Türkiyə və Azərbaycan bütün sahələr üzrə Şuşa Bəyannaməsinin müddəalarına uyğun olaraq hərkət edir. Hərtərəfli əməkdaşlıq və birgə fəaliyyət nəzərə çarpır. Həm beynəlxalq platformalarda, həm iki, üç və çoxtərəfli görüşlərdə Azərbaycan və Türkiyə eyni mövqedən çıxış edir. Onlar bütün təhdidlərə qarşı birgə mübarizə aparır.
Qardaş dövlət Türkiyə Vətən müharibəsinin gedişində də Azərbaycana siyasi-mənəvi dəstək göstərmişdi. Azərbaycan bu günləri də Türkiyənin hərtərəfli dəstəyini hiss etməkdədir. Qarabağın dirçəlməsi və yenidən qurulmasında Türkiyə şirkətləri yaxından iştirak edib.
Rəcəb Tayyib Ərdoğan Zəngilanda Beynəlxaq Hava Limanı açılışı ilə yanaşı digər tədbirlərə də qatılacaq. Birlikdə bir çox açılışların şahidi olacağıq. Ümumilikdə bu hava limanı Zəngilan-Ermənistan-İran sərhədində yerləşir və bu ərazi həm də Zəngəzur dəhlizinin keçəcəyi ərazidir. Burada çox mühüm avto-nəqliyyat, dəmiryolu və beynəlxalq yükdaşımaları mümkün olacaq. Həmçinin bu ərazi gələcəkdə böyük logistika mərkəzinə çevriləcək. Bütün bunlar səbəbindən bu hava limanının böyük rolu var.
Həmçinin, Türkiyənin dəstəyi ilə bu ərazilərdə böyük ticarət və yükdaşımalar şəbəkəsi formalaşacaq. Şərqdən Qərbə, xüsusilə də Çindən Aİ-yə və əks istiqamətə yük daşımalarının reallaşması üçün alternativ yol olaraq qəbul edilir. Rusiyanın da buradan istifadə edəcəyi ehtimal olunur. İran da bu ehtimallardan yararlana bilər. Həmçinin, Qərbi Zəngəzur Emrənistan nəzarətində olsa da, burada yaşayan insanlar da bu hava limanından yararlana biləcək.
Ümid edirik ki, növbəti illərdə Laçın hava limanının da açılışı olacaq. Bu açılışda da Türkiyə Prezidentini Azərbaycanda görəcəyimizə inanırıq. Türkiyə-Azərbaycan dostluğu və qardaşlığı günü-gündən inkişaf edir”.